Poukwa yo ka kriyé Jézi Gason a Bondyé ?

Mi sa Labib ka di

Adan Labib, byensouvan, yo ka kriyé Jézi « Gason a Bondyé » (Jan 1:49). « Gason a Bondyé », sé on èksprésyon ki ka montré kè Bondyé sé Kréyatè-la, oben Sous a tout vi, kivédi ta Jézi osi (Sòm 36:9 ; Révélasyon 4:11). Labib pa’a di kè Bondyé vin papa, kon on misyé ka fè timoun èvè on madanm.

Adan Labib, yo ka di kè sé zanj-la osi sé « gason a vré Dyé-la » (Jòb 1:6). É yo ka kriyé Adan, prèmyé nonm-la, « gason a Bondyé » (Lik 3:38). Men pawmi tout gason a Bondyé, sé Jézi ki pi enpòwtan pas i sé prèmyé kréyasyon a Bondyé, é sé-y tousèl Bondyé kréyé dirèktèman.

• Èskè Jézi viv an syèl-la avan i té fèt asi latè ?

• Ka Jézi té ka fè avan i té vin asi latè ?

Èskè Jézi viv an syèl-la avan i té fèt asi latè ?

Wi. Avan Jézi té fèt antankè nonm asi latè, sé té on kréyati èspirityèl an syèl-la. Mi sa limenm a-y di : « An sòti an syèl-la, é an désann » (Jan 6:38 ; 8:23).

Bondyé kréyé Jézi an prèmyé. Mi sa Labib ka di anrapò èvè-y :

• « I sé [...] prèmyé kréyasyon a Bondyé » (Kolosyen 1:15).

• I sé « koumansman a kréyasyon a Bondyé » (Révélasyon 3:14).

Jézi akonpli pwofési-la ki anrapò èvè « sila ki la dépi nanni-nannan, dépi an tan lontan » (Miché 5:2 ; Matyé 2:4-6).

Ka Jézi té ka fè avan i té vin asi latè ?

Lè i té an syèl-la, i té ni onlo grad. I palé dè sa adan on priyè. Mi sa i di : « Papa, ban-mwen glwa [...] glwa-la an té ni la owa a-w avan lèmond ègzisté » (Jan 17:5).

I édé Pap’a-y kréyé tout sélézòt biten-la. Jézi travay ansanm èvè Bondyé « kon on zouti byen filé » (Pwovèb 8:30). Mi sa Labib ka di anrapò èvè Jézi : « Bondyé sèvi èvè-y pou kréyé tout sélézòt biten-la an syèl-la é asi latè » (Kolosyen 1:16).

Bondyé itilizé Jézi pou kréyé tout sélézòt biten-la. Pa ègzanp, i kréyé sélézòt zanj-la, é i kréyé linivè (Révélasyon 5:11). Adan on sans, nou té’é pé di kè Bondyé travay ansanm èvè Jézi menmjan on awchitèk ka travay èvè on mason. Awchitèk-la ka fè sé plan-la, é mason-la ka sèvi èvè yo pou konstwi sa ki ni a konstwi.

Sé té Pawòl-la. Lè Labib ka palé dè Jézi avan i té vin si latè, i ka kriyé-y « Pawòl-la » (Jan 1:1). Savédi kè Bondyé sèvi èvè Gason a-y pou ba sélézòt zanj-la sèwten enfòwmasyon, oben pou mandé-yo fè sèwten biten.

Anplis, i ka sanmsa Bondyé té ka itilizé Jézi konm on pòt-pawòl pou i té pòté mésaj a-y ba lézimen. Pétèt kè Bondyé sèvi èvè Jézi, Pawòl-la, pou i té transmèt Adan é Èv enstriksyon a-y adan Jadendédèn-la (Jénèz 2:16, 17). Pétèt kè zanj-la ki gidé sé Izraélit-la an dézè-la sé té Jézi, é kè sé vwa a-y fò-yo té suiv ègzaktèmana (Ègzòd 23:20-23).