Zò té vlé sav…

Ki « lidé » Bondyé ké mèt an tchè a sé nasyon-la talè ?

Mi sa Révélasyon 17:16, 17 ka di anrapò èvè koumansman a gwo tribilasyon-la : « Kanta sé dis kòn-la ou vwè la é kanta bèt sovaj la, yo ké hay pwòstitiyé-la, yo ké mété-y anchèpi é yo ké lésé-y toutouni ; yo ké manjé chè a-y é yo ké brilé-y a san pou san. Pas Bondyé mèt lidé a-y an tchè a yo, pou yo fè volonté a-y, wi, pou yo akonpli sèl lidé a yo, kivédi pou yo ba bèt sovaj la wayòm a yo, jistan pawòl a Bondyé akonpli. » Onlè, piblikasyon an nou té ka di kè « lidé-la » Jéova ké mèt an tchè a sé nasyon-la, sé ké détui fo-rèlijyon-la.

Men a pa konsa nou ka konprann sa ankò. « Lidé-la » Jéova ké mèt an tchè a sé nasyon-la, sé ké fè-yo « ba bèt sovaj la wayòm a yo ». Pou nou konprann kijan pwofési-lasa ké réyalizé, an-nou réponn déotwa kèsyon.

Dè kimoun pwofési-la ka palé ? I ka palé dè « pwòstitiyé-la », non a-y sé « Gran Babilòn-la », ki ka rèprézanté tout sé fo-rèlijyon-la. Bèt sovaj la ki wouj la ka rèprézanté on òwganizasyon ki vé mèt lapé asi latè. Lè yo kréyé-y an 1919, non a-y sé té Sosyété a sé Nasyon-la é konnyéla yo ka kriyé-y Òwganizasyon a Lénasyonzini (Rév. 17:3-5). « Sé dis kòn-la » ka rèprézanté tout sé gouvènman-la ki ka soutyenn-li la.

Ki lyannaj ki ni ant pwòstitiyé-la é bèt sovaj la ki wouj la ? Pwòstitiyé-la sizé asi bèt sovaj la ki wouj la, kivédi i ka soutyenn bèt-lasa é i ka éséyé gidonné-y.

Ka ki ké rivé pwòstitiyé-la ? Bèt sovaj la é sé dis kòn-la ki ka soutyenn bèt-lasa « ké hay pwòstitiyé-la ». Yo ké montré jan yo hay-li, lè yo ké pati èvè tout richès a-y, é lè yo ké mèt tout méchansté a-y déwò. Aprésa yo ké détui-y, é sa ké réyalizé sa Jéova té anonsé (Rév. 17:1 ; 18:8). Kifè tout sé fo-rèlijyon-la ké disparèt. Men avan sa rivé, Jéova ké fè sé nasyon-la fè on biten yo po’o té jen fè avan.

Ka Jéova ké fè sé nasyon-la fè ? I ké mèt « lidé a-y » an tchè a sé dis kòn-la, kifè yo ké ba bèt sovaj la, kivédi Lénasyonzini « puisans a yo é pouvwa a yo » (Rév. 17:13). Savédi kè lè sé gouvènman-la ké désidé ba bèt sovaj la puisans a yo é pouvwa a yo, a pa on lidé ki ké vin dè yo. Pwofési-la ka montré kè sé Bondyé limenm ki ké fè-yo fè sa (Pwov. 21:1 ; konparé èvè sa ki maké adan Izayi 44:28). Ès sé on biten ki ké fèt piti a piti ? Awa ! Chanjman-lasa ké fèt onsèl kou. Bay yo ké bay pouvwa-la, bèt sovaj la ké détui tout sé fo-rèlijyon-la. Ayen a yo pé’é rété.

Ka fò nou atann-nou a vwè ? Lè nou ka kouté enfòwmasyon, nou pa bizwen chèché tout ti prèv ki ka montré kè piti a piti sé gouvènman-la ka ba Lénasyonzini plis fòs. Mi sa nou pé atann-nou a vwè : Onsèl kou, Jéova ké fè sé gouvènman-la ba Lénasyonzini pouvwa a yo. Lè sa ké rivé, nou ké sav kè gwo tribilasyon-la kay koumansé. Annatandan, « an-nou rété véyatif é an-nou kontinyé ni bon jijman », pas adan on ti moman sitiyasyon-la pé enn chalviré (1 Tés. 5:6).