Jéova sé sila ki ka ban-nou « jwa a débòdé »

1-2. a) Ki difikilté onlo moun ka jwenn jòdijou ? b) Ka nou ké vwè adan awtik-lasa ?

ONLO moun ka fè tousa yo pé pou yo pé sa ni tchè-kontan. Men magré tousa yo ka fè, yo pa’a rivé ni tchè-kontan. Okontrè yo ka santi-yo tris tris tris, é yo ni lenprésyon sitiyasyon a yo pé’é jen chanjé. Menm sèwvitè a Jéova pé rèsanti menm biten-la. Konm nou ka viv pannan « sé dènyé jou-la » nou pé jwenn difikilté ki pé istrésé-nou oben ki pé mèt tristès an tchè an nou (2 Tim. 3:1).

² Adan awtik-lasa nou ké vwè ki biten ki pé fè-nou pèd jwa an nou é si nou pèd-li ka nou pé fè pou nou ni tchè-kontan kon avan. Men pou nou koumansé, an-nou vwè kimoun ki pé ban-nou tchè-kontan poudèbon.

OWA KIMOUN JWA-LA KA SÒTI ?

3. Lè nou ka gadé sa Jéova kréyé, ka sa ka aprann-nou asi-y ? (gadé sé imaj-la osi).

³ Jéova toujou ni tchè-kontan é i anvi nou ni tchè-kontan osi. Sé pousa i fè onpakèt biten ki ka ban-nou onlo jwa. Pa ègzanp, lè nou ka vwè jan planèt an nou bèl, lè nou ka vwè tout sé bèl koulè-la ki ka ègzisté la, é lè nou ka vwè zannimo ka soté-maté pou yo jouwé, nou kontan. É kanta lè nou ka manjé manjé-la nou pi enmé la, pa menm palé ! Jéova enmé-nou toubònman é i anvi nou bwè dlo an nou.

Tiéléfan : Image © Romi Gamit/Shutterstock ; tipengwen : Vladimir Seliverstov/500px via Getty Images ; tikabrit : Rita Kochmarjova/stock.adobe.com ; dofen : georgeclerk/E+ via Getty Images

4. a) Poukwa Jéova ni tchè-kontan magré i ka vwè moun ka soufè ? b) Kijan Jéova ka édé-nou ? (Sòm 16:11).

⁴ Menmsi Jéova sé « Dyé-la tchè a-y kontan la », i sav kè onlo moun ka jwenn penn é péripési é ka soufè (1 Tim. 1:11). Men i pa ka lésé sa anpéché-y ni lakontantman. I sav kè sé soufrans-la sé pou on moman pas sé-y menm ki désidé kitan yo ké fin. A moman-lasa, pé’é ni pon kalté soufrans ankò é pon kalté biten pé’é fè-nou pléré ankò. Annatandan, i ka pran penn an nou é i anvi édé-nou. Kijan i ka fè sa ? I ka édé-nou ni lakontantman (li Sòm 16:11). An-nou vwè kijan i édé Gason a-y Jézi ni jwa an tchè a-y.

5-6. Poukwa Jézi ni tchè-kontan ?

⁵ Pawmi tout sé moun-la Jéova kréyé la, Jézi sé tala ki pi kontan la. Pou ki rézon ? An-nou vwè 2 adan yo : 1) « I sé pòtré a Dyé-la ou pé pa vwè la » sa vé di kè konm i kon Pap’a-y, li osi i ni tchè-kontan (Kol. 1:15 ; 1 Tim. 6:15). 2) Sé koté Jéova jwa-la ka sòti, é pa ni moun ki pasé plis tan èvè Jéova ki Jézi.

⁶ Fè sa Jéova ka mandé, sé on plézi pou Jézi (Pwov. 8:30, 31 ; Jan 8:29). Sé pousa Jéova kontan-y toubònman (Mat. 3:17).

7. Ka ki ké ban-nou lakontantman ?

⁷ Nou osi nou pé ni lakontantman si nou ka kontinyé aprann plis biten asi Jéova. Pi nou ké kontinyé fè sa é kè nou ké imité-y, pi nou ké kontan. Lè nou ka fè sa i ka mandé é kè nou sav i kontan nou, sa ka mèt jwa an tchè an noua (Sòm 33:12). Men vinvwè nou on ti jan tris oben nou pèd jwa an nou, ès sa vé di kè Jéova pa kontan nou ankò ? Awa ! Jéova sav kè adan mond-lasa, délè nou pé santi-nou tris é délè sa pé rivé kè nou soufè (Sòm 103:14). An-nou vwè ka ki pé fè-nou pèd jwa an nou é si nou pèd-li ka nou pé fè pou nou ni tchè-kontan kon avan.

PA LÉSÉ AYEN FÈ-W PÈD JWA A-W

8. Kijan sé pwoblèm-la nou ka jwenn la pé aji asi nou ?

⁸ 1) Pwoblèm ou ka jwenn adan vi a-w. Ès yo ka pèwsékité-w pas ou ka adoré Jéova ? Ès on katastwòf natirèl fèt koté-la ou ka rété la ? Ès ou ka soufè pas ou pa ni lajan, pas ou malad oben pas kò-la ka désann akòz dè laj-la ? Lè nou ka jwenn dé pwoblèm konsa, sa pé fè-nou pèd jwa an nou siwtou si nou pé pa fè ayen pou anpéché sa. Labib ka di kè « lè on moun tris sa ka dékourajé-y » (Pwov. 15:13). An 4 an on frè pèd plizyè moun an fanmi a-y. I pèd sèl frè-la i té ni la, manman-y é pap’a-y. Mi sa i ka di : « An pa jen té ni tan ni pou frè an mwen ni pou fanmi an mwen é sa té ka fann tchè an mwen. Yo ni tan mò é an té ka santi-mwen tousèl. An té ni lenprésyon kè ponmoun pa té pé édé-mwen. » Menmjan-la, akòz dè sé pwoblèm-la nou ka jwenn la, nou pé santi-nou las é sa pé kasé 2 bra an nou.

9. Ka ki pé édé-nou ni tchè-kontan kon avan ? (Jérémi 29:4-7, 10).

⁹ Ka ki pé édé-nou ni tchè-kontan kon avan ? Nou ké pli kontan si nou arété tèwbolizé lèspri an nou parapòt a dé biten kè nou pé pa chanjé, é si nou ni rèkonésans pou sé biten-la nou ni la. Labib ka di kè nou pé ni lakontantman menmsi vi an nou pa ègzaktèman kon nou té’é vlé. Pa ègzanp, Jéova té di pèp a-y ki té Babilòn kè fò yo té fè tousa yo té pé pou yo té aksèpté sitiyasyon a yo (li Jérémi 29:4-7, 10). Ka sa ka aprann-nou ? Fè éfò pou aksèpté sitiyasyon a-w é montré ou ni rèkonésans pou bèl biten ou ni adan vi a-w. Sonjé kè Jéova pé’é jen lagé-w (Sòm 63:7 ; 146:5). On sè non a-y sé Effie fè on aksidan é i té blésé bon blésé-la kifè i pa té pé maché ankò. Mi sa i ka di : « Jéova, fanmi an mwen é lasanblé-la édé-mwen é ankourajé-mwen onlo. Konm an vé montré-yo rèkonésans an mwen, an ka fè tousa an pé pou an ni tchè-kontan. »

10. Poukwa nou pé ni tchè-kontan menmsi nou ka jwenn difikilté ?

¹⁰ Menmsi nou ka jwenn pwoblèm oben sé fanmi an nou ki ka jwenn pwoblèm, nou pé ni tchè-kontan kanmenmb (Sòm 126:5). Poukwasa ? Sé pas a pa sitiyasyon an nou ki ka fè si nou ni lakontantman. Mi sa on pyonyé non a-y sé Maria ka di : « Lè nou ni pwoblèm, nou ni tchè-kontan kanmenm pas nou ka sonjé sa Jéova pwomèt-nou. Sa vé pa di kè nou pa jen ka pléré oben kè nou ka mèt sa nou ka rèsanti akoté. Men Pap’an nou Jéova ka mèt jwa an tchè an nou kèlkèswa sa nou ka viv. » Kèlkèswa fòs a pwoblèm-la nou ka jwenn la, sé pou on ti moman. Sé konsi sé pwoblèm-la sé tras a on moun ki ka maché an sab-la. Talè, nou pé’é ka vwè-yo ankò, disparèt ké pran yo.

11. Kijan ègzanp a Pòl pé ankourajé-w ?

¹¹ Délè nou pé rivé a pansé kè si nou ni tousa pwoblèm sé pas Jéova pa kontan-nou ankò. A moman-lasa, on biten ki pé édé-nou, sé sonjé sèwvitè a Jéova an tan lontan ki viv dé biten ki té vréman rèd. An-nou vwè ègzanp a lapòt Pòl. Sé Jézi limenm ki chwazi-y pou i té préché bon nouvèl-la « ba sé wa-la, ba sé Israélit-la é ba sé nasyon-la » (Akt 9:15). Mi on bèl lonnè mi ! Men apapousa Pòl pa jwenn difikilté (2 Kor. 11:23-27). Ès pas i jwenn bout-rèd sa té vé di kè Jéova té lagé-y ? Anponjan ! Okontrè, lèfètkè i té ka rivé andiré, sa té ka montré kè Jéova té ka soutyenn-li (Wom. 5:3-5). Alè réfléchi asi sitiyasyon a-w. Magré sé éprèv-la ou ka jwenn la, ou pa’a lagé. Alò vou osi ou pé sèten kè Jéova ka soutyenn-vou é kè ou ka fè-y plézi.

12. Lè ou pé pa atenn sé òbjèktif-la ou té ni la kijan sa pé fè-w pèd jwa a-w ?

¹² 2) Lè ou pé pa atenn sé òbjèktif-la ou té ni la (Pwov. 13:12). Nou enmé Jéova, é nou ni onlo rèkonésans pou tousa i ka fè ban nou. Alò nou ka éséyé fè tousa nou pé pou nou fè-y plézi. Délè nou anvi fè sèwten biten, men konm nou ka pann chapo an nou two ho, nou pa’a rivé fè sé biten-lasa é sa pé dékourajé-nou (Pwov. 17:22). Mi sa on pyonyé non a-y sé Holly ka di : « An té anvi fè Lékòl pou évanjélizatè a Wayòm-la, ay préché adan ondòt péyi oben ay travay asi chantyé a Ramapo. Men sitiyasyon an mwen chanjé é an pa té pé fè ponyonn adan sé biten-lasa. Sa désèvwa-mwen toubònman. » Onlo sèwvitè a Jéova ka rèsanti menm biten-la.

13. Bay déotwa biten nou pé fè kèlkèswa sitiyasyon an nou.

¹³ Ka ki pé édé-nou ni tchè-kontan kon avan ? On biten pou nou sonjé sé kè Jéova pa ka fòsé kad an nou. Pou Jéova, nou ni valè menmsi nou pa’a rivé fè sa lézòt ka fè. Alò i vé kè nou rèkonnèt limit an nou é kè nou rété fidèl a-y (Mich. 6:8 ; 1 Kor. 4:2). Sa i ka gadé, a pa sa nou ka rivé fè men sé sa ki an tchè an nou. Alò fò pa nou pann chapo an nou two hoc. Olyé ou chèché a fè dé biten kè ou pé’é rivé fè, vométan ou chwazi sèwten òbjèktif ou ké pé atenn. Pétèt ou pé pran on jenn anba zèl a-w pou-w fòwmé-y oben ou pé ankourajé frè é sè ki ja ni on bèl laj. Ka ou di ? Pétèt ou pé chwazi on moun kè ou pé ankourajé. Swa ou pé ay akaz a-y, swa ou pé kriyé-y oben swa ou pé voyé on mésaj ba-y. Si ou ka chwazi òbjèktif konsa kè ou pé atenn, Jéova ké béni-w é i ké mèt jwa an tchè a-w. On biten pou-w sonjé osi sé kè talè, adan nouvo mond-la, a pa ti biten nou ké pé fè pou sèvi Jéova ! Nou pa menm pé imajiné sa ! Sé sa ki ankourajé Holly. Mi sa i ka di : « Lè an dékourajé, an ka sonjé kè onlè an ké viv pou touttan adan nouvo mond-la é Jéova ké édé-mwen fè tousa an vé fè pou-y. »

14. Ki dòt biten ki pé fè-nou pèd jwa an nou ?

¹⁴ 3) Kouri dèyè anmizman. Asi entèwnèt nou ka vwè moun ki ka sanm sa yo kontan pas yo ka pwofité dè lavi afon. Nou pé koumansé kwè kè pou nou ni lakontantman fò nou fè sa nou anvi, fò nou achté tousa nou vlé, é fò nou vwayajé toupatou. Sé biten-lasa a pa dé biten ki mové. Jéova vlé kè nou pwofité dè sé bèl biten-la i kréyé la. Men onlo moun konstaté kè lè yo té ka kouri dèyè anmizman, olyé sa mèt jwa an tchè a yo sa té ka fè-yo pèd jwa a yo. Mi sa Eva, on sè ki pyonyé ka di : « Lè sèl biten ki an tèt a-w sé kouri dèyè anmizman, ou pa’a jen las kouri dèyè sa. » Si nou toujou ka chèché a fè-nou plézi sa ké désèvwa-nou é nou ké pèd jwa an nou.

15. Ka ègzanp a wa Salomon ka aprann-nou ?

¹⁵ Wa Salomon éséyé fè diféran biten pou vwè si sa té’é mèt jwa an tchè a-y. Pa ègzanp, i manjé diféran kalté manjé, i kouté dè bèl ti mizik, é i achté dé biten ki ka kouté chè. Men apapousa i té ni tchè-kontan. Mi sa i di : « Zyé-la pa jen las gadé é zòrèy-la pa jen las tann » (Ékl. 1:8 ; 2:1-11). Onlo moun ka pansé kè si yo ni lajan é si yo ka fè tousa yo vé yo ké ni lakontantman. Men sa pa vré ! Sé biten-lasa pé’é jen pé ban-nou lakontantman.

16. Poukwa nou ka di kè lè nou ka édé lézòt nou pé ni tchè-kontan kon avan ? (gadé sé imaj-la osi).

¹⁶ Ka nou pé fè pou nou ni tchè-kontan kon avan ? Jézi anségné kè « on moun ka pli kontan lè i ka bay ki lè i ka rèsèvwa » (Akt 20:35). Mi sa on ansyen non a-y sé Alekos ka di : « An ka éséyé fè dé ti biten pou lézòt. Lè an ka fè sa, an ka konsantré-mwen asi lézòt olyé an konsantré-mwen asi mwenmenm. É pli an ka fè sa pli an ni tchè-kontan. » Ka ou pé fè pou édé lézòt ? Si ou ka vwè kè on moun tris, ay palé ba-y pou ankourajé-y. Pétèt ou pé’é pé rézoud pwoblèm a-y, men ou pé pran tan kouté-y é ou pé éséyé konprann sa i ka viv. Ou pé di-y osi kè sa ki two lou ba-y i pé lagé-y asi Jéova (Sòm 55:22 ; 68:19). Ou pé fè-y sonjé kè Jéova pa lagé-y (Sòm 37:28 ; Iz. 59:1). Anplisdisa, ou pé fè on biten itil ba-y. Pa ègzanp, ou pé fè on ti manjé ba-y, oben ay fè on ti ponmlé èvè-y. Ou pé di-y an-nou préché èvè-w osi, konsa sa ké ba-y tibwen fòs. Lésé Jéova itilizé-w pou ankourajé lézòt. Lè nou ka sèvi èvè tan an nou pou nou édé dòt moun, nou ka ni lakontantman (Pwov. 11:25).

17. Si nou vlé ni lakontantman, ka pou nou fè ? (Sòm 43:4).

¹⁷ Nou pé ni lakontantman si nou ka kontinyé aprann konnèt Jéova pibyen é si nou ka kontinyé fè-y plézi. Labib ka pwomèt-nou kè Jéova ké ‘ban-nou jwa a débòdé’ (li Sòm 43:4). Alò menm lèwvwè nou ni pwoblèm, fò pa nou lésé sa tèwbolizé lèspri an nou. Si Jéova sé méyè zanmi an nou, nou ké ni tchè-kontan pou touttan ! (Sòm 144:15).