Nou pa jen tousèl an nou

1-2. a) Poukwa nou pé di kè kèlkèswa éprèv nou ka jwenn, nou pa jen tousèl an nou ? b) Ka nou ké vwè adan awtik-lasa ?

LÈWVWÈ nou ka jwenn éprèv, délè nou pé ni lenprésyon kè nou tousèl an nou adan on ti kannòt anmitan lanmè é lanmè-la démonté. Men an réyalité, nou pa tousèl. Pap’an-nou ki an syèl-la enmé-nou onlo. Nonsèlman i ka vwè jan nou ka goumé, men i ka pwomèt-nou kè i ké édé-nou. Mi sa i ka di tout sèwvitè a-y ki fidèl : « An ké édé-w » (Iz. 41:10).

² Adan awtik-lasa, nou ké vwè kè Jéova ka édé-nou lèwvwè 1) i ka gidonné-nou, 2) i ka ban-nou sa nou bizwen, 3) i ka pwotéjé-nou é 4) i ka konsolé-nou. I ka pwomèt-nou i pé’é jen oubliyé-nou kèlkèswa difikilté nou ka jwenn. I pé’é jen lagé-nou. Kifè nou pé’é jen tousèl an nou.

JÉOVA KA GIDONNÉ-NOU

3-4. Kijan Jéova ka gidonné-nou ? (Sòm 48:14).

³ (Li Sòm 48:14.) Jéova sav kè nou bizwen-y pou gidonné-nou. Kijan i ka gidonné sèwvitè a-y jòdijou ? On biten i ka sèvi èvè-y pou fè sa, sé Bib-la (Sòm 119:105). Grasa Pawòl a-y, Jéova ka édé-nou pran dé bon désizyon é i ka édé-nou imité-y, ki sé adan jan nou ka palé oben adan jan nou ka aji. Lè nou ka fè sa i ka mandé-nou, vi an nou ka pibèl dépi konnyéla é nou ni lèspwa dè viv pou touttana. Pawmi sé biten-la i ka aprann-nou la, ni lèfètkè fò nou padonné lézòt é kè fò pa nou ni pon moun asi tchè, fò nou réglo adan tousa nou ka fè é fò nou enmé lézòt èvè tout tchè an nou (Sòm 37:8 ; Ébr. 13:18 ; 1 Pyè 1:22). Lè nou ni sé kalité-lasa, nou ka vin dé pibon paran, nou ka vin on pibon mari oben on pibon madanm é nou ka vin dé pibon zanmi pou lézòt.

⁴ Anplisdisa, adan Labib, Jéova ka palé dè istwa a moun ki té adan pèp a-y é ki jwenn éprèv. Sé moun-lasa té ka rèsanti menm biten ki nou (1 Kor. 10:13 ; Jak 5:17). Lè nou ka li istwa a vi a yo sa ka aprann-nou dé biten, é lè nou ka mèt sé biten-lasa an pratik, sa ka menné enpé bon biten ban nou. An nou vwè 2 adan yo. Prèmyèwman, nou ka rann-nou kont kè nou pa tousèl an nou piskè ni dòt moun ki jwenn menm difikilté ki nou é ki rivé about a sé difikilté-lasa (1 Pyè 5:9). É dézyèmman, sa ka édé-nou andiré difikilté nou ka jwenn é sa ka édé-nou ni tchè-kontan magré nou anba éprèv (Wom. 15:4).

5. Kimoun Jéova ka itilizé pou gidé-nou ?

⁵ Jéova ka sèvi èvè frè é sè an nou osi pou i gidé-noub. Pa ègzanp, sé rèsponsab a siwkonskripsyon la ka vin vizité sé lasanblé-la pou ankourajé-nou. Sé diskou-la yo ka fè la ka konsolidé fwa an nou é ka édé-nou rété soudé adan lasanblé-la (Akt 15:40–16:5). Sé ansyen-la osi ka travay rèd pou édé-nouchak rété bon bon zanmi èvè Jéova (1 Pyè 5:2, 3). Sé paran-la ka aprann timoun a yo enmé Jéova é yo ka montré-yo kijan pou yo pran dé bon désizyon é kijan pou yo ni dé bon labitid ki ké édé-yo vin bon zanmi èvè Jéova (Pwov. 22:6). É sé sè-la ki byen chouké adan lavérité ka ba sé jennsè-la on bèl ègzanp, yo ka ba-yo dé bon ti konsèy é yo ka ankourajé-yo èvè onlo lanmou (Tit 2:3-5).

6. Lèfètkè Jéova ka gidé-nou, ki byenfé sa ka pwokiré-nou ?

⁶ Jéova ban-nou sa nou bizwen pou nou pé sa pran dé bon désizyon é pou nou pé sa ni tchè-kontan tout vi an nou. Kijan nou pé montré kè nou ka aprésyé sa i fè ban nou ? Mi sa Pwovèb 3:5, 6 ka di : « Fè Jéova konfyans èvè tout tchè a-w é pa konté asi pwòp entélijans a-w. » Lè nou ka fè sa, li aprézan, ‘i ka fè santyé an nou vin dwèt’. Sa vé di kè i ka édé-nou pou nou pa touvé-nou adan pon pwoblèm é pou nou pwofité dè lavi agou a tchè an nou. Jéova ka ban-nouchak dé konsèy èvè onlo lanmou. Ou ka imajiné adan ki sitiyasyon nou té’é yé siwvwè Jéova pa té la pou gidé-nou ! (Sòm 32:8).

JÉOVA KA BAN-NOU SA NOU BIZWEN

7. Ka Jéova ka fè pou ban-nou sa nou bizwen ? (Filipyen 4:19).

⁷ (Li Filipyen 4:19.) Lèwvwè nou ka travay rèd pou nou ni on dèkwa pou nou manjé oben pou nou ni lenj pou nou mèt anlè nou é pou nou ni on koté pou nou rété, non sèlman Jéova ka gidé-nou, men i ka édé-nou osi (Mat. 6:33 ; 2 Tés. 3:12). Menmsi sa nòwmal kè nou enkyèt pas nou pa sav si nou ké ni sa nou bizwen, Jéova pa vlé nou enkyété-nou twòp pou sé biten-lasa (Mat. 6:25). Poukwa ? Pas i pé’é jen lagé sèwvitè a-y ki fidèl lè yo ka jwenn bout-rèd (Mat. 6:8 ; Ébr. 13:5). Lèwvwè i ka di-nou i ké ban-nou sa nou bizwen, nou pé fè-y konfyans a san pou san.

8. Ka Jéova fè pou David ?

⁸ An-nou vwè kijan Jéova soutyenn David. Pannan tout tan-la David té ka éséyé chapé anba men a Sayil, Jéova ba ki David ki sé nonm-la ki té èvè-y la tousa yo té bizwen pou yo viv. Lè David sonjé kijan Jéova pran swen a-y pannan tout tan-lasa, mi sa i di : « An té jenn, é aprézan an vyéyi, men an pa jen vwè Bondyé lagé on moun ki jis é an pa jen vwè timoun a-y ka chèché manjé » (Sòm 37:25). Kon David, pétèt kè vou osi ou ja ni lokazyon vwè jan Jéova pran swen a-w èvè onlo tandrès é kijan i ni lokazyon fè-y pou frè é sè a-w osi.

9. Lèwvwè ni katastwòf, kijan Jéova ka ba pèp a-y sa i bizwen ? (gadé sé imaj-la osi).

⁹ Jéova ka pran swen a sèwvitè a-y osi lèwvwè ni katastwòf. O 1^é syèk, lèwvwè sé frè é sè la touvé-yo san manjé Jérizalèm, frè é sè ki té ka rété diféran koté voyé dé biten pou yo (Akt 11:27-30 ; Wom. 15:25, 26). Menmjan-la, jòdijou, pèp a Bondyé donan. Lè ni on katastwòf, é kè frè é sè an nou pri adan sa, èvè onlo lanmou Jéova ka fè ansòt pou dòt frè é sè voyé dé biten ba yo kon dlo, lenj oben médikaman. Si ni déga adan kaz a frè é sè an nou oben adan sal di Wayòm, ni frè é sè ki ka vin bay on pal pou sé travo-la. É sèwvitè a Jéova ka sèvi èvè Labib pou konsolé é pou ankourajé frè é sè ki pèd kaz a yo é moun yo té enmé é yo pa’a pèd tan pou fè sac.

10-11. Ka ègzanp a Boris ka aprann-nou ?

¹⁰ Jéova donan toubònman osi èvè moun ki po’o ka sèvi-y. Pou nou imité-y, nou ka chèché tout ti lokazyon pou nou janti èvè moun ki pa ka sèvi-y (Gal. 6:10). Sa pé ba sé moun-la anvi konnèt plis biten asi Témwen a Jéova é asi Bondyé an nou. An-nou gadé sa ki rivé Boris, on misyé ki té dirèktè a on lisé é ki ka rété an Ikrèn. Misyé-lasa pa Témwen a Jéova men i toujou aji èvè zélèv a-y ki Témwen èvè onlo bonté é i toujou rèspèkté kwayans a yo. Lè lagè pété koté-la i té ka rété la, i désidé pati pou ay on koté ki té pi kalm é frè é sè an nou édé-y. Déotwa tan apré, i vin Mémoryal. Lèwvwè i ka sonjé sa Témwen a Jéova fè ba-y, mi sa i ka di : « Sé Témwen a Jéova la té tèlman janti èvè mwen é yo pran swen an mwen. An ni onlo rèkonésans pou sa yo fè ban mwen. »

¹¹ Pap’an nou ki an syèl-la ni onlo mizérikòd é nou pé imité-y lèwvwè nou ka aji èvè lanmou èvè moun ki ka jwenn bout-rèd, ki yo ka sèvi ki yo pa ka sèvi-y (Lik 6:31, 36). Nou ka èspéré kè lanmou-lasa ké ba-yo anvi aprann plis biten asi Jéova é kè sa ké ba-yo anvi sèvi-y (1 Pyè 2:12). Men kèlkèswa sa yo ka désidé fè, nou kontan toubònman pas « on moun ka pli kontan lè i ka bay » (Akt 20:35).

JÉOVA KA PWOTÉJÉ-NOU

12. Ka Jéova pwomèt i ké fè pou pwotéjé pèp a-y ? (Sòm 91:1, 2, 14).

¹² (Li Sòm 91:1, 2, 14.) Jéova pwomèt i ké pwotéjé sèwvitè a-y pou ayen pa anpéché-yo rété bon bon zanmi èvè-y. I pé’é pèwmèt kè Satan anpéché-nou adoré-y kon li i ka mandé (Jan 17:15). É menm pannan gwo tribilasyon-la, nou pé sèten kè Jéova ké édé-nou pou fwa an nou rété fò é kè i ké sové-nou kon i pwomèt (Rév. 7:9, 14).

13. Kijan Jéova ka pwotéjé-nouchak ?

¹³ Kijan Jéova ka pwotéjé-nouchak ? Ében Jéova ka sèvi èvè Pawòl a-y Labib pou édé-nou sav ka ki bon é ka ki mové (Ébr. 5:14). Lè nou ka suiv sé prensip-la ki an Bib-la adan vi an nou, sa ka édé-nou rété bon zanmi èvè Jéova é sa ka édé-nou pran dé bon désizyon. Kifè nou ka pi kontan é santé an nou ka pibon (Sòm 91:4). Anplisdisa, i ka ban-nou lasanblé-la pou édé-nou rété fidèl a-y (Iz. 32:1, 2). Frè é sè an nou adan lasanblé-la enmé Jéova é yo ka kouté-y. Lè nou ka pasé tan èvè yo, ki sé pannan sé réinyon-la, ki sé lè nou ka préché èvè yo oben kè nou ka anmizé-nou èvè yo, yo ka ankourajé-nou é yo ka édé-nou rété lwen a tousa ki té’é pé fè-nou fè chimen kochi (Pwov. 13:20).

14. a) Poukwa Jéova pa ka woté-nou anba tout sé éprèv-la ? b) Dapré Sòm 9:10, dè ki biten nou pé sèten ? (gadé nòt-la osi).

¹⁴ An tan lontan, Jéova ni lokazyon pwotéjé pèp a-y pou ponmoun pa té mannyé-yo oben pou ponmoun pa té tchouyé-yo. Men a pa toutlè i té ka fè sa. Bib-la ka di kè ‘évènman nou pa té prévwa ka siwprann-noutout’ (Ékl. 9:11). Anplisdisa, Jéova lésé moun pèwsékité sèwten adan sèwvitè a-y é tchouyé-yo pou montrè Satan sé manti i ka manti (Jòb 2:4-6 ; Mat. 23:34). Sé menm biten pou nou jòdijou. Menmsi Jéova pa’a baré on éprèv ki ka vin asi nou, nou pé sèten kè i pé’é jen lagé moun ki enmé-yd (Sòm 9:10).

JÉOVA KA KONSOLÉ-NOU

15. Kijan lapriyè, Pawòl a Bondyé é frè é sè an nou ka konsolé-nou ? (2 Korentyen 1:3, 4).

¹⁵ (Li 2 Korentyen 1:3, 4.) Délè nou tris, nou enkyèt oben nou angwasé. Ès sé konsa ou ka santi-w sé jou-lasa ? Pétèt ou adan on sitiyasyon é sa ka tèwbolizé lèspri a-w, kifè ou ni lenprésyon kè ou tousèl. Men ès ni on moun ki ka konprann sa ou ka rèsanti konnyéla ? Wi, Jéova ka konprann sa ou ka rèsanti. Non sèlman i ka konprann jan nou ka soufè, men anplisdisa i ka konsolé-nou adan tout éprèv an nou. Lèwvwè nou ka wouvè tchè an nou ba-y, i ka ban-nou « lapé ki ka vin [dè-y], ki ka dépasé tousa on moun pé konprann » (Filip. 4:6, 7). Jéova ka konsolé-nou osi èvè sa i ka di-nou adan Pawòl a-y. Adan Bib-la, Jéova ka di-nou kè i enmé-nou, i ka di-nou osi kijan nou pé ni sajès é i ka ban-nou on èspwa pou dèmen. Ondòt biten ki pé konsolé-nou, sé sé réinyon-la. Lè nou k’ay réinyon, nou ka aprann dé biten an Bib-la ki ka ankourajé-nou é nou ka jwenn frè é sè an nou ki enmé-nou.

16. Ka ègzanp Nathan é Priscilla ka aprann-nou ?

¹⁶ An-nou vwè sa ki rivé Nathan é Priscilla, on frè é madanm a-y, ki ka rété o Zétazini. Jéova sèvi èvè Pawòl a-y pou konsolé-yo é pou ankourajé-yo. Ni kèlkè lanné dè sa, yo désidé ay on koté té ka manké pwoklamatè. Mi sa Nathan ka èspliké : « Nou té sèten Jéova té’é fè tout biten an nou maché ». Men lèwvwè yo rivé koté-la yo té k’ay préché la, yotoulédé tonbé malad é yo jwenn pwoblèm a lajan osi. Anfinaldikont, yo té oblijé viré koté-la yo té yé la avan, men yo kontinyé jwenn pwoblèm a lajan. Mi sa Nathan ka di : « An té ka mandé-mwen poukwa Jéova pa té édé-nou jan-la nou té ka pansé la. An jous mandé-mwen si an pa té fè on mové biten. » Men aprésa, Nathan é Priscilla rann-yo kont kè Jéova pa té lagé-yo. Mi sa Nathan ka di : « An jénéral, on bon zanmi ka ba-nou dé bon konsèy, é i ka ankourajé-nou. Ében sé sa Labib fè pou nou lè nou té ka jwenn bout-rèd. Nou aprann konsantré-nou asi jan Jéova ka édé-nou andiré, olyé nou konsantré-nou asi éprèv-la. Konnyéla, nou sèten Jéova ké édé-nou kèlkèswa difikilté nou ké jwenn dèmen. »

17. Kijan Jéova konsolé on sè non a-y sé Helga ? (gadé imaj-la osi).

¹⁷ Jéova ka sèvi èvè frè é sè an nou osi pou konsolé-nou. Sé sa on sè non a-y sé Helga konstaté. Sè-lasa ka rété an Ongri. Pannan plizyè lanné, i jwenn onlo difikilté ki té ka angwasé-y. Kifè, i té ni dimal a kwè kè i té ni valè. Men jòdijou, i ka rann-li kont kè Jéova toujou sèvi èvè frè é sè adan lasanblé-la pou konsolé-y. Mi sa i ka di : « Délè, an pa té ni fòs ankò. Fò an té travay, fò an té okipé dè timoun an mwen ki té malad é té ni dòt éprèv ankò. Jéova té ka vwè sa é i toujou té ka édé-mwen. I pwomèt-mwen i ké konsolé-mwen é pannan sé 30 lanné-la ki pasé la, pa ni onsèl jou i pa tchenn a mo a-y. É souvantfwa, i sèvi èvè dòt moun pou ban-mwen fòs. Yo té ka di-mwen dé ti pawòl ki té janti. An ni lokazyon rèsèvwa mésaj, yo voyé dé ti kat ban mwen oben yo félisité-mwen é a pa onsèl fwa sa rivé. Chakfwa, sa té ka fèt ègzaktèman a moman-la an té pi bizwen la. »

18. Kijan nou pé konsolé lézòt ?

¹⁸ Nou pé imité Bondyé an nou é sé on bèl lonnè. Alò kijan nou pé suiv ègzanp a-y é kijan nou pé ba lézòt fòs ? Nou pé fè sa lèwvwè nou ka pran tan kouté-yo, lèwvwè nou ka di-yo dé biten pou konsolé-yo é lèwvwè nou ka fè on biten ki itil ba yo (Pwov. 3:27). An-nou pòté bon mannèv pou nou konsolé touséla ki ka soufè la, ki yo ka sèvi Jéova ki yo po’o ka sèvi-y. É lèwvwè ni moun alantou an nou ki anpenn, ki malad oben ki enkyèt, an-nou ay vwè-yo, an-nou kouté-yo é an-nou pawtajé èvè yo dé ti lidé ki adan Labib é ki ké ankourajé-yo. Ka sa ké bay si nou fè sa ? Si nou ka imité Jéova, « Bondyé a tout konsolasyon-la », nou ké édé frè é sè an nou andiré sé éprèv-la yo ka jwenn la. Men a pa sa tousèl. Pétèt osi, sa pé ba moun ki po’o ka sèvi Jéova anvi konnèt-li (Mat. 5:16).

JÉOVA TOUJOU LA POU NOU

19. Ka Jéova ka fè pou nou é kijan nou pé imité-y ?

¹⁹ Lè on moun enmé Jéova, Jéova ka pran swen a-y toubònman. Menmjan on papa ka pran swen a timoun a-y èvè onlo lanmou, Jéova ka pran swen a sèwvitè a-y ki fidèl. I ka gidonné-nou, i ka ban-nou sa nou bizwen, i ka pwotéjé-nou, é i ka konsolé-nou. Nou ka imité Pap’an nou ki an syèl-la é ki enmé-nou lèwvwè nou ka soutyenn moun ki ka jwenn éprèv é kè nou ka ankourajé-yo. Adan mond-lasa, nou pé touvé-nou anba éprèv é tchè an nou pé an bobo. Men nou pé sèten Jéova ké toujou la èvè nou. Sé-y menm ki pwomèt sa. Mi sa i di : « Pa pè, pas an la èvè-w » (Iz. 41:10). Pwomès-lasa ka rasiré-nou é ka ban-nou bon fòs. Nou pa jen tousèl an nou.