AWTIK POU ÉTIDYÉ 19
KANTIK 6 « Les cieux proclament la gloire de Dieu »
Pran ègzanp asi sé zanj-la ki fidèl la
« Louwé Jéova, zòt, tout zanj a-y » (SÒM 103:20).
ON TI LIDÉ ASI SA NOU KAY VWÈ
Nou ké vwè ka ègzanp a sé zanj-la ki fidèl la ka aprann-nou.
1-2. a) Adan ki domenn nou pa kon sé zanj-la ? b) Adan ki domenn nou ka sanm sé zanj-la ?
KONM nou adan pèp a Bondyé, nou ka fè pawti a on fanmi ki plen lanmou é tout sé moun-la ki adan fanmi-lasa ka adoré Bondyé. Adan-y, ou ka touvé frè é sè ki tout koté asi latè é ni milyon é milyon zanj (Dan. 7:9, 10). Lè nou ka sonjé sé zanj-la, anjénéral nou ka di kè yo pa menmjan ki nou ditou-ditou. Ni plizyè biten ki ka fè-nou di sa. Pa ègzanp, yo ka ègzisté dépi pi lontan ki nou (Jòb 38:4, 7). Anplisdisa, yo lontan pi puisan ki nou. É yo lontan pi sen é pi jis ki nou pas nou nou enpawfè (Lik 9:26).
2 Men menmsi nou pa kon sé zanj-la adan onlo domenn, nou ka sanm yo adan onlo dòt domenn. Pa ègzanp, kon sé zanj-la, nou pé imité kalité a Jéova. Kon yo, nou ni on non é nouchak ni pèwsonalité an nou ki tan nou. Nou osi, nou pé pran pwòp désizyon an nou. Kon yo, toupannan nou ka travay pou Jéova, nou pé ni diféran rèsponsabilité. É kon sé zanj-la ankò, nou fèt pou nou adoré Kréyatè an nou (1 Pyè 1:12).
3. Ka ègzanp a sé zanj-la ki fidèl la pé aprann-nou ?
3 Konm nou ka sanm sé zanj-la adan plizyè domenn, ègzanp a yo pé ankourajé-nou é sa pé aprann-nou onlo biten osi. Adan awtik-lasa, nou ké vwè kijan nou pé imité imilité a sé zanj-la, lanmou-la yo ni la pou lézimen, andirans a yo é balan-la yo ni la pou fè ansòt pou lasanblé-la rété pwòp.
SÉ ZANJ-LA NI IMILITÉ
4. a) Kijan sé zanj-la ka montré yo ni imilité ? b) Poukwa sé zanj-la ni imilité ? (Sòm 89:7).
4 Sé zanj-la ki fidèl la ni imilité. Magré yo ja ni bon èkspéryans, é kè yo ni onlo puisans é onlo sajès, yo ka suiv sa Jéova ka mandéa (Sòm 103:20). Siwvwè yo rivé fè on travay yo ba-yo fè, yo pa jen ka blagé sa oben yo pa ka sèvi èvè pouvwa-la yo ni la pou fè moun pòté-yo anlè nonplis. Yo kontan fè sa Jéova ka mandé, menmsi ponmoun pa konnèt non a yo (Jén. 32:24, 29 ; 2 Wa 19:35). Yo sav kè tout lonnè-la sé pou Jéova, kifè lèwvwè on moun ka ba-yo lonnè, yo ka rèfizé lonnè-lasa. Kijanfè yo ni imilité konsa ? Sé pas yo enmé Jéova é yo ni onlo rèspé pou-y (li Sòm 89:7).
5. Kijan on zanj montré kè i té ni imilité lè i korijé lapòt Jan ? (gadé imaj-la osi).
5 An-nou vwè on istwa adan Labib ki ka montré kè sé zanj-la ni imilité. An lan 96 apépré, on zanj, nou pa konnèt non a-y, fè lapòt Jan vwè dé biten èstraòwdinè adan on vizyon (Rév. 1:1). Kijan lapòt Jan réyaji lè i vwè tout sé biten-lasa ? I té bizwen adoré zanj-la. Men zanj fidèl lasa pa fè ni yonn ni dé, i anpéché Jan fè sa. Mi sa i di Jan : « Awa ! Pa fè sa ! An sé on èsklav kon voumenm é kon frè a-w […]. Adoré Bondyé ! » (Rév. 19:10). Zanj-la réponn-li èvè onlo imilité ! Zanj-la pa chèché a rèsèvwa pon glwa é i pa chèché a fè-yo pòté-y anlè nonplis. Tousuit, i fè Jan sonjé kè sé Bondyé pou i adoré. Anplisdisa, i pa fè Jan konprann kè i té ni mwens valè ki-y. Menmsi i té ka sèvi Jéova dépi pi lontan ki-y é kè i té lontan pli puisan ki-y, i di-y kè i sé on èsklav kon-y menm. É menmsi i té bizwen korijé Jan, i pa mété-y ka palé rèd ba-y. I palé ba-y èvè onlo lanmou. Pétèt zanj-la di an tchè a-y kè sé tout sé biten èstraòwdinè la Jan té sòti vwè la ki fè-y réyaji konsa.
Zanj-la aji èvè imilité èvè Jan (gadé paragraf 5 la).
6. Sé zanj-la plen imilité. Kijan nou pé imité-yo ?
6 Sé zanj-la ni imilité, kijan nou pé imité-yo ? Ében kon sé zanj-la, lèwvwè yo ka ban-nou on travay a fè, nou pé’é ay blagé sa ba dòt moun é nou pé ké aji on mannyè pou lézòt pòté-nou anlè pou sa nonplis (1 Kor. 4:7). Anplisdisa, fò pa nou akwè-nou davwa nou ka sèvi Jéova dépi onpakèt lanné oben pas yo ban-nou sèwten rèsponsabilité. Anfèt, pi nou ni rèsponsabilité, pi fò-nou montré-nou toupiti douvan lézòt (Lik 9:48). Nou pa ka éséyé fè lézòt konprann kè nou ni plis valè ki yo nonplis, okontrè, sé sèvi nou vé sèvi-yo kon sé zanj-la ka fè.
7. Kijan nou pé montré kè nou ni imilité lè nou ka korijé on moun oben lè nou ka ba-y on konsèy ?
7 Nou osi, si fò nou ba on frè, on sè, oben timoun an nou on konsèy, fò nou fè sa èvè imilité. Délè, fò nou ké karé èvè moun-la. Men nou ké palé èvè onlo lanmou ba-y pou sa pa dékourajé-y. Lè nou ké fè sa, nou ké imité jan-la zanj-la aji èvè Jan. Si nou pa ka akwè-nou, nou ké bazé konsèy an nou asi Labib, nou ké palé ba moun èvè rèspé é nou ké aji èvè konpasyon èvè yo (Kol. 4:6).
SÉ ZANJ-LA ENMÉ MOUN KI ASI LATÈ
8. a) Kijan Lik 15:10 ka montré kè sé zanj-la enmé lézimen ? b) Kijan sé zanj-la ka édé-nou adan travay a prédikasyon-la ? (gadé imaj-la).
8 Sé zanj-la pa’a fè konsi sa ki ka pasé asi latè pa’a entérésé-yo, oben yo pa’a mèt an tèt a yo kè lézimen pa ni pon enpòwtans. Okontrè yo enmé lézimen. Lèwvwè on moun ki fè on péché ka rèpanti-y, oben kè on moun ki té lagé Jéova ka wouvin an 2 bra a-y, a pa ti kontan sé zanj-la ka kontan ! (li Lik 15:10). Anplisdisa, sé zanj-la ka soutyenn-nou onlo lè nou ka préché (Rév. 14:6). Menmsi yomenm a yo pa k’ay douvan pòt a moun pou préché, men yo pé gidé-nou owa sé moun-la ki anvi konnèt Jéova. Sé vré kè nou pé pa di kè sé on zanj ki gidé-nou owa tèl ou tèl moun, pas Jéova pé sèvi èvè diféran biten pou gidé-nou. Pa ègzanp, i pé sèvi èvè lèspri sen a-y pou édé sé moun-la ki anvi konnèt-li oben pou gidé-nou owa a yo (Akt 16:6, 7). Men souvantfwa, i ka sèvi èvè sé zanj-la. Lèwvwè nou ka préché bon nouvèl-la, sé zanj-la la pou soutyenn-nou (gadé ti karé-la « Bondyé tann priyè a yob »).
On frè é madanm a-y sòti fin fè prézantwa. Toupannan yo ka rantré akaz a yo, sè-la ka vwè on madanm ki ka sanm sa i tris toubònman. Sè-la ka sonjé kè sé zanj-la pé gidé-nou pou nou édé moun ki bizwen konnèt lavérité. Alò sa ka pousé-y palé ba madanm-la pou konsolé-y (gadé paragraf 8 la).
9. Sé zanj-la enmé lézimen. Kijan nou pé imité-yo ?
9 Sé zanj-la enmé lézimen. Kijan nou pé imité-yo ? Lèwvwè nou ka aprann kè on moun yo té woté adan lasanblé-la ka viré adan lasanblé-la, nou pé kontan toubònman menmjan ki sé zanj-la. An-nou akéyi moun-la ki viré la èvè onlo chalè é an-nou fè-y sav kè nou enmé-y (Lik 15:4-7 ; 2 Kor. 2:6-8). Nou ka imité sé zanj-la osi lèwvwè nou ka fè tousa nou pé pou nou préché bon nouvèl-la (Ékl. 11:6). É konm yo ka soutyenn-nou lè nou ka préché, sé konsa osi pou nou chèché a soutyenn frè é sè an nou lè yo ka préché. Pa ègzanp, ès nou pa té’é pé pwopozé on pwoklamatè ki pa ni onlo èkspéryans vin préché èvè nou ? Oben ès nou pa té’é pé édé on frè oben on sè ki ja ni on bèl laj oben ki enfim pou i pé sa préché li osi ?
10. Ka ègzanp a Sara ka aprann-nou ?
10 Men ka nou pé fè si sitiyasyon an nou pa’a pèwmèt-nou fè tousa nou té’é vé adan travay a prédikasyon-la ? Ében nou pé sèten kè menmsi sa ka rivé-nou, sé zanj-la ké toujou kontinyé édé-nou adan travay a prédikasyon-la. An-nou palé dè Sarac, on sè ki ka viv an End. I té pyonyé dépi 20 an apépré lèwvwè i tonbé malad. I touvé-y kouché adan kabann a-y é i pa menm té pé lévé. Odépa, sa kasé 2 bra a-y, é sa nòwmal. Men konm frè é sè a-y té ka soutyenn-li é kè i té pran labitid li Bib a-y touléjou, sa édé-y ni tchè-kontan kon avan. Nou ka tou konprann kè fò i té fè kò èvè sitiyasyon a-y. I pa té pé préché pa lèt pas i pa té pé rété sizé. Alò i préché pa téléfòn. I kriyé moun i té ja jwenn pou kontinyé sé ti kozé-la i té ja fè èvè yo la é sé moun-la ba-y niméwo a dòt moun kè Labib té’é pé entérésé. Ki rézilta sa bay ? Ében kèlkè mwa apré, sè-la touvé-y èvè 70 étid. Sè-la pa té pé fè tousa étid, alò i ba frè é sè a lasanblé a-y sèwten adan yo. Onlo adan étidyan a yo é onlo adan étidyan a sè-la ka vin réinyon jòdijou. Sèten sé zanj-la kontan kolaboré èvè frè é sè ki ka pòté bon mannèv pou préché kon Sara.
SÉ ZANJ-LA KA MONTRÉ KÈ YO NI ANDIRANS
11. Sé zanj-la ki fidèl la ka montré kè yo ni andirans é yo sé dé bèl ègzanp pou nou. Poukwa nou ka di sa ?
11 Sé zanj-la ki fidèl la ka montré yo ni andirans é yo sé dé bèl ègzanp pou nou toubònman. Sa ka fè lanné é lanné yo ka vwè enjistis é méchansté ki ni, é yomenm a yo ka sibi sa. Yo vwè Satan é onlo dòt zanj ki té ka sèvi Jéova ansanm èvè yo ba Jéova do (Jén. 3:1 ; 6:1, 2 ; Jid 6). Labib ka rakonté kè on zanj fidèl goumé èvè on zanj ki méchan pannan plizyè jou (Dan. 10:13). É finalman, dépi Adan é Èv, sé zanj-la vwè enki on ti krazi moun ki chwazi sèvi Jéova. Magré tousa, yo ka kontinyé sèvi Jéova èvè tchè-kontan é èvè onlo balan. Yo sav kè on jou Jéova ké fè tout enjistis disparèt.
12. Ka ki pé édé-nou andiré ?
12 Sé zanj-la ka andiré. Kijan nou pé imité-yo ? Kon sé zanj-la, pétèt nou ka vwè onlo biten ki enjis ki ka fèt oben pétèt kè moun bizwen anpéché-nou sèvi Jéova. Men kon sé zanj-la, nou sèten kè Jéova ké fè tout méchansté disparèt. Sé pousa, « an-nou pa arété fè sa ki bon » kon sé zanj-la (Gal. 6:9). Anplisdisa, Jéova pwomèt kè i ké édé-nou andiré (1 Kor. 10:13). An-nou mandé-y lèspri sen a-y. Grasa lèspri sen lasa, nou ké pé kontinyé pran pasyans é nou ké pé ni onlo jwa (Gal. 5:22 ; Kol. 1:11). É si janmen yo ka éséyé mèt baton an wou an nou pou anpéché-nou sèvi Jéova, an-nou fè Jéova konfyans a san pou san é an-nou pa lésé lapè pran lanmen asi nou. I ké soutyenn-nou é i ké toujou ban-nou fòs-la nou bizwen la (Ébr. 13:6).
SÉ ZANJ-LA KA FÈ ANSÒT POU LASANBLÉ-LA RÉTÉ PWÒP
13. Jéova ba sé zanj-la on travay enpòwtan a fè pannan sé dènyé jou-la. Ki travay ésa ? (Matyé 13:47-49).
13 Jéova ba sé zanj-la on travay a fè pannan sé dènyé jou-la, é travay-lasa enpòwtan (li Matyé 13:47-49). Grasa travay a prédikasyon-la, ni milyon é milyon moun ki ka vin konnèt bon nouvèl-la. Sèwten adan yo ka vin a lavérité men a pa yotout. Travay a sé zanj-la sé séparé moun ki méchan é moun ki jis. Alò fò-yo fè atansyon pou lasanblé-la rété pwòp. Sa pa vé di kè pé’é janmen ni pon pwoblèm adan lasanblé-la. Sa pa vé di nonplis kè sé moun-la ki arété vin réinyon pé’é jen wouvin owa Jéova. Men nou pé sèten kè sé zanj-la ka fè ansòt pou lasanblé-la rété pwòp.
14-15. Sé zanj-la ka fè ansòt pou lasanblé-la rété pwòp é yo ka fè sa èvè onlo balan. Kijan nou pé imité-yo ? (gadé sé imaj-la osi).
14 Sé zanj-la ka fè ansòt pou lasanblé-la rété pwòp é yo ka fè sa èvè onlo balan. Kijan nou pé imité-yo ? Pou nou fè sa, fò-nou travay rèd pou nou rété bon bon zanmi èvè Jéova. Pousa, nou ka chwazi zanmi an nou pawmi moun ki enmé-y é nou ka rété lwen a tousa ki té’é pé fébli lanmityé an nou èvè Jéova. Konsa, nou ka édé lasanblé-la rété pwòp (Sòm 101:3). Ondòt biten nou pé fè, sé édé frè é sè an nou a rété fidèl a Jéova. Pa ègzanp, ka pou nou fè si nou ka vin sav kè on frè oben on sè a lasanblé-la fè on péché ki grav ? Pas nou enmé moun-lasa, nou ké di-y kè fò i ay vwè sé ansyen-la pou palé ba yo. É si i pa fè-y, nou ké ay vwè-yo pou di-yo sa ki pasé. Nou vé pòté mannèv pou édé frè an nou oben sè an nou pas lanmityé a-y èvè Jéova andanjé (Jak 5:14, 15).
15 Malérèzman, ni sèwten moun ki ka fè dé péché ki grav, é sé frè-la oblijé woté-yo adan lasanblé-la. Labib ka di-nou kè fò-nou « arété frékanté » dé moun konsa é nou ka kouté komandman-lasad (1 Kor. 5:9-13). Lè yo ka woté on moun adan lasanblé-la, sa ka pèwmèt kè lasanblé-la rété pwòp. Anplisdisa, lèwvwè nou pa ka frékanté on moun yo woté adan lasanblé-la, nou ka aji èvè lanmou épi-y. Lèfètkè nou pa ka démòd asi sa, nou ka édé sé moun-la yo woté adan lasanblé-la woupran sans a yo. É lèwvwè yo ka wouvin an 2 bra a Jéova, nou ni tchè-kontan kon Jéova é kon sé zanj-la (Lik 15:7).
Siwvwè nou vin sav kè on frè oben on sè fè on péché ki grav, ka pou nou fèe ? (gadé paragraf 14 la).
16. Ki kalité sé zanj-la ni kè ou anvi imité ?
16 Jéova ka pèwmèt-nou konnèt déotwa biten asi sé zanj-la é i ka pèwmèt-nou kolaboré èvè yo. Mi on bèl lonnè mi ! An-nou imité imilité a yo, lanmou-la yo ni la pou lézimen, andirans a yo é an-nou ni balan kon yo pou fè ansòt pou lasanblé-la rété pwòp. Si nou imité sé zanj-la ki fidèl la, nou osi, nou ké pé fè pawti a fanmi a sèwvitè a Jéova pou touttan.
KANTIK 123 Fidèlement soumis à l’ordre théocratique
a Ni milyon é milyon zanj, men Labib ka bay non a 2 adan yo tousèl : Michèl é Gabriyèl (Dan. 12:1 ; Lik 1:19).
b Ou ké touvé dòt témwagnaj adan Index des publications des Témoins de Jéhovah. Pou sa, ay adan ribrik-la « Anges » é aprésa, ay adan « direction angélique (exemples) ».
c Yo chanjé non-lasa.
d Kon yo èspliké adan vidéo-la Komité santral la ka ban-nou nouvèl no 2 (2024), siwvwè on moun yo woté adan lasanblé-la ka wouvin réinyon, sé chak pwoklamatè ki ké chwazi si i ké di moun-lasa on ti bonjou toukout é kè i kontan vwè-y adan réinyon-la. Men i ké pran désizyon a-y annakò èvè konsyans a-y ki bazé asi Labib.
e SA NOU KA VWÈ ASI IMAJ-LA : On sè ka ankourajé on zanmi a-y ay palé ba sé ansyen-la. Kèlkètan apré, konm zanmi-la pa fè démawch-lasa, sè-la k’ay vwè sé ansyen-la pou di-yo tout biten-la.