Ès ou ka sonjé ?
Ès ou pa pèd on may adan sé Tou dè Gad la ki sòti an 2025 la ? Si sé sa, gadé si ou ka rivé réponn a sé kèsyon-lasa :
Ka ki ka pousé-nou ba Jéova lonnè ?
Nou ka ba Jéova lonnè pas nou ni onlo rèspé ba-y, pas nou enmé-y onlo é pas nou vlé toutmoun konnèt-li (w25.01, p. 3).
Si on moun fè-nou on biten, ka nou pé fè pou nou padonné-y pi fasilman ?
Fò pa nou fè konsi sa nou ka rèsanti pa ni enpòwtans. Vométan nou pa ni moun-la si tchè ankò oben vométan nou pa kòlè èvè-y ankò pas sa ka pwotéjé-nou pou nou pa ni rankin an tchè an nou (w25.02, p. 15-16).
Poukwa Mawk sé on bèl ègzanp pou sé jennfrè-la ?
Lè yo pwopozé Mawk travay plis pou Jéova é pou lézòt i aksèpté èvè plézi. Menmsi Mawk jwenn on sitiyasyon ki dwèt fè-y lapenn é ki dwèt désèvwa-y, i pa jen lagé. Li é Pòl vin bon zanmi é i frékanté osi dé frè ki té byen doubout adan lavérité (w25.04, p. 27).
Lè Jézi di adan priyè a-y : « An fè-yo konnèt non a-w », ka i té vlé di pa la ? (Jan 17:26).
Disip a Jézi té ja sav kè non a Bondyé sé Jéova. Kifè sa Jézi aprann-yo sé kimoun ki Jéova. I fè-yo konnèt pèwsonalité a-y, sa i ké fè pou lézimen é latè, é bèl kalité a-y (w25.05, p. 20-21).
Si nou ni imilité, ka fò nou ké rèkonnèt ?
Nou oblijé rèkonnèt kè a pa tout biten nou konnèt. Pa ègzanp, nou pa sav kitan lafen ké vin, nou pa sav ka Jéova ké fè a moman-lasa, nou pa sav ka ki ké rivé dèmen, é nou pé pa konprann jan Jéova konnèt-nou byen (w25.06, p. 16-18).
Lè ou ka li on awtik oben lè ou ka kouté on diskou, kijan ou pé sèvi èvè sa ou aprann pou édé lézòt ?
Ou pé mandé-w : « Ki lidé yo ka itilizé pou édé sé moun-la konprann vérité-lasa ? Ki ègzanp yo pran é kè an pé itilizé pou èspliké on moun vérité-lasa ? Ès ni on moun lidé-lasa té’é pé entérésé, é kitan an té’é pé palé-y dè sa ? » (w25.07, p. 19).
Jéova padonné David. Ka sa ka aprann-nou ?
Magré David té fè dé biten ki té grav toubònman, lè i rèpanti-y èvè tout tchè a-y, Jéova padonné-y (1 Wa 9:4, 5). Lè Jéova ka padonné on moun, i pa’a tchenn kont dè péché-la ankò é i pa’a wouvin asi sa nonplis (w25.08, p. 17).
Si on étidyan ni dimal a konprann on lidé, ka ou pé fè ?
Si toutjan ou èspliké-y on lidé Labib ka anségné i pa’a konprann-li, fè douvan é wouvin anlè lidé-lasa plita (w25.09, p. 24).
Labib ka di kè ‘péché-la ni on pouvwa asi moun pou kouyonné-yo’ (Ébr. 3:13). Ka sa vlé di ?
Akòz dè péché-la nou pé fè dé biten ki pa bon. Akòz dè-y osi, nou pé ni dimal a kwè kè Bondyé enmé-nou (w25.10, p. 16).
Ni 3 biten nou pé fè pou priyè an nou édé-nou vin pi bon zanmi èvè Jéova. Kilès ?
1) Nou pé réfléchi asi bèl kalité a Jéova. 2) Nou pé réfléchi asi sitiyasyon-la nou ka jwenn la. Pa ègzanp, si fò nou padonné on moun, nou pé palé dè sa adan priyè an nou. 3) Nou pé pran tan an nou lè nou ka priyé. Konsa nou ké pé wouvè tchè an nou ba Jéova (w25.10, p. 19).
Ka nou pé fè pou édé moun ki ja ni on bèl laj ?
Nou pé pran labitid ay vwè-yo é kriyé-yo. Lè frè é sè an nou ni randévou aka dòktè-la, nou pé ay èvè yo. Nou pé préché èvè yo diféran mannyè osi (w25.11, p. 6-7).
Ka pou sé krétyen-la fè pou ba Jéova lonnè jou a mayé a yo ?
Fò yo fè tousa lwa-la ka mandé adan péyi-la yo ka viv la. Pannan sérémoni-la é osi pannan fèt-la, fò yo fè ansòt pou ni on anbyans ki ka montré kè lèspri sen a Jéova ka aji. Lè yo ka chwazi lenj a mayé a yo, fò pa yo fè kon moun a gran wach pou fè moun vwè-yo é fò yo sèten yo pa’a suiv mès é labitid ki pa annakò èvè Labib. Lèwvwè yo ka òwganizé mayé a yo, fò yo pran tan palé yonn èvè lòt é èvè fanmi a yo é zanmi a yo (w25.12, p. 21-24).