Kijan Jéova ka édé-nou andiré

1. Poukwa nou pé ni dimal a andiré, é kimoun ki pé édé-nou ? (1 Pyè 5:10).

NOUTOUT ka jwenn diféran pwoblèm é délè nou pé ni dimal a andiré. Ni onlo adan nou ki malad dépi bon enpé lanné, ni dòt ki pèd on moun yo té enmé, é ni dòt aprézan, moun an fanmi a yo oben gouvènman-la ka pèwsékité-yo (Mat. 10:18, 36, 37). Men ou pé sèten kè kèlkèswa difikilté ou ka jwenn, Jéova pé édé-w andiré (li 1 Pyè 5:10).

2. Ka ki ka pèwmèt-nou andiré ?

² Lè nou ka andiré, nou ka kontinyé sèvi Jéova èvè jwa an tchè an nou, magré nou ka jwenn difikilté, magré yo ka pèwsékité-nou, oben magré nou douvan on tantasyon. Pou nou andiré, fò nou sèten kè biten-la ké vin pibon. Nou pé andiré enki pas Jéova ka ban-nou « puisans-la ki ka dépasé sa ki nòwmal » (2 Kor. 4:7). Adan awtik-lasa, nou ké vwè 4 biten Jéova ka ban-nou pou édé-nou andiré. Nou ké vwè osi ka nou pé fè pou nou bénéfisyé dè chak sé biten-lasa.

LAPRIYÈ

3. Poukwa nou pé di kè priyé Jéova sé on biten ki èstraòwdinè ?

³ Jéova ban-nou on biten ki èstraòwdinè é ki pé édé-nou andiré. Magré nou enpawfè, i ka pèwmèt-nou palé èvè-y é i ka kouté sa nou ka di (Ébr. 4:16). Réfléchi asi sa : nou pé priyé Jéova a nenpòt ki lè é nou pé palé èvè-y dè nenpòt ki biten. I ka konprann-nou kèlkèswa lang-la nou ka palé la, é i ka tann-nou kèlkèswa koté-la nou yé la. I pé tann-nou menmsi nou on koté ki lwen lwen lwen oben menmsi nou lajòl (Jonas 2:1, 2 ; Akt 16:25, 26). Délè nou pé touvé-nou tèlman angwasé kè nou pa sav kijan pou nou di Jéova sa nou ka rèsanti. A moman-lasa osi, Jéova ka konprann sa nou pa’a rivé di-y (Wom. 8:26, 27). Priyé Jéova, sé on biten ki vréman èstraòwdinè !

4. Kijan nou fè sav kè lè nou ka priyé Jéova pou i édé-nou andiré, sé on biten ki annakò èvè volonté a-y ?

⁴ Adan Labib, Jéova ka di-nou kè « kèlkèswa sa nou mandé-y, dépi sa annakò èvè volonté a-y, i ka kouté-nou » (1 Jan 5:14). Ès nou pé mandé Jéova édé-nou andiré ? Wi ! Lè nou ka fè sa, nou ka aji annakò èvè volonté a-y. Poukwa nou ka di sa ? Lè nou ka andiré magré sé éprèv-la, nou ka pèwmèt Jéova réponn Satan (Pwov. 27:11). Anplisdisa, Labib ka di kè Jéova « vlé itilizé fòs a-y pou i édé tout moun ki ka sèvi-y èvè tout tchè a yo » (2 Kron. 16:9). Kifè, nou pé sèten kè nonsèlman Jéova ni fòs-la ki fo la pou édé-nou, men anplisdisa i anvi édé-nou (Iz. 30:18 ; 41:10 ; Lik 11:13).

5. Lè nou ka priyé Jéova, kijan sa pé trankilizé-nou ? (Izayi 26:3).

⁵ Labib ka di kè lè nou ka palé Jéova dè sa ki ka enkyété-nou, ‘lapé ki ka vin dè Bondyé, ki ka dépasé tousa on moun pé konprann, ké pwotéjé tchè an nou é lèspri an nou’ (Filip. 4:7). Ni onlo moun ki pa ka sèvi Jéova ki ka jwenn éprèv. Yo ka éséyé fè diféran biten pou trankilizé-yo é pou édé-yo oubliyé pwoblèm a yo. Pa ègzanp ni sèwten moun ki ka fè sa yo ka kriyé méditation pou woté tout kalté lidé ki an tèt a yo. Men lè yo ka fè sa, sé démon-la pé rivé a jouwé an lèspri a yo. Sa danjéré toubònman (konparé èvè sa ki maké adan Matyé 12:43-45). Menmsi moun-la ka santi-y byen apré i fè sa, i pé’é jen pé ni lapé-la Jéova ka ban-nou la. Lè nou ka priyé Jéova nou ka montré-y kè nou ka fèfon asi-y, alò ‘i ka ban-nou lapé akontinyé’ (li Izayi 26:3). Jéova pé ban-nou lapé-lasa lèwvwè i ka édé-nou sonjé vèwsé ki ka konsolé-nou. Sé vèwsé-lasa ka fè-nou sonjé jan Jéova enmé-nou é jan i anvi édé-nou. Sa ka trankilizé-nou (Sòm 62:1, 2).

6. Dè ki biten ou pé palé adan priyè a-w ? (gadé imaj-la osi).

⁶ Sa ou pé fè : Lè ou anba difikilté ‘lagé sa ki two lou ba-w asi Jéova’ (Sòm 55:22). Mandé-y ba-w sajès pou-w sav ka pou-w fè (Pwov. 2:10, 11). Toupannan ou ka kontinyé sipliyé Jéova pou i édé-w andiré, pa oubliyé priyé-y osi pou di-y mèsi pou sa i ka fè ba-w (Filip. 4:6). Wouvè zyé a-w pou vwè tout ti biten i ka fè pou soutyenn-vou, é di-y mèsi pou sa. Pa lésé éprèv-la fè-w oubliyé tousa Jéova ja fè ba-w (Sòm 16:5, 6).

PAWÒL A BONDYÉ

7. Lè nou ka pran tan li é étidyé Labib, poukwa sa ka édé-nou andiré ?

⁷ Jéova ban-nou Pawòl a-y pou édé-nou andiré. Adan Labib, ou ka touvé onpakèt pasaj ki ka montré kè Jéova ké toujou soutyenn-nou. An-nou vwè on ègzanp. Matyé 6:8 ka di : « Pap’a zòt sav sa zò bizwen avan menm zò mandé-y li. » Sé Jézi ki di sé Pawòl-lasa é pa ni moun ki konnèt Jéova pibyen ki-y. Sa vé di kè Jéova toujou ka gadé pou vwè ka i pé fè pou édé-nou lè nou anba éprèv. Nou pé sèten sa a san pou san. Ou ka touvé dòt ti pasaj konsa adan Bib-la ki ka ba-w bon fòs pou-w pa lésé sé difikilté-la pran lanmen asi-w (Sòm 94:19).

8. a) Bay on prensip a Labib ki pé édé-nou andiré. b) Lè nou ké bizwen on prensip a Labib, ka ki ké édé-nou sonjé-y ?

⁸ Sé prensip-la ki an Bib-la pé édé-nou andiré osi. Sé konsèy-la i ka ban-nou la ka édé-nou pran bon désizyon (Pwov. 2:6, 7). Pa ègzanp, i ka di-nou pa enkyété-nou pou sa ki ké fèt dèmen, men fèfon asi Jéova chakjou (Mat. 6:34). Si nou ni labitid li Labib é médité asi-y touléjou, lè nou ké bizwen pran on désizyon oben janmbé on difikilté, sa ké pi fasil pou nou sonjé on vèwsé ki ké édé-nou.

9. Lè nou ka li Bib-la é kè nou ka vwè jan Jéova édé sèwvitè a-y, kijan sa ka aji asi nou ?

⁹ Adan Labib, ou ka touvé osi istwa a moun ki té kon nou. Yo té ka fè Jéova konfyans é Jéova soutyenn-yo (Ébr. 11:32-34 ; Jak 5:17). Lè nou ka pran tan réfléchi asi sé ègzanp-lasa, sa ka fè fwa an nou vin pi fò, é nou ka pi sèten ankò kè Jéova ké édé-nou osi. « Bondyé sé abri an nou é fòs an nou, on sèkou fasil a touvé lè nou an détrès » (Sòm 46:1). É lè nou ka sonjé kijan sèwvitè a Jéova montré kè yo té ni fwa adan-y, é jan yo kontinyé sèvi-y lè biten-la té rèd, sa ka ban-nou balan pou fè menmbiten (Jak 5:10, 11).

10. Ka ou pé fè pou Labib édé-w ?

¹⁰ Sa ou pé fè : Li Labib touléjou é maké sé vèwsé-la ou touvé la ki ké pé édé-w. Onlo frè é sè ka li tèks-di-jou-la lèmaten. Konsa, pannan rèstan a jouné-la, yo pé réfléchi asi on lidé ki ka ankourajé-yo. Sé sa on sè non a-y sé Mariea konstaté. Manman-y é pap’a-y té ni on kansè. Ka ki édé-y andiré lè i té ka pran swen a yo pannan sé dènyé mwa-la avan yo té mò la ? Mi sa i ka di : « Toulématen, an té ka li tèks-di-jou-la adan bwochi-la An-nou ègzaminé Lézékriti chakjou é an té ka kabéché asi-y. Konm an té ni labitid-lasa, sa édé-mwen konsantré-mwen asi Jéova é asi sé bèl biten-la i ka anségné-nou la, olyé an té konsantré-mwen asi pwoblèm an mwen (Sòm 61:2).

FRÈ É SÈ AN NOU

11. Lèfètkè nou sav kè a pa nou tousèl ki ka jwenn éprèv, poukwa sa ka ankourajé-nou ?

¹¹ Jéova ban-nou frè é sè an nou pou édé-nou andiré. Lèfètkè nou sav kè ‘tout frè an nou asi latè ka jwenn menm kalité soufrans ki nou’, nou sav nou pa tousèl (1 Pyè 5:9). Sa vé di kè kèlkèswa éprèv nou ka jwenn, frè é sè an nou jwenn difikilté ki ka sanm tan nou é yo rivé about a sé difikilté-lasa. Kifè nou osi nou pé rivé andiré difikilté an nou ! (Akt 14:22).

12. Kijan frè é sè an nou ka édé-nou, é ka nou pé fè ba yo osi ? (2 Korentyen 1:3, 4).

¹² Lè nou ka andiré, frè é sè an nou pé ankourajé-nou. Sé sa lapòt Pòl konstaté. Souvantfwa, adan sé lèt-la i maké la, i té ka nonmé non a frè é sè ki édé-y lè i pa té pé sòti akaz a-y é i té ka di-yo mèsi. Sé frè é sè lasa di dé biten ki té ka ankourajé Pòl é yo fè dé biten itil ba-y osi (Filip. 2:25, 29, 30 ; Kol. 4:10, 11). Sé menm biten jòdijou. Lè nou bizwen yo édé-nou, frè é sè an nou la ban nou, é lè sé yo ki bizwen nou soutyenn-yo, yo pé konté asi nou osi (li 2 Korentyen 1:3, 4).

13. Ka ki édé Maya andiré sitiyasyon-la i té ka jwenn la ?

¹³ Maya sé on sè ki ka rété an Risi. Sé frè é sè la ankourajé-y onlo. An 2020, lapolis vin fouyé kaz a-y é kèlkètan apré yo menné-y douvan tribinal pas i palé dòt moun dè kwayans a-y. Mi sa i ka di : « Pannan péryòd-lasa, an té las, an té angwasé é an té tris toubònman. Men frè é sè an mwen té ka kriyé-mwen, yo té ka voyé mésaj ban mwen é yo té ka voyé lèt ban mwen. Yo té ka di-mwen kè yo té enmé-mwen onlo […]. An té ja sav kè adan fanmi a Jéova ni lanmou, men lè an viv sa an 2020, an touvé-mwen pli sèten dè sa ankò. »

14. Ka nou pé fè pou frè é sè an nou édé-nou ? (gadé imaj-la osi).

¹⁴ Sa ou pé fè : Lè ou ka andiré éprèv, sa enpòwtan kè ou kontinyé frékanté frè é sè a-w. Pa pè mandé sé ansyen-la édé-w. Yo pé vin « on abri moun k’ay kaché lè i ni van, on koté ou pé ay paré lapli lè ni mové tan » (Iz. 32:2). Sonjé osi kè frè é sè a-w ka jwenn difikilté. Si ou ka édé ondòt moun ki andifikilté osi, ou ké kontan é sa ké édé-w andiré éprèv a-w (Akt 20:35).

ÈSPÉRANS AN NOU

15. Kijan èspérans-la Jézi té ni la édé-y andiré, é kijan èspérans an nou pé édé-nou andiré osi ? (Ébré 12:2).

¹⁵ Jéova ban-nou on bèl èspwa. É tèlman nou sèten kè sa i pwomèt-nou la ké fèt, sa ka édé-nou andiré jous a lafen (Wom. 15:13). Sonjé jan èspérans a Jézi édé-y andiré jou-la ki té pli rèd la adan vi a-y (li Ébré 12:2). I té sav kè si i té ka rété fidèl, i té’é montré kè tousa Satan té di asi Jéova sé té manti é kè Jéova mérité kè nou ba-y lonnè. I té présé viré owa Pap’a-y é i té présé gouvèné an syèl-la èvè sé 144 000 la lè lè-la té’é rivé. Menmjan-la, lè nou ka sonjé kè nou ké viv adan nouvo mond-la pou touttan, sa ka édé-nou andiré kèlkèswa difikilté-la nou pé rivé a jwenn la adan mond a Satan.

16. Kijan èspérans-la édé on sè andiré, é ka sa i di la ka aprann-vou ?

¹⁶ An-nou palé dè Annab, on sè ki ka rété an Risi. Grasa èspérans a-y, i ka vwè-y ka viv adan nouvo mond-la, é sa ka édé-y toubònman. Yo arété mari a-y é yo mèt mari-la lajòl annatandan i pasé douvan tribinal-la. Lè sa rivé, mi sa Anna di : « Lèfètkè an ka palé Jéova dè èspérans an mwen, é kè an ka médité asi bèl landèmen an nou, sa ka édé-mwen pou an pa lésé dékourajman-la pran lanmen asi mwen. An sav kè biten-la pé’é rété konsa toutlè. Jéova ké gangné lènmi a-y é i ké rékonpansé-nou. »

17. Kijan nou pé montré rèkonésans an nou pou èspérans-la Jéova ban-nou la ? (gadé imaj-la osi).

¹⁷ Sa ou pé fè : Pran tan a-w pou réfléchi asi bèl landèmen-la Jéova ka pwomèt-vou la. Imajiné jan ou ké yé adan nouvo mond-la èvè fanmi a-w é zanmi a-w ! Zò ké adoumanman ! Kifè, lè ou ké konparé sé éprèv-la ou ka jwenn la konnyéla èvè vi-la ou ké ni la adan paradi-la, ou ké touvé kè sé éprèv-lasa ‘sé té pou on ti moman é yo té léjè’ (2 Kor. 4:17). Ondòt biten ou pé fè, sé palé èvè dòt moun dè sa Bondyé ké fè pou dèmen. Éséyé imajiné jan lavi dwèt rèd pou sé moun-la ki pa konnèt pwomès a Bondyé. Menm on ti kozé èvè yo, pé ba-yo anvi konnèt plis biten asi Wayòm-la é asi sé pwomès-la Jéova fè la.

18. Poukwa nou pé sèten kè Jéova ké fè sa i pwomèt ?

¹⁸ Mi sa Jòb di Jéova apré i janmbé onpakèt éprèv : « Alèla, an sav kè ou pé fè tout biten é kè pa ni ayen adan sa ou vé fè ki enposib pou-w » (Jòb 42:2). Jòb konprann byen kè ayen pé pa anpéché Jéova fè sa i pwomèt. Lè nou ka sonjé sa osi, sa pé édé-nou andiré. An-nou pran ègzanp a on madanm ki malad dépi bon enpé tan. I dékourajé pas i ja pasé onpakèt dòktè é ponyonn pa réyisi fè ayen ba-y. Men onlè i ka jwenn on dòktè ki ka èspliké-y ègzaktèman ka ki ka rann-li malad, é kijan i ké pé swangné-y. Di-y dòktè-la di-y sa, madanm-la ja kontan, menmsi i po’o géri. Konnyéla, i sav kè onlè santé-la ké pibon, alò sa ka édé-y kenbé. Menmjan-la osi, konm nou sav Bondyé ké fè latè vin on paradi, sa ka ban-nou fòs pou nou andiré.

19. Ka nou bizwen pou nou pé sa andiré ?

¹⁹ Adan awtik-lasa, nou vwè kè Jéova ka édé-nou andiré éprèv nou ka jwenn grasa lapriyè, grasa Pawòl a-y, grasa frè é sè an nou, é grasa èspérans an nou. Si nou ka fè tousa nou pé pou nou sèvi èvè sé biten-lasa, Jéova ké édé-nou kèlkèswa sitiyasyon-la nou ka jwenn la. Kifè nou ké pé kontinyé andiré joustan Jéova fin bat èvè mond a Satan é joustan soufrans pé ké ègzisté ankò (Filip. 4:13).