AWTIK POU ÉTIDYÉ 50
KANTIK 48 Marchons avec Jéhovah jour après jour
Jéova ni imilité, an-nou imité-y
« Fò zò imité Bondyé, antankè timoun kè Bondyé enmé » (ÉFÉZ. 5:1).
ON TI LIDÉ ASI SA NOU KAY VWÈ
Nou ké vwè 4 mannyè nou pé aji èvè imilité kon Jéova.
1. Lè ou ka vwè jan Jéova ni imilité, poukwa ou ka touvé sa fò ?
LÈ OU ka sonjé sé chèf a gouvènman-la, ès ou té’é di yo ni imilité ? Awa ! Men li Jéova, alòskè i sé Toupuisan-la, i ni imilité (Sòm 113:5-8). Pa ni on moun ki ni plis imilité ki Jéova. Pa ni pa menm on ti tras a òwgèy adan-y. Adan awtik-lasa nou ké vwè kijan Jéova ka montré kè i ni imilité adan 4 domenn. Nou ké vwè osi kijan Jézi aji èvè imilité kon Pap’a-y. Lè nou ké ègzaminé sé lidé-lasa, sa ké édé-nou vin pi bon zanmi èvè Jéova é sa ké ban-nou balan pou nou ni plis imilité ankò.
JÉOVA TOUJOU PARÉ A KOUTÉ-NOU
2. Ka Sòm 62:8 ka aprann-nou asi Jéova ? (gadé osi imaj-la).
2 Moun ki ni òwgèy ni on manni grandè, kifè lè lézòt ka vwè-yo yo pa anvi bòdé. Érèzman Jéova pa konsa ! Konm Pap’an-nou ki an syèl-la ni imilité, i vé nou wouvè tchè an nou ba-y é kè nou palé-y dè tout ti penn an nou (li Sòm 62:8). Menmjan on papa ki enmé pitit a-y anvi i di-y sa i ka pansé é sa i ka rèsanti, menmjan-la Jéova anvi nou palé ba-y. Dayè adan Labib i fè ansòt pou yo maké onlo priyè a sèwvitè a-y. Sa ka montré jan i toujou anvi kouté priyè an nou (Joz. 10:12-14 ; 1 Sam. 1:10-18). Délè nou ja fè tèlman érè kè nou pa’a vwè kijan nou pé priyé Jéova. Si ou adan sitiyasyon-lasa, ka ou pé fè ?
On papa ki ni imilité ka imité Jéova, kifè i ka kouté gason a-y ki krazé on pòt a flè pannan i té ka jouwé (gadé paragraf 2 la).
3. Poukwa ou pé sèten kè Jéova vé ou priyé-y souvan ?
3 Menmsi nou ka pansé nou pa mérité lanmou a Jéova, nou pé priyé-y kanmenm. Poukwa nou pé fè sa ? Adan ègzanp a gason-la ki pèd la, Jézi di kè Jéova kon papa gason-lasa, i ni onlo konpasyon. Gason-la bétizé toubònman é pou-y, pap’a-y pa té’é dakò pou i viré akaz a-y ankò. Men kijan papa-la réyaji lè tiboug a-y viré ? Jézi ka di kè vwè papa-la vwè tiboug-la olwen, « i kouri jwenn-li, i pran-y an 2 bra a-y é i bo-y èvè tandrès » (Lik 15:17-20). Jéova ka aji menmjan-la. Dépi on moun tchè a-y an bobo oben on moun ki tris parapòt a érè i fè ka priyé-y, i ka wouvè zòrèy a-y gran pou kouté moun-lasa (Lam. 3:19, 20). Lè i ka vwè moun-lasa, i ni tèlman konpasyon, sé konsi i ka kouri jwenn li pou konsolé-y é pou montré-y kè i enmé-y fò (Iz. 57:15). É jòdijou, kijan Jéova ka « kouri jwenn-nou » ? Souvantfwa, i ka sèvi èvè sé ansyen-la, èvè fanmi an nou é zanmi an nou ki ka adoré-y pou konsolé-nou (Jak 5:14, 15). Jéova ka fè tousa pou édé-nou, pas i vé nou kontinyé rété an 2 bra a-y.
4. Poukwa sé moun-la pa té pè vin palé ba Jézi ?
4 Jézi ka imité Pap’a-y. I té ni imilité kon-y. Kifè lè i té asi latè, moun pa té pè vin owa a-y. Yo pa té pè pozé-y kèsyon nonplis (Mawk 4:10, 11). É lè i té ka mandé-yo ka yo ka pansé asi on biten, yo té ka di-y franchman sa yo té ka pansé (Mat. 16:13-16). Anplisdisa, konm yo té sav Jézi té janti, kè i té ni onlo mizérikòd é kè i té ka konprann-yo, lèwvwè yo té ka fè érè, yo pa té pè i fè kòlè (Mat. 17:24-27). Dayè, sé pas Jézi té ka imité pap’a-y byen toubònman kè yo rivé aprann konnèt Jéova pibyen (Jan 14:9). Sa montré-yo kè Jéova pa té ni ayen a vwè èvè sé chèf a rèlijyon la. Yo té rèd, yo té ni òwgèy é yo pa té ka lévé sé moun-la digad alòskè li Jéova, i té ni imilité é i té paré a kouté sé moun-la.
5. Si nou ni imilité, poukwa sa pli fasil pou yo vin palé ban nou ?
5 Kijan nou pé imité Jéova ? Lè nou ni imilité, sa pli fasil pou sé moun-la vin owa an nou. Si nou pa ni imilité, nou pé jalou lézòt, nou pé pansé kè nou pibon ki ponmoun é nou pé ni dimal a padonné on moun ki fè-nou on biten. Si nou konsa, sé moun-la pé’é vé vin owa an nou (Kol. 3:12-14). Fò sé ansyen-la fè ansòt pou sé frè é sè la santi-yo alèz pou palé èvè yo. Men pou sé frè é sè la santi-yo alèz, fò yo ka vwè sé ansyen-la. Kifè, dépi sa posib, préféré sé ansyen-la pran réinyon a yo adan sal di Wayòm la olyé yo pran-y pa vidéokonférans. É dépi sa posib osi, yo ké ay préché dè kaz-an-kaz èvè frè é sè a yo. Konsa sé frè é sè la ké pé aprann konnèt-yo pibyen é yo ké pi alèz pou palé ba yo chakfwa yo anvi fè-y.
JÉOVA SÉ ON BONDYÉ KI RÉZONAB
6-7. Bay déotwa ègzanp ki ka montré jan Jéova paré a fè sa sèwvitè a-y ka mandé menmsi i té ja pran on désizyon.
6 On moun ki ni òwgèy ka konprann kè sé yenki lidé a-y ki bon é i pa’a tann pon lang. Men li Jéova, menmsi i konnèt tout biten, konm i ni imilité, i dakò pou kouté sa lézòt ka pansé é i jous pé pran ondòt désizyon menmsi i té ja désidé fè ondòt biten. An-nou vwè kijan i aji èvè Miryam, sè a Moyiz. Miryam é Aawon malpalé Moyiz, alòskè sé li Jéova té chwazi pou dirijé pèp-la. Lè Miryam fè sa, sé dérèspèkté i dérèspèkté Jéova. Alò Jéova touvé-y kòlè é i fè Miryam trapé lalèp. Men lè Aawon sipliyé Moyiz pou i fè on biten pou Miryam é lè Moyiz sipliyé Jéova pou i géri-y, kijan Jéova réyaji ? On moun ki ni òwgèy pa té’é wouvin asi désizyon a-y. Men a pa konsa Jéova réyaji. Konm i ni imilité, i aksèpté géri Miryam (Nonb 12:1-15).
7 Nou pé vwè jan Jéova ni imilité lè nou ka sonjé jan i kouté wa Ézékyas. Jéova té voyé pwofèt Izayi pou ay di wa-la kè i té kay mò. Alò Ézékyas pléré gwo dlo é i sipliyé Jéova pou i té géri-y. Kijan Jéova réyaji ? Jéova kouté priyè a Ézékyas é i pèwmèt-li viv 15 lanné ankò (2 Wa 20:1, 5, 6). Jéova ni imilité toubònman, é grasa sa, i paré a fè sa yo ka mandé-y.
8. Ka ki ka montré kè Jézi ka chèché a konprann sitiyasyon a chakmoun ? (Mawk 3:1-6).
8 Jézi ka imité Pap’a-y. Lè Jézi té asi latè, dépi sa té posib i té ka fè lézòt dibyen. Pa ègzanp, i géri moun on jou a Saba alòskè pou sé chèf a rèlijyon la fò pa on moun té fè sa. Jézi pa té rèd men i té ka aji èvè konpasyon é i té ka éséyé konprann sitiyasyon a chakmoun (li Mawk 3:1-6). Jòdijou, Jézi pa chanjé, sé konsa i ka aji èvè sé lasanblé-la. Pa ègzanp, lèwvwè on moun adan lasanblé-la ka fè on péché ki grav, Jézi ka pran pasyans èvè-y pou sa pèwmèt-li chanjé (Rév. 2:2-5).
9. Kijan nou pé montré kè nou ka konprann lézòt ? (gadé sé imaj-la osi).
9 Kijan nou pé imité Jéova ? Jéova toujou ka chèché a konprann lézòt. Fò nou imité jan i ka rézonné é jan i ka aji (Jak 3:17). Pa ègzanp, sé paran-la ki ka imité Jéova pé ké mandé timoun a yo fè dé biten ki two fò pou yo. Sé konsa Jakòb té ka aji èvè timoun a-y, kon Jénèz 33:12-14 ka montré. Dé paran ki ni imilité é ki ka chèché a konprann timoun a yo pa dwètèt konparé sé timoun-la yonn èvè lòt. Fò sé ansyen-la rézonab osi. Pa ègzanp, on ansyen pé ké ensisté pou sélézòt ansyen-la fè kon li i vé. Okontrè, si lamajorité a sé ansyen-la pran ondòt désizyon, dépi sa annakò èvè Labib, i ké soutyenn désizyon-lasa (1 Tim. 3:2, 3). Noutout pé chèché a konprann lézòt menmsi nou pa’a vwè biten-la menmjan-la (Wom. 14:1). Fò nouchak adan lasanblé-la « fè ansòt pou toutmoun sav kè [nou] sé dé moun ki rézonab » (Filip. 4:5).
Lè on papa ka préché èvè timoun a-y, si i rézonab i pé’é mandé-yo fè on biten ki two fò pou yo (gadé paragraf 9 la).
JÉOVA NI PASYANS
10. Kijan Jéova montré i té ni pasyans ?
10 Pétèt zò ja ni lokazyon vwè kè moun ki ni òwgèy pa gè enmé yo fè-yo atann. Yo pa ni pasyans menm. Men Jéova pa konsa. Pa ni moun ki ni plis pasyans ki-y. An tan a Noé, Jéova di kè i té’é atann 120 an avan i détwi sé méchan-la (Jén. 6:3). Sa ba Noé tan pou lévé timoun a-y, é èvè fanmi a-y i konstwi lawch-la. Lè Abraam pozé Jéova onpakèt kèsyon anrapò èvè Sodòm é Gomò, Jéova kouté-y èvè onlo pasyans. Sèten on moun ki ni òwgèy té’é di-y : « Kijanfè ou ka pozé-mwen tousa kèsyon ! » Konm Jéova ni imilité, i pran pasyans èvè Abraam (Jén. 18:20-33).
11. Dapré sa ki maké adan 2 Pyè 3:9, poukwa Jéova ni pasyans ?
11 Jòdijou Jéova ka aji èvè pasyans osi. I chwazi on jou pou détwi mond a Satan é i ka atann jou-lasa rivé. Poukwa i ni pasyans konsa ? « Pas i vé pa ponmoun détwi, men i vé kè toutmoun rivé rèpanti » (li 2 Pyè 3:9). Men ès Jéova ka pèd tan-y ? Awa ! Pasyans a-y pèwmèt konmen milyon moun vin zanmi èvè-y. É nou ka èspéré kè ni milyon moun ankò ki ké fè sa. Men onlè pasyans a Jéova ké bout. Sé vré Jéova enmé toutmoun, men i pa’a pran moun fè nenpòt ki biten. I ké fin bat èvè sé méchan-la (Abak. 2:3).
12. Kijan Jézi ka imité pasyans a Jéova ?
12 Jézi ka imité Pap’a-y. Ni plizyè milyé lanné Jézi ka imité pasyans a Jéova. Sa ja ka fè on bon moman i ka tann tout sé manti-la Satan ka di asi Jéova é asi sèwvitè a-y ki fidèl (Jén. 3:4, 5 ; Jòb 1:11 ; Rév. 12:10). I vwè osi kijan onlo moun asi latè ka soufè. Sèten i présé « détwi travay a Dyab-la » (1 Jan 3:8). Men i ka atann kè Jéova di-y a ki moman pou i détwi mond a Satan. Ka ki ka édé-y ni pasyans ? On biten ki ka édé-y, sé kè i ni imilité. I sav kè sé enki Jéova ki andwa désidé a ki moman pou sa fèt (Akt 1:7).
13. Poukwa Jézi té ni pasyans èvè sé apòt-la, é kijan i montré sa ?
13 Lè Jézi té asi latè, i té ka aji èvè pasyans èvè sé apòt-la. Pa ègzanp, sé apòt-la pa té ka las babyé pou sav kimoun ki pi gran. Men apapousa Jézi di kè pa ni mwayen fè ayen èvè yo. Okontrè i té ka aji èvè pasyans èvè yo (Lik 9:46 ; 22:24-27). I té sèten kè on jou yo té’é chanjé é i pa jen pèd èspwa. É vou, ès délè ou ka fè menm érè-la plizyè fwa ? Si sé sa, ès ou pa byen kontan wa an nou ni imilité é ni pasyans ?
14. Ka nou pé fè pou nou ni pasyans ?
14 Kijan nou pé imité Jéova ? Pou nou imité Jéova pibyen, fò nou aprann réfléchi kon Jézi (1 Kor. 2:16). Ka ki ké édé-nou réfléchi kon Jézi ? Pibèl biten nou pé fè sé li istwa a Jézi adan sé Évanjil-la. Pannan nou ka li, fò nou pran tan réfléchi asi sa nou ka li é fò nou mandé-nou kijan Jézi aji é poukwa i aji konsa. Fò nou mandé Jéova osi édé-nou ni imilité é pasyans kon Jézi. Pi nou ké rézonné kon Jézi, pi nou ké sanm Jéova, é pi nou ké ni pasyans èvè noumenm é èvè lézòt (Mat. 18:26-30, 35).
JÉOVA KA VWÈ MOUN YO PA’A LÉVÉ DIGAD
15. Bay déotwa ègzanp ki ka montré kè Jéova enmé moun ki ni imilité ?
15 (Li Sòm 138:6.) Jéova sé Gran Mèt a linivè. Magrésa, i ka pran tan gadé moun yo pa’a lévé digad. Ni bon tibwen moun Jéova pran tan gadé alòskè lézòt té ka méprizé-yo. Pétèt nou pa’a sonjé yotout, men non a yo maké an Bib-la. Pa ègzanp, Jéova fè Moyiz maké non a on madanm ki té ka okipé dè timoun adan fanmi a Izaak é adan ta Jakòb. Non a madanm-lasa sé té Débora, é i fè travay-lasa pannan 125 lanné ! Menmsi nou pa konnèt granzafè asi madanm-lasa, Jéova fè Moyiz maké on ti détay ki ka montré jan fanmi a Izaak é jan fanmi a Jakòb té enmé-y (Jén. 24:59 ; 35:8, gadé nòt-la an fwansé). Onpakèt lanné apré, Jéova chwazi David, on jenn ti bèwjé, pou i vin wa a Israèl (2 Sam. 22:1, 36). On ti moman apré Jézi fèt, Bondyé voyé zanj pou di on ti gwoup bèwjé kè Mési-la té sòti fèt Bétléèm. Sé yo prèmyé Jéova di sa é sé té on bèl lonnè toubònman (Lik 2:8-11). É lè Jozèf é Mari menné Jézi an tanp-la, Jéova ba 2 moun ki té ni on bèl laj, kivédi Siméon é Àn, on bèl lonnè : i pèwmèt-yo vwè gason a-y (Lik 2:25-30, 36-38). « Menmsi Jéova ka rété anho an syèl-la, i ka pran tan gadé moun ki ni imilité » !
16. Lè Jézi té ka aji èvè sé moun-la, kijan i té ka imité Pap’a-y ?
16 Jézi ka imité Pap’a-y. Kon Pap’a-y, Jézi té ka ba moun yo té ka mèt akoté valè. I té k’ay owa moun ki ‘pa té fè gran lékòl é ki té tousenp’ pou aprann-yo dé biten asi wayòm a Bondyé (Akt 4:13 ; Mat. 11:25). Nonsèlman Jézi té ka géri moun ki té malad, men i té ka fè-yo santi kè i té enmé-yo é kè i té ka rèspèkté-yo (Lik 5:13). Jouswa-la avan i mò la, Jézi lavé pyé a sé apòt-la. Sé té on travay yo té ka ba sé sèwvitè-la fè (Jan 13:5). É avan i viré an syèl-la i mandé disip a-y édé sé moun-la pou yo ni lavi pou touttan. Sé on bèl lonnè i ba disip a-y é i ban-nou bèl lonnè-lasa osi (Mat. 28:19, 20).
17. Kijan nou ka montré lézòt kè nou ka rèspèkté-yo é kè nou enmé-yo ? (gadé imaj-la osi).
17 Kijan nou pé imité Jéova ? Nou ka montré kè nou enmé sé moun-la é kè nou ka rèspèkté-yo lè nou ka préché bon nouvèl-la ba yo kèlkèswa la yo sòti, koulè a po a yo, oben konmen lanné lékòl yo fè. É nou ka montré frè é sè an nou kè nou enmé-yo é kè nou ka rèspèkté-yo menmsi nou ni plis rèsponsabilité ki yo oben kè nou ka rivé fè sèwten biten pibyen ki yo (Filip. 2:3). Jéova kontan lè nou ka aji èvè imilité, lè yonn enmé lòt é lè yonn ka rèspèkté lòt (Wom. 12:10 ; Sof. 3:12).
Nou ni imilité kon Jéova lè nou ka préché ba tout kalté moun (gadé paragraf 17 la).a
18. Poukwa ou vé ni imilité kon Jéova ?
18 Si nou ka imité imilité a Pap’an nou ki an syèl-la, moun pé’é pè vin owa an nou, nou ké chèché a konprann lézòt, é nou ké ni pasyans. Nou ké montré lézòt osi kè nou enmé-yo é kè nou ka rèspèkté-yo kon Jéova ka fè-y. An-nou sonjé kè lè nou ka fè tousa nou pé pou nou imité Bondyé an nou ki ni imilité, nou ni plis valè ba-y ankò (Iz. 43:4).
KANTIK 159 Ba Jéova glwa
a SA NOU KA VWÈ ASI IMAJ-LA : Plizyè sè ki ni imilité ka imité Jéova lè yo ka préché ba madanm ki lajòl.