Montré lézòt kè ou ka rèspèkté-yo

1. Poukwa noutout enmé lè yo ka rèspèkté-nou ? (Pwovèb 22:1).

KA OU ka rèsanti lèwvwè on moun ka rèspèkté-w ? Sèten sa ka fè-w plézi. Noutout nou bizwen kè lézòt rèspèkté-nou. Lèwvwè yo ka aji konsa èvè nou, nou ni tchè-kontan. Sé pousa Labib ka di : « Vométan moun rèspèkté-w, ki ou ni lajan é lò » ! (li Pwovèb 22:1).

2-3. Poukwa nou pé ni dimal a rèspèkté lézòt é ka nou ké vwè adan awtik-lasa ?

² Délè nou pé ni dimal a rèspèkté lézòt pas nou ka vwè défo a yo. Anplisdisa, ni onlo moun ki pa’a rèspèkté moun. Men nou dwètèt montré-nou diféran. Pou ki rézon ? Sé pas Jéova ka mandé-nou « onoré tout kalité moun » (1 Pyè 2:17).

³ Adan awtik-lasa, nou ké vwè ka sa vlé di montré lézòt kè nou ka rèspèkté-yo é kijan pou nou fè sa 1) èvè moun a fanmi an nou, 2) èvè frè é sè an nou é 3) èvè moun ki pa Témwen. É nou ké vwè kijan pou nou fè sa menm lè sa pa fasil.

KA SA VLÉ DI RÈSPÈKTÉ LÉZÒT ?

4. Ka sa vlé di rèspèkté lézòt ?

⁴ Si fò ou té èkspliké ka sa vlé di rèspèkté lézòt, ka ou té’é di ? « Rèspé » é « lonnè » sé 2 mo ki lyanné. Lè yo ka sèvi èvè lèmo « rèspé » sé pou palé dè jan ou ka vwè on moun. Lè nou ka rèspèkté on moun nou ka ba moun-lasa valè, pas moun-lasa ni bèl kalité, pas moun-lasa fè bon biten, oben parapòt a grad a-y. Lè yo ka sèvi èvè lèmo « lonnè » aprézan sé pou palé dè jan ou ka aji èvè on moun. Lè nou ka ba on moun lonnè, nou ka montré moun-la kè i ni valè ban nou, kè nou ka aprésyé-y é kè nou ni rèspé pou-y. Nou ka tou konprann kè pou nou montré on moun kè nou ka ba-y lonnè vréman, fò sa sòti an fon a tchè an nou (Mat. 15:8).

5. Ka ki pé édé-nou rèspèkté lézòt ?

⁵ Jéova vlé nou rèspèkté lézòt. Pa ègzanp, i ka di-nou rèspèkté sé « otorité-la » (Wom. 13:1, 7). Men ni sa ki pé di : « An dakò pou rèspèkté on moun, men fò moun-lasa mérité-y ! » Ès sé konsa pou nou vwè sa ? Awa ! A pa enki parapòt a jan on moun ka aji kè nou ka rèspèkté-y men sé pas Jéova vlé nou rèspèkté toutmoun é nou vlé fè-y plézi (Joz. 4:14 ; 1 Pyè 3:15).

6. Lè on moun pa ka rèspèkté-nou, ès nou pé rèspèkté-y ? (gadé imaj-la ki anlè po a jounal-la osi).

⁶ Men ni sa ki té’é pé mandé-yo : « É lè sé on moun ki pa’a rèspèkté lézòt, ès nou pé rèspèkté on moun konsa ? » An-nou vwè déotwa ègzanp ki ka montré kè sa posib. Wa Sayil fè gason a-y Jonatan wont douvan toutmoun (1 Sam. 20:30-34). Magrésa, Jonatan pa jen arété rèspèkté pap’a-y. Lè pap’a-y té k’ay goumé i toujou té la èvè-y é i fè sa tout vi a-y (Ègz. 20:12 ; 2 Sam. 1:23). Éli gran prèt-la di Àn kè i té sou (1 Sam. 1:12-14). Anplisdisa, tout pèp-la té sav kè gason a Éli té ka mal aji é kè nòwmalman Éli té dwèt korijé-yo. Men Éli pa té ka fè ayen alòskè sé-y ki té pap’a yo é ki té gran prèt-la. Magré tousa, Àn palé ba Éli èvè onlo rèspé (1 Sam. 1:15-18 ; 2:22-24). Lè Pòl té Atèn, déotwa nonm di kè i té on « rara » (Akt 17:18). Magrésa, lapòt Pòl palé ba yo èvè rèspé (Akt 17:22). Sé ègzanp-lasa ka montré kè si nou enmé Jéova fò é si nou pa vlé fè-y lapenn, nou ké rèspèkté lézòt ki sa fasil ki sa pa fasil. Konnyéla an-nou vwè kimoun ki mérité nou rèspèkté-yo é poukwa fò nou fè sa.

MONTRÉ OU NI RÈSPÉ POU MOUN AN FANMI A-W

7. Poukwa nou pé ni dimal a rèspèkté moun ki an fanmi an nou ?

⁷ Poukwa délè sa rèd ? Nou ka pasé onlo tan èvè fanmi an nou, alò nou konnèt bèl kalité a chakmoun men nou konnèt osi tout ti défo a yo. Pétèt kè nou ka okipé dè on fanmi an nou ki malad oben ki angwasé é a pa toutlè i janti èvè nou, kifè sa pa fasil. Pétèt ni moun an fanmi an nou ki ka di-nou bétiz oben ki ka fè-nou dé biten ki ka fè-nou mal. Alòskè nòwmalman lè nou èvè fanmi an nou nou té dwèt ka santi-nou byen, délè yonn pa’a rèspèkté lòt, kifè ka ni babyé é sa ka mèt pwoblèm an fanmi-la. Nou pé konparé fanmi-la èvè kò an nou. Délè lè nou ni awtwòz, kò an nou pa ka fonksyonné kon pou i té fonksyonné. Menmjan-la, lè yonn pa’a rèspèkté lòt adan fanmi-la, yonn pa’a viv byen èvè lòt. Pétèt nou pé pa fè granzafè pou awtwòz-la, pawkont ni mwayen yonn aprann rèspèkté lòt an fanmi-la.

8. Poukwa sa enpòwtan kè nou rèspèkté moun an fanmi an nou ? (1 Timoté 5:4, 8).

⁸ Poukwa fò nou rèspèkté moun an fanmi an nou ? (li 1 Timoté 5:4, 8). Adan prèmyé lèt-la Pòl maké ba Timoté, i ka èspliké kè adan on fanmi yonn dwèt pran swen a lòt. Men i ka èspliké osi kè si nou ka fè sa, a pa enki pas nou dwètèt fè-y, men sé osi pou fè Jéova plézi. Sé Jéova ki kréyé fanmi-la (Éféz. 3:14, 15). Kifè lè nou ka rèspèkté fanmi an nou, sé Jéova nou ka rèspèkté. Ès a pa on bon rézon pou nou rèspèkté moun an fanmi an nou ?

9. Kijan on mari é madanm a-y pé montré kè yonn ka rèspèkté lòt ? (gadé sé imaj-la osi).

⁹ Kijan pou nou montré nou ni rèspé pou moun an fanmi an nou. On mari ki ka rèspèkté madanm a-y ka montré kè madanm a-y ni onlo valè. I ka fè sa ki lè yo a 2 ki lè yo èvè dòt moun (Pwov. 31:28 ; 1 Pyè 3:7). I pa jen ka lévé men asi-y, i pa jen ka fè-y wont é i pa jen ka fè-y santi kè i pa vo ayen. Ariela sé on frè ki ka rété an Awjantin. Mi sa i ka di : « Madanm an mwen malad é délè maladi-la ka fè-y di dé biten ki pa janti. Lè sa ka rivé, an ka di-mwen kè i pa’a pansé sa i ka di, é an ka sonjé 1 Korentyen 13:5 ki ka édé-mwen palé ba-y èvè onlo rèspé é sa ka édé-mwen pa fè kòlè » (Pwov. 19:11). É sé madanm-la aprézan ? Kijan yo pé montré kè yo ka rèspèkté mari a yo ? On madanm pé montré kè i ka rèspèkté mari a-y lèwvwè i ka palé anbyen dè mari a-y (Éféz. 5:33). I pa’a jen ka di-y vyé pawòl pou kritiké-y, i pa’a jen ka fè jé èvè tèt a-y é i pa’a jen ka jiré-y. I sav kè si i ka fè sa, sé détwi i ké détwi mayé a-y (Pwov. 14:1). On sè ki ka rété an Itali mayé èvè on frè ki toujou angwasé pas sé maladi a-y ki konsa. Mi sa i ka di : « Délè, an ni lenprésyon mari an mwen ka enkyété-y pou ayen. Avan, sa an té ka di té ka montré kè an pa té ka rèspèkté-y é asi figi an mwen ou té ka vwè sa osi. Men an konstaté kè pi an ka pasé tan èvè moun ki ka palé dè moun anbyen, pi sa ka édé-mwen montré mari an mwen kè an ka rèspèkté-y. »

10. Kijan sé timoun-la pé montré kè yo ka rèspèkté fanmi a yo ?

¹⁰ Si ou sé on jenn é kè fanmi a-w ka mandé-w fè sèwten biten oben pa fè sèwten biten, fò ou obéyi (Éféz. 6:1-3). Palé ba fanmi a-w èvè onlo rèspé (Ègz. 21:17). Fò ou sonjé kè pi yo ké pran laj pi yo ké bizwen ou édé-yo. Alò fè tousa ou pé pou édé-yo. An-nou vwè ègzanp a María, on sè pap’a-y pa Témwen. Pap’a-y touvé-y malad é fò i té okipé dè-y. Men papa-la pa té janti ditou-ditou èvè-y. Mi sa i ka sonjé : « An té ka mandé Jéova nonsèlman pou i édé-mwen rèspèkté pap’an mwen, men pou pap’an mwen santi kè an té ka rèspèkté-y osi. An té ka di-mwen kè si Jéova ka mandé-mwen rèspèkté fanmi an mwen, i ké ban-mwen fòs pou an fè-y. Piti-a-piti an konprann kè an pa bizwen atann papa chanjé pou montré-y kè an ka rèspèkté-y. » Lè nou ka rèspèkté fanmi an nou magré yo ni défo a yo, nou ka montré nou ka rèspèkté Jéova pas sé-y ki kréyé fanmi-la.

MONTRÉ OU NI RÈSPÉ POU FRÈ É SÈ A-W

11. Poukwa nou pé ni dimal a rèspèkté on frè oben on sè ?

¹¹ Poukwa délè sa rèd ? Frè é sè an nou ka mèt sa Labib ka di an pratik. Men sa pé rivé kè yo aji èvè nou on mannyè ki pa janti, sa pé rivé kè yo mal jijé-nou, oben yo pé fè on biten ki ka énèrvé-nou. Men si nou ni a ‘plenn-nou’ parapòt a on frè oben on sè, pétèt nou ké ni dimal a montré nou ka rèspèkté-y (Kol. 3:13). Ka ki pé édé-nou ?

12. Poukwa sa enpòwtan kè nou rèspèkté frè é sè an nou ? (2 Pyè 2:9-12).

¹² Poukwa fò nou rèspèkté frè é sè an nou ? (li 2 Pyè 2:9-12). Adan dézyèm lèt a-y, Pyè palé dè sèwten frè é sè ki té adan lasanblé-la o 1^é syèk é ki té ka malpalé sé ansyen-la. Kijan sé zanj-la ki fidèl la réyaji lè yo vwè sa ki té ka fèt ? Konm yo té ka rèspèkté Jéova, yo pa di pon vyé biten asi sé krétyen-lasa. Ou ka rann-vou kont ! Sé zanj-la pawfé, magrésa yo pa jen malpalé sé nonm-lasa ki té ka akwè-yo. Yo lésé Jéova jijé-yo é korijé-yo (Wom. 14:10-12 ; konparé èvè sa ki maké adan Jid 9). Ka ègzanp a sé zanj-la ka aprann-nou ? Si fò pa nou dérèspèkté moun ki ka pèwsékité-nou, jijé frè é sè an nou ki enmé Jéova ! ‘Fò nou toujou prèmyé douvan lè sé pou nou ba lézòt lonnè’ (Wom. 12:10). Lè nou ka fè sa, nou ka montré nou ka rèspèkté Jéova.

13-14. Kijan nou pé montré nou ni rèspé pou sé moun-la ki adan lasanblé an nou ? Bay on ègzanp (gadé sé imaj-la osi).

¹³ Kijan pou nou montré nou ni rèspé pou frè é sè an nou. Si ou ansyen, lè ou ka anségné lézòt, fè éfò pou-w toujou fè-y èvè lanmou (Filém. 8, 9). É lè ou ka ba on moun on konsèy, fè ansòt pou fè sa èvè jantiyès olyé ou fè sa lè ou kòlè. Si ou sé on sè, ou pé fè ansòt pou yonn rèspèkté lòt adan lasanblé-la si ou pa’a kouté kankan é si ou pa’a fè-yo monté é désann adan lasanblé-la nonplis (Tit 2:3-5). Nou pé montré sé ansyen-la kè nou ka rèspèkté-yo lèwvwè nou ka kolaboré èvè yo é kè nou ka di-yo jan nou kontan tout bèl travay-la yo ka fè la. Yo ka travay rèd pou dirijé sé réinyon-la, pou òwganizé prédikasyon-la é pou édé moun ki fè « on fo-pa » (Gal. 6:1 ; 1 Tim. 5:17).

¹⁴ On sè non a-y sé Rocío, té ni dimal a rèspèkté on ansyen ki té ba-y on konsèy. Mi sa i ka di : « An té ka touvé kè i té palé rèd ban mwen. Lè an té akaz an té ka kritiké-y. An fon a tchè an mwen an té ka pansé kè i pa té vlé édé-mwen vréman men an pa té ka montré sa, é an pa té ka suiv konsèy a-y nonplis. » Ka ki édé Rocío ? Mi sa i ka èspliké : « Pannan an té ka li Labib, an tonbé asi 1 Tésalonisyen 5:12, 13. An rann-mwen kont kè an pa té ka rèspèkté frè-la, é konsyans an mwen koumansé bat-mwen. An priyé Jéova é an fè rèchèwch adan piblikasyon an nou pou an touvé konsèy ki té’é édé-mwen chanjé. An fin pa konprann kè pwoblèm-la a pa té frè-la, men sé té mwen, pas an té ni òwgèy. Alè, an ka rann-mwen kont kè fò ou ni imilité pou ou rèspèkté lézòt. Menmsi an ni éfò a fè toujou, an sav kè Jéova kontan tout éfò an ka fè, pas an ka travay pou montré an ni rèspé pou lézòt. »

MONTRÉ OU NI RÈSPÉ POU MOUN KI PA TÉMWEN A JÉOVA

15. Poukwa nou pé ni dimal a rèspèkté sèwten moun ki pa Témwen a Jéova ?

¹⁵ Poukwa délè sa rèd ? Lè nou ka préché, nou ka jwenn moun ki pa ka okipé ni dè Bondyé ni dè Labib (Éféz. 4:18). Ni sa ki vé pa kouté mésaj an nou pas dépi yo piti sé ondòt biten yo anségné-yo. Délè kanmarad-lékòl an nou oben kolèg-travay an nou rèd èvè nou. Délè, sé patwon an nou ki pa jen kontan travay an nou. Kifè nou pé ni dimal a rèspèkté dé moun konsa é a montré-nou janti èvè yo.

16. Poukwa fò nou rèspèkté moun ki po’o ka sèvi Jéova ? (1 Pyè 2:12 ; 3:15).

¹⁶ Poukwa fò nou rèspèkté moun ki pa Témwen a Jéova ? Sonjé kè Jéova ka gadé jan nou ka aji èvè moun ki po’o ka sèvi-y. Lapòt Pyè di sé krétyen-la kè si yo ka aji byen, sa pé ba sèwten moun anvi « ba Bondyé glwa ». Sé pousa, i di-yo kè lè yo ka défann fwa a yo, fò yo fè sa « èvè dousè é èvè onlo rèspé » (li 1 Pyè 2:12 ; 3:15). Ki yo ka èspliké kwayans a yo douvan tribinal ki yo ka èspliké on moun kwayans a yo, sé krétyen-la toujou ka aji èvè rèspé. An-nou pa jen oubliyé kè Jéova ka gadé-nou, i ka kouté sa nou ka di é i ka fè atansyon a jan-la nou ka di-y la osi. Mi on bon rézon pou nou rèspèkté moun ki po’o ka sèvi Jéova !

17. Kijan nou pé montré moun ki pa Témwen a Jéova kè nou ka rèspèkté-yo ?

¹⁷ Kijan pou nou montré nou ni rèspé pou moun ki pa Témwen a Jéova. Lè nou ka préché, nou pa vlé ba ponmoun lenprésyon kè nou ka méprizé-yo pas yo pa konnèt granzafè asi Labib. Olyé dè sa, nou vlé sonjé kè yo ni onlo valè pou Bondyé é nou vlé vwè lézòt kon moun ki ni plis valè ki nou (Ajé 2:7 ; Filip. 2:3). Si on moun ka di-w bétiz parapòt a kwayans a-w, pa réponn-li chou-pou-chou. Sa pa té’é byen nonplis si ou té ka di moun-la dé biten ki ka ba-y lenprésyon kè vou ou entélijan é kè li aprézan i sé on tèbè (1 Pyè 2:23). Si ou di on moun on biten ki pa dwètèt, mandé moun-la padon tousuit. É adan travay a-w, kijan ou pé aji èvè rèspé ? Ou pé fè sa lè ou ka travay rèd é lè ou ka éséyé gadé bèl kalité a kolèg-travay a-w é moun ou ka travay ba yo (Tit 2:9, 10). Lè ou karé an zafè a-w é kè ou ka travay rèd, ou ka fè Jéova plézi ki yo enmé-w ki yo pa enmé-w (Kol. 3:22, 23).

18. Poukwa sa enpòwtan nou rèspèkté toutmoun ?

¹⁸ Nou ni onlo rézon pou nou rèspèkté lézòt. Nou vwè kè lè nou ka rèspèkté moun ki an fanmi an nou, nou ka rèspèkté Jéova ki kréyé fanmi-la. Menmjan-la, lè nou ka rèspèkté frè é sè an nou, sé Jéova nou ka rèspèkté osi. É lè nou ka rèspèkté moun ki pa’a sèvi Jéova, sa ka ba-yo lokazyon ba Jéova lonnè. Menmsi ni moun ki pa’a rèspèkté-nou, sa vo lapenn kè nou rèspèkté-yo. Pou ki rézon ? Sé pas Jéova ké béni-nou. Mi sa i ka pwomèt-nou : « Moun ki ka onoré-mwen, an ké onoré-yo » (1 Sam. 2:30).