« Chwazi kimoun zò ké sèvi »

1. Ka pou nou fè pou nou ni lakontantman é pou ki rézon ? (Izayi 48:17, 18).

PAP’AN-NOU ki an syèl-la enmé-nou é i vé nou ni lakontantman dépi konnyéla é dèmen osi (Ékl. 3:12, 13). Lè i kréyé-nou, i fè-nou on jan pou nou pé fè onlo bèl biten. Men i pa fè-nou pou nou désidé noumenm an nou ka ki bon é ka ki mové (Ékl. 8:9 ; Jér. 10:23). I sav kè pou nou ni lakontantman, fò nou sèvi-y é fò nou kouté sa i ka di (li Izayi 48:17, 18).

2. Ka Satan bizwen fè-nou kwè, é ka Jéova fè pou montré Satan ka manti ?

² Satan vlé fè-nou konprann kè nou pa bizwen Jéova pou nou ni lakontantman pas nou kapab dirijé-nou noumenm an nou (Jén. 3:4, 5). Pou i montré kè Satan sé on mantè, Jéova pèwmèt lézimen dirijé-yo yomenm a yo pannan on tan. Nou pa bizwen ay lwen pou nou konstaté kè tout biten a limanité ka échwé lè yo ka dirijé-yo yomenm a yo. Pawkont adan Labib, ou ka touvé onlo ègzanp a madanm é misyé ki té ni lakontantman padavwa yo té ka sèvi Jéova. Men pibèl ègzanp-la sé ta Jézikri. Adan awtik-lasa, nou ké vwè pou ki rézon i désidé sèvi Jéova. Aprésa, nou ké vwè poukwa Pap’an nou ki an syèl-la mérité nou adoré-y. É pou fin, nou ké vwè déotwa rézon ki fè kè nou désidé sèvi Jéova.

POU KI RÉZON JÉZI DÉSIDÉ SÈVI JÉOVA

3. Ka Satan pwopozé Jézi, men kijan Jézi réyaji ?

³ Lè Jézi té asi latè, i toujou montré kè sé Jéova i té vé sèvi. Pa ègzanp, apré Jézi pran lèbatèm, Satan pwopozé-y tout sé wayòm-la ki asi latè. Onsèl biten Jézi té ni a fè sé té adoré-y. Men mi sa Jézi di-y : « Sòti-w la Satan ! Pas mi sa ki maké : “Sé Jéova, Dyé a-w, pou-w adoré, é sé li tousèl pou-w sèvi” » (Mat. 4:8-10). Poukwa sé chwa-lasa Jézi fè ? An-nou vwè déotwa rézon.

4-5. Bay déotwa rézon ki fè si Jézi désidé sèvi Jéova ?

⁴ Prèmyé biten ki fè si Jézi té ka sèvi Jéova, sé kè i té enmé Pap’ay fò toubònman (Jan 14:31). Jézi té ka sèvi Pap’ay osi, pas pou-y, sa té toutafè nòwmal (Jan 8:28, 29 ; Rév. 4:11). I té sav kè sé Jéova ki ban-nou lavi, kè nou pé fè-y konfyans, é kè i ka ban-nou onpakèt bon biten (Sòm 33:4 ; 36:9 ; Jak 1:17). Jézi té sav kè Jéova toujou di-y lavérité, é kè tousa i ni, sé Jéova ki ba-y li (Jan 1:14). Pawkont, li Satan, i pa ni ayen a vwè èvè Jéova. Satan fè lézimen péché, é akòz dè-y, nou ka mò. I sé on mantè, é tousa i ka fè, a pa pou lézòt men sé pou-y menm i ka fè-y, pas i égoyis (Jan 8:44). Konm Jézi té konnèt kimoun Jéova té yé é kimoun Satan té yé, lidé a-y pa jen di-y imité Satan é ba Jéova do (Filip. 2:5-8).

⁵ Ondòt rézon ki fè si Jézi désidé sèvi Jéova, sé kè i té sav tout bon biten sa té’é pòté (Ébr. 12:2). I té sav kè fidélité a-y té’é ba non a Pap’a-y lonnè, é sa té’é pèwmèt kè péché-la é lanmò-la disparèt.

POU KI RÉZON NOU DÉSIDÉ SÈVI JÉOVA

6-7. Jòdijou, poukwa onlo moun pa ka adoré Jéova, é poukwa sé li tousèl pou nou adoré ?

⁶ Onlo moun pa ka sèvi Jéova pas yo pa konnèt bèl kalité a-y é yo pa konnèt tout sé bon biten-la i ka fè ba yo la. Lè Pòl préché Atèn, sé konsa sé moun-la té yé. Yo pa té konnèt Bondyé (Akt 17:19, 20, 30, 34).

⁷ Pòl èspliké moun Atèn kè vré Bondyé la « ka ba toutmoun lavi èvè souf-la é tout biten ». I di-yo ankò kè « sé grasa li nou ni lavi, nou ka boujé é nou ka ègzisté. » Sé Bondyé ki kréyé tout sé nasyon-la, alò i mérité kè nou adoré-y (Akt 17:25, 26, 28).

8. Ka Jéova pé’é jen fè ? Bay on ti èsplikasyon.

⁸ Konm Jéova kréyé tout biten é kè sé-y ki Gran Mèt a linivè, i té’é pé fòsé moun sèvi-y. Men Jéova pé’é jen fè on biten konsa. Olyé dè sa, i ka ban-nou prèv ki ka montré kè i ka ègzisté é ki ka montré kè i enmé-nou toubònman. I anvi kè lamajorité a moun vin zanmi èvè-y pou touttan (1 Tim. 2:3, 4). Sé pousa Jéova ka fòwmé-nou pou nou pé sa montré sé moun-la tout bon biten i fè pou limanité é kijan i ka fè sa (Mat. 10:11-13 ; 28:19, 20). I ban-nou osi sé lasanblé-la, é adan sé lasanblé-lasa nou pé sèvi Jéova, é sé ansyen-la pé édé-nou èvè onlo lanmou (Akt 20:28).

9. Kijan Jéova montré kè i enmé toutmoun asi latè ?

⁹ Jéova ka montré i ni lanmou pas i ka fè moun ki pa ka adoré-y pwofité dè tout bon biten i ka bay. Enn gadé sa : sa ja ka fè plizyè milyé lanné kè onpakèt moun ka fè sa lidé a yo ka di-yo, é yo pa’a menm ka okipé dè Bondyé. Magré yo ka aji konsa, non sèlman Jéova ka ba-yo sa yo bizwen pou yo viv men i ka ba-yo osi sa yo bizwen pou pwofité dè lavi (Mat. 5:44, 45 ; Akt 14:16, 17). Sé grasa Jéova yo pé ni zanmi é fanmi ki enmé-yo, yo pé ni timoun, yo pé ni on travay é yo pé pwofité alèz a yo (Sòm 127:3 ; Ékl. 2:24). Sa ka montré byen kè Jéova, Pap’an-nou ki an syèl-la enmé toutmoun asi latè (Ègz. 34:6). Men é nou aprézan, pou ki rézon nou désidé sèvi Jéova ? An-nou vwè déotwa rézon é an-nou vwè kijan Jéova ka béni moun ki désidé sèvi-y.

POUKWA JÉOVA MÉRITÉ NOU ADORÉ-Y

10. a) Pou ki rézon nou ka sèvi Jéova ? (Matyé 22:37). b) Jéova ka pran pasyans èvè nou. Lèfètkè i konsa èvè-w, ki byenfé sa ka pwokiré-w ? (Sòm 103:13, 14).

¹⁰ Kon Jézi, prèmyé biten ki fè si nou ka sèvi Jéova sé kè nou enmé-y toubònman (li Matyé 22:37). Lè nou ka aprann dé biten asi sé kalité-la i ni la, nou anvi vin pi bon zanmi èvè-y ankò. Pa ègzanp, an-nou vwè kijan Bondyé ka pran pasyans èvè noutout. Alòskè sé Israélit-la pa té obéyi Jéova é kè a pa té prèmyé fwa yo té ka aji konsa, i sipliyé-yo é mi sa i di-yo : « Viré owa an mwen souplé, é arété fè tout sé mové biten-la zò ka fè la » (Jér. 18:11). Menmsi nou ka fè onlo érè, Jéova ka padonné-nou pas i ka sonjé nou enpawfè (li Sòm 103:13, 14). Lè ou ka pran on ti tan pou kabéché asi sa é asi dòt bèl kalité ankò kè Jéova ni, sa pa’a ba-w anvi sèvi-y pou touttan ?

11. Pou ki dòt rézon nou chwazi sèvi Jéova ?

¹¹ Nou anvi sèvi Jéova toubònman pas nou sav sé on biten ki nòwmal (Mat. 4:10). Anplisdisa, nou sav kè lè nou fidèl a Jéova, sa ka menné onlo bon biten : nou ka ba non a Jéova lonnè, nou ka montré kè sé manti Satan ka manti, é nou pé fè tchè a Jéova kontan. É si nou ka chwazi sèvi Jéova dépi konnyéla, nou ké pé sèvi-y pou touttan (Jan 17:3).

12-13. Ka ègzanp a Pam é Jane ka aprann-nou ?

¹² Dépi toupiti, nou pé enmé Jéova fò. Aprésa, pi nou ka grandi, pi lanmou-lasa pé kontinyé grandi osi. Sé sa ki pasé pou Jane é pou sè a-y Pama. Jane té ni 11 an é Pam 10 an lèwvwè yo koumansé étidyé Labib. Menmsi lavérité pa té ka entérésé manman-la é papa-la, yo té dakò pou lésé Jane é Pam étidyé siwvwè yo té ka vin légliz èvè fanmi-la. Mi sa Jane ka di : « Sa sé Témwen-la aprann-mwen adan Labib, sa sèvi-mwen onlo pou mwen pa té bétizé lèwvwè kanmarad-lékòl an mwen té ka mèt présyon asi mwen pou an té pran dwòg oben pou an té ni rèlasyon sèksyèl. »

¹³ Plizyè lanné apré, Jane é Pam vin pwoklamatè. Kèlkè tan apré, yo vin pyonyé pèwmanan. Lè fanmi a yo vin ni on ti laj, yo okipé dè yo toupannan yo té adan sèwvis-la. Lè Jane ka viré sonjé sa i viv, mi sa i ka di : « An vwè kijan Jéova ka pran swen a moun ki zanmi a-y, é an vwè kè “Jéova konnèt moun a-y ki ta-y” kon 2 Timoté 2:19 ka di. » Sé vré, Jéova ka pran swen a moun ki enmé-y é ki ka sèvi-y.

14. Kijan nou pé défann non a Jéova ? (gadé sé imaj-la osi).

¹⁴ Nou vlé sé moun-la konnèt lavérité asi Jéova. An-nou pran on ègzanp : Ou ni on zanmi a-w ki sé on bon moun, i donan é i ni onlo konpasyon pou lézòt. On jou, ou ka tann on moun ka di kè zanmi a-w sé on bouwo é kè i malonnèt. Kijan ou ké réyaji ? Ou pé’é défann-li ? Menmjan-la, konm Satan é bannélo a-y ka sali non a Jéova, lè nou ka tann tout sé manti-lasa, nou anvi défann non a-y é nou anvi di lavérité asi-y (Sòm 34:1 ; Iz. 43:10). Sa nou ka di é sa nou ka fè ka montré sé Jéova nou enmé é kè sé li nou vé sèvi.

15. Davwa lapòt Pòl fè chanjman an vi a-y, ki byenfé sa pwokiré-y ? (Filipyen 3:7, 8).

¹⁵ Nou paré a fè chanjman adan vi an nou pou nou sèvi Jéova oben pou fè plis biten pou-y. Sé sa lapòt Pòl fè. I té on moun ki té enpòwtan adan rèlijyon juif la. Men i lagé rèlijyon-lasa pou i vin on disip a Jézi é pou i sèvi Jéova (Gal. 1:14). Kifè Jéova ba-y onlo bénédisyon, é i jous pèwmèt-li vin wa an syèl-la èvè Jézi. I chwazi sèvi Jéova é sé on désizyon i pa jen règrété. É si nou ka pran menm désizyon-la, nou nonplis, nou pé’é jen règrété sa (li Filipyen 3:7, 8).

16. Ka ègzanp a Julia ka aprann-nou ? (gadé imaj-la osi).

¹⁶ Si nou ka mèt sèwvis an nou prèmyé douvan adan vi an nou, nou ké ni onlo bénédisyon dépi konnyéla é dèmen osi. An-nou palé dè on sè non a-y sé Julia. Lè i té piti, i té ka chanté adan koral a légliz a-y. Tèlman i té ka chanté byen, yo koumansé ba-y on fòwmasyon pou i té vin chantèz. Adan on ti moman, moun koumansé konnèt Julia é i koumansé chanté dé gran jan dè koté. Onlè, i té k’ay adan on lékòl ki ka anségné mizik é lékòl-lasa sé té on gran lékòl. On kanmarad lékòl a-y koumansé palé-y dè Bondyé, é i montré-y kè non a-y sé Jéova. Aprésa, Julia mété-y ka étidyé Labib 2 fwa an simenn-la. I désidé sèvi èvè tan a-y é èvè fòs a-y pou i sèvi Jéova olyé i kontinyé chanté adan on opéra. A pa té on désizyon ki té fasil. Mi sa i ka èspliké : « Konm an arété chanté pou an té sèvi Jéova, onlo moun té ka di-mwen kè désizyon-lasa pa té ni pon sans. Men mwen sa an té vlé sé té pasé plis tan ka sèvi Jéova. » Ka Julia ka pansé dè désizyon-la i pran la ja ni plis ki 30 lanné dè sa ? Mi sa i ka di : « An ka santi-mwen anpé é an sèten on jou, Jéova ké ban-mwen tousa mwen anvi » (Sòm 145:16).

KONTINYÉ SÈVI JÉOVA !

17. Mond-la toupré bout. Ankijan sa ka konsèwné moun ki po’o ka sèvi Jéova é moun ki ja ka sèvi-y ?

¹⁷ Mond-lasa toupré bout. Mi sa lapòt Pòl maké : « Pas adan “on ti moman” ankò, “sila ki ka vin la ké rivé é i pé’é tadé” » (Ébr. 10:37). Ka sa vé di ? Pa’a rété onlo tan ankò pou moun chwazi sèvi Bondyé (1 Kor. 7:29). Si nou désidé sèvi Bondyé, nou sav kè kèlkèswa éprèv-la nou ka andiré la, sé pou « on ti moman » nou ka andiré-y.

18. Ka Jéova é Jézi vlé nou fè ?

¹⁸ Nonsèlman Jézi té vlé moun vin disip a-y, men i té vlé yo kontinyé suiv-li (Mat. 16:24). Si sa ja ka fè bon déotwa lanné kè nou ka sèvi Jéova, fò nou byen désidé a pa lagé. Fò nou travay rèd pou nou tchenn a mo an nou. Délè sa pa fasil. Men pou kantité bénédisyon nou ni dépi alè davwa nou ka sèvi Jéova é pou jan nou ni tchè-kontan, sa vo lapenn menm (Sòm 35:27).

19. Ka ègzanp a Gene ka aprann-nou ?

¹⁹ Pou sèwten moun, lè ou ka sèvi Jéova, ou oblijé fè onlo sakrifis. Pétèt si ou jenn, ou pé ni lenprésyon kè si ou ka sèvi Jéova ou ké pèd onlo biten. Mi sa on jennfrè non a-y sé Gene ka di : « An té ni lenprésyon an pa té pé pran pyé an mwen pas an té Témwen a Jéova. Lè an té ka gadé sélézòt jenn-la ki té ni menm laj ki mwen, an té ni lenprésyon kè yo té ni tchè-kontan pas yo té ka anmizé-yo, yo té ni on ti kopin é yo té ka pran pyé a yo adan jé vidéo ki té ni vyolans adan. É mwen aprézan sé té ay réinyon é préché. » Kijan sa i té ka pansé la aji asi-y ? Mi sa i ka di ankò : « An koumansé fè kon sé jenn-lasa men an té ka fè sa anba fèy. An té ka bwè dlo an mwen. Men an rann-mwen kont kè an pa té si kontan ki sa. An koumansé sonjé ki byenfé ou ni lèwvwè ou ka mèt prensip a Labib an pratik é an désidé kè an ké sèvi Jéova èvè tout tchè an mwen. Dépi sa, an ka santi kijan Jéova ka réponn chak priyè an ka fè. »

20. Ka pou nou byen désidé a fè ?

²⁰ Mi sa on moun ki maké sé sòm-la di : « Tchè-kontan pou moun-la ou ka chwazi la é kè ou ka fè vin owa a-w pou i pé sa rété an lakou a-w ! » (Sòm 65:4). Nou osi fò nou byen désidé a sèvi Jéova. Kon Joziyé nou pé di : « Mwen é fanmi an mwen, sé Jéova nou ké sèvi » (Joz. 24:15).