«  Ou sé on moun ki ni onlo valè » !

1-2. Kijan nou pé sèten nou ni onlo valè pou Jéova ?

JÉOVA enmé sèwvitè a-y onlo. Men kanmenmsa, ni sèwten adan yo ki ka santi kè yo pa ni valè. Pétèt yo ka santi-yo konsa pas ni moun ki fè-yo vwè mizè. Ès sé konsa ou ka santi-w ? Si sé sa, kijan ou pé sèten kè ou ni onlo valè pou Jéova ?

² On biten ki pé édé-w, sé li sèwten istwa ki maké adan Labib. Yo ka montré kijan Jéova vé yo aji èvè on moun. Gason a-y Jézi té ka rèspèkté sé moun-la é i té janti èvè yo. Lèfètkè i aji konsa, i montré kè menmsi on moun ka pansé kè i sé on ti kakazwa, pou Jézi é pou Pap’a-y moun-lasa ni onlo valè (Jan 5:19 ; Ébr. 1:3). Adan awtik-lasa, nou ké vwè : 1) kijan Jézi fè sé moun-la santi yo té ni valè pou Jéova é 2) kijan noumenm pé sèten nou ni onlo valè pou Jéova (Ajé 2:7).

KIJAN JÉZI FÈ SÉ MOUN-LA SANTI YO TÉ NI VALÈ

3. Kijan Jézi aji èvè Moun-Galilé ki té ka vin owa-y ?

³ Lèwvwè Jézi té ka préché an Galilé, onlo moun té ka vin owa-y pou yo kouté-y é pou i té géri-yo. Jézi vwè kè ‘yo té ka maltrété sé moun-lasa é kè yo pa té ka pran swen a yo ; yo té kon mouton ki pa ni bèwjé’ (Mat. 9:36). Sé chèf a rèlijyon la té ka méprizé sé moun-lasa é yo té ka jou di kè sé té « moun a malédisyon » (Jan 7:47-49 ; nòt-la ki adan Bib-la ki fèt pou étidyé an fransé). Men konm Jézi té ka pran tan anségné-yo é géri-yo, i té ka montré-yo i té ka ba sé moun-lasa valè (Mat. 9:35). Anplisdisa, pou i édé plis moun ankò, i montré sé apòt-la kijan pou yo préché é i ba-yo pouvwa pou yo géri moun ki té malad é ki té enfim (Mat. 10:5-8).

4. Sé moun-la ki té ka santi-yo toupiti té ka vin kouté Jézi. Ka jan-la i té ka aji èvè yo la ka aprann-nou ?

⁴ Jézi té ni rèspé ba sé moun-la é i té janti èvè yo. I montré jan li é Pap’a-y ka vwè sé moun-la, menmsi dòt moun ka méprizé-yo. Si ou dimal a kwè kè ou ni valè pou Jéova, sonjé jan Jézi té ka aji èvè sé moun-la ki té ka santi-yo toupiti é ki té ka vin kouté-y. Sa ké édé-w vwè jan ou ni valè pou Jéova.

5. Adan ki sitiyasyon on madanm Galilé té ka touvé-y ?

⁵ Sé vré Jézi té ka okipé-y dè sé foulmoun-la men i té ka okipé dè sé moun-la pèwsonèlman osi. Pa ègzanp lèwvwè i préché an Galilé, i jwenn on madanm ki té ka pèd san akontinyé dépi 12 lanné (Mawk 5:25). Parapòt a sa, dapré sa Lwa-la té ka di, ni sèwten biten madanm-lasa pa té pé fè pou adoré Bondyé. É vinvwè on moun té’é touché-y, ni sèwten biten moun-lasa pa té’é pé fè nonplis pou adoré Bondyé. Konm i pa té pé rété owa sé moun-la, madanm-lasa dwèt té ka pasé tout tan a-y tousèl. I pa té pé ay adoré Bondyé an sinagòg-la èvè sélézòt moun-la é i pa té pé sélébré sé fèt-la nonplis (Lév. 15:19, 25). Alò nonsèlman madanm-lasa té malad, men i dwèt té ka santi i pa té ni pon valè (Mawk 5:26).

6. Ka madanm-la fè pou i géri ?

⁶ Madanm-lasa té ka soufè toubònman é i té vé Jézi géri-y. Men i pa vin palé ba Jézi pou mandé-y swangné-y. Pou ki rézon ? Pétèt i té wont oben i té pè Jézi di-y kè i pa ni ayen a fè la parapòt a maladi-la i té ni la. Alò i mannyé lenj a Jézi san i di ponmoun ayen é i té sèten kè sa té’é géri-y (Mawk 5:27, 28). É i té ni rézon ni on fwa solid konsa, pas grasa fwa a-y i géri ! Aprésa, Jézi mandé kimoun ki mannyé-y é madanm-la di sa i fè. Kijan Jézi réyaji ?

7. Kijan Jézi aji èvè madanm-la ki té ka soufè la ? (Mawk 5:34).

⁷ Jézi aji èvè onlo rèspé é onlo jantiyès èvè madanm-la. Jézi vwè kè i té ‘pè é kè i té ka tranblé’ (Mawk 5:33). Konm Jézi té sav sa i té ka rèsanti, i palé ba-y jantiman. I jous kriyé-y « fi an mwen ». Lè i itilizé mo-lasa, nonsèlman Jézi montré madanm-la i té ni rèspé ba-y, men i montré osi kè i té janti é kè i té ni lanmou ba-y (li Mawk 5:34). Sé sèl koté adan Labib Jézi ka kriyé on madanm « fi an mwen ». Pétèt i sèvi èvè ti mo-lasa pas i vwè jan madanm-la té pè. Imajiné jan sa dwèt soulajé madanm-la ! Si Jézi pa té palé ba-y konsa, sé vré madanm-la pa té’é malad ankò, men pétèt i té’é santi-y koupab pou sa i té fè. Jézi pa té vé géri madanm-la tousèl, i té vé édé-y konprann osi kè pou Jéova, i té ni onlo valè.

8. Ki difikilté on sè Brézil jwenn ?

⁸ Menmjan-la, sèwten frè é sè ni on maladi, é akòz dè sa, yo pé ni lenprésyon kè yo pa vo ayen. Mariaa, sé on sè ki pyonyé pèwmanan o Brézil. I fèt san janm é san men gòch. Mi sa i ka di : « Lè an té lékòl yo fè-mwen vwè bon mizè pas an té andikapé. Sé timoun-la té ka ban-mwen dé ti non ki té ka fan’an lapenn. Menm fanmi an mwen té ka fè dé biten ki té ka fè-mwen santi an pa té ni pon valè. »

9. Ka ki édé Maria vwè i ni valè ?

⁹ Ka ki édé Maria vwè i ni valè ? Lè i vin Témwen a Jéova, sé frè é sè la adan lasanblé-la montré yo té ni onlo lanmou ba-y, é yo édé-y vwè-y kon Jéova ka vwè-y. Mi sa i ka di : « Kalpen an mwen pa ni asé paj pou mwen maké non a tout sé frè é sè la ki fè-mwen dibyen. An ka di Jéova mèsi pou bèl fanmi èspirityèl la i ban-mwen la. » Grasa frè é sè a-y, Maria vwè jan i ni valè pou Bondyé.

10. Ka ki té pwoblèm a Mari Magdaléèn-la ? (gadé sé imaj-la osi).

¹⁰ An-nou vwè ègzanp a ondòt moun Jézi édé : Mari Magdaléèn-la. Madanm-lasa té ni 7 démon asi-y ! (Lik 8:2). Sé démon-la dwèt té ka fè-y fè dé biten ontijan bizaw, kifè sé moun-la dwèt té ka chapé lè yo té ka vwè-y. Sa dwèt té ka fè-y lapenn toubònman. A pa ti pè i dwèt té pè, é i dwèt té ka pansé kè ponmoun pa té enmé-y é kè ponmoun pa té pé édé-y. Lèwvwè sé démon-la sòti adan-y, i vin on disip a Jézi.

11. Kijan Jézi montré Mari Magdaléèn-la i té ni onlo valè pou Bondyé ?

¹¹ Ki dòt mannyè Jézi édé Mari Magdaléèn-la vwè i té ni valè pou Bondyé ? Jézi té ka pati dé koté èvè disip a-y pou yo ay préché, é i di Mari Magdaléèn-la vin èvè yob. Kifè Mari té pé tann lè Jézi té ka anségné sé moun-la. Menm jou-la Jézi résisité la, i parèt douvan a-y. Jou-lasa, Mari fè pawti a sé prèmyé moun-la Jézi palé ba yo la. Jézi jous mandé-y ay di sé apòt-la i té résisité. Tout sé biten-lasa té ka montré Mari kè i té ni onlo valè pou Jéova ! (Jan 20:11-18).

12. Pou ki rézon Lidia té ka pansé i pa té ni valè ?

¹² Onlo moun ka santi-yo kon Mari Magdaléèn-la dwèt té ka santi-y. Yo ni lenprésyon yo pa vo ayen. Lidia, sé on sè ki ka rété an Èspangn. Lè i té an vant a manman-y, manman-y té vé avòté. Lidia ka sonjé kè menm lè i té toupiti timoun, manman-y pa té ka pran swen a-y é i té ka di-y onpakèt méchansté. Mi sa i ka di : « Manman-mwen pa jen ban-mwen lanmou, kifè an toujou té vé sé moun-la enmé-mwen é an té vlé yo vin zanmi an mwen. Men konm manman-mwen té fè-mwen konprann an té on mové moun, an té pè kè ponmoun pa jen enmé-mwen. »

13. Ka ki édé Lidia konprann i ni valè pou Jéova ?

¹³ Lè Lidia mété-y ka étidyé Labib, tout biten chanjé. Grasa lapriyè, étid a Labib la é jantiyès a sé frè é sè la, i konprann jan i ni valè pou Jéova. Mi sa i ka di : « Mari an mwen toujou ka di-mwen jan i enmé-mwen. I toujou ka fè-mwen sonjé bèl kalité an mwen. É zanmi an mwen ka fè menm biten. » Ès ou konnèt on moun ki byen bizwen yo édé-y vwè i ni valè pou Jéova ?

KIJAN NOU PÉ VWÈ-NOU KON JÉOVA KA VWÈ-NOU

14. Kijan 1 Samiyèl 16:7 ka édé-nou konprann jan Jéova ka vwè on moun ? (gadé karé-la osi « Poukwa Jéova ka ba sèwvitè a-y valè ? »).

¹⁴ Sonjé kè jan Jéova ka vwè-nou é jan lèmond ka vwè-nou, sé 2 biten diféran (li 1 Samiyèl 16:7). Adan mond-lasa, pou ba on moun valè, souvantfwa yo ka gadé istil a-y, konmen lajan i ka gangné, é si i ni diplòm (Iz. 55:8, 9). Alò olyé ou bazé-w asi sa mond-la ka pansé pou sav si ou ni valè, bazé-w asi sa Jéova ka pansé. Labib ka palé dè moun ki délè té ni dimal a kwè yo té ni valè, kon Éli, Noémi é Àn. Pétèt ou pé maké osi dé bèl biten ki rivé-w ki ka montré kè Jéova enmé-w é kè ou ni valè ba-y. Anplisdisa si ou ni dout asi valè a-wc, ou pé ay li déotwa awtik ki adan piblikasyon an nou ki ka palé dè tèm-lasa.

15. Poukwa Danyèl té ‘on moun ki té ni onlo valè’ pou Jéova ? (Danyèl 9:23).

¹⁵ Sonjé kè Jéova ka vwè fidélité a-w, kifè ou ni valè ba-y. Onlè, aloskè Danyèl té ja ni on bon ti laj, i santi-y krazé é i té dékourajé (Dan. 9:20, 21). Kijan Jéova ba-y fòs ? Bondyé voyé on zanj non a-y sé Gabriyèl, pou fè Danyèl sonjé i té ‘on moun ki té ni onlo valè’ é kè Bondyé té tann priyè a-y (li Danyèl 9:23). Poukwa Danyèl té ni valè pou Jéova konsa ? Sé pas i té ni onlo bèl kalité. I té enmé sa ki dwèt é sé té on nonm ki té fidèl (Ézék. 14:14). Si Jéova mèt istwa-lasa an Bib-la, sé pou i té konsolé-nou (Wom. 15:4). Si nou ka fè sa ki dwèt é si nou sé dé moun ki fidèl, nou ni valè pou Jéova. É menmjan i kouté priyè a Danyèl, sé menmjan i ké kouté priyè an nou (Mich. 6:8 ; Ébr. 6:10).

16. Ka ki pé édé-w vwè Jéova kon on papa ki plen lanmou ? (gadé imaj-la osi).

¹⁶ Vwè Jéova kon on papa ki plen lanmou. Sa i vé, sé édé-w, i pa la pou gadé tout ti fòt ou ka fè (Sòm 130:3 ; Mat. 7:11 ; Lik 12:6, 7). Lidé-lasa édé onlo moun ki té ni lenprésyon yo pa ni valè. An-nou vwè ègzanp a Michelle, on sè ki ka rété an Èspangn. Mari a-y té ni labitid voyé vyé pawòl ba-y é sa diré lanné é lanné, kifè Michelle té ka santi i pa té vo ayen. Mi sa i ka di : « Chakfwa an ka santi-mwen initil, an ka éséyé imajiné kè Jéova ka pran-mwen an 2 bra a-y, kè i ka pwotéjé-mwen é kè i ka pran swen an mwen » (Sòm 28:9). Lauren, sé on sè Afrik di Sid. Mi sa i ka èspliké : « Jéova fè-mwen vin owa a-y, i édé-mwen rété toupré a-y pannan tout sé lanné-lasa, é i jous ka itilizé-mwen pou anségné dòt moun. Si i fè tousa ban mwen sé kè an ni valè ba-y » (Ozé 11:4).

17. Ka ki pé édé-w sèten kè ou ka fè Jéova plézi ? (Sòm 5:12).

¹⁷ Ou pé sèten ou ka fè Jéova plézi (li Sòm 5:12). David montré kè lèwvwè on moun ka fè Jéova plézi é i ka fè sa ki dwèt, sé konsi Jéova té ka pwotéjé-y èvè on « gran boukliyé ». Lèfètkè ou sav kè ou ka fè Jéova plézi é kè i ka soutyenn-vou, lidé-lasa ka pwotéjé-w kont sé lidé négatif la. Kijan ou pé sav si ou ka fè Jéova plézi ? Kon nou vwè-y, Jéova ka ban-nou Pawòl a-y pou i montré-nou jan i ka vwè-nou. Anplisdisa, i ka sèvi èvè sé ansyen-la, èvè zanmi an nou é èvè dòt frè é sè pou fè-nou sonjé kè nou ni valè ba-y. Lè yo ka di-w dé ti biten pou ankourajé-w, kijan pou-w réyaji ?

18. Lè yo ka félisité-w oben lè yo di-w ou fè on bon biten, poukwa fò ou aksèpté ?

¹⁸ Lè on moun ou konnèt é ki enmé-w ka félisité-w, pa konpranndèdi sa i di la pa vré. Pétèt kè Jéova ka sèvi èvè moun-lasa pou fè-w santi i ka aprésyé-w. Mi sa Michelle, nou palé dè-y talèla, ka di : « Piti-a-piti, an ka koumansé kwè sé bèl ti pawòl-la yo ka di-mwen la. Sa ka mandé-mwen onlo éfò, men an sav kè sé sa Jéova vlé. » Anplisdisa, sé ansyen-la édé Michelle vwè kè i ka fè Jéova plézi. Jòdijou, Michelle pyonyé é i ka travay adistans pou Bétèl-la.

19. Poukwa nou pé sèten nou ni valè pou Bondyé ?

¹⁹ Èvè onlo jantiyès, Jézi ka fè-nou sonjé kè nou ni onlo valè pou Pap’an nou ki an syèl-la (Lik 12:24). Kifè nou pé sèten Jéova ka konsidéré-nou. An-nou pa jen oubliyé sa ! É an-nou fè tousa nou pé pou édé lézòt vwè jan yo ni valè pou Bondyé !