Sous a sa nou kay étidyé adan Kayé Vi é ministè
2-8 SÈPTANM
TRÉZÒ KI AN PAWÒL A BONDYÉ | ÉBRÉ 7-8
Lèkti a Labib
(Ébré 7:1-17) Mèlkisédèk-lasa, ki té wa Salèm é prèt a Bondyé-la ki Pli Ho la, ay jwenn Abraam ki té sòti gangné konba-la kont sé wa-la, é i béni-y, 2 é Abraam ba-y on dizyèm a tousa i té ni. Dabò pou yonn, non a-y vlé di « wa a lajistis », é anplisdisa, i sé wa Salèm, kivédi « wa a lapé ». 3 Konm i pa ni papa, i pa ni manman, i pa ni zansèt, kè yo pa konnèt kitan i fèt é kitan i mò, men kè yo fè-y vin menmjan ki Gason a Bondyé, i ka rété prèt pou touttan. 4 Gadé kijan misyé-lasa té gran, misyé-la Abraam, chèf a fanmi la, bay on dizyèm a méyè biten i té gangné. 5 Sé vré kè sèlon Lalwa, adan tout gason a Lévi, yo ba séla ki ka vin prèt la lòd ranmasé on dim an men a pèp-la, kivédi an men a frè a yo menm, menmsi yo sé timoun a Abraam osi. 6 Men misyé-lasa, ki pa té sòti adan fanmi a Lévi, ranmasé on dim an men a Abraam é i béni Abraam, sila ki té rèsèvwa sé pwomès-la. 7 É pa ni pon dout asi sa, sé pli gran-la ki ka béni pli piti-la. 8 É adan prèmyé ka-la, sé moun ki ka fin pa mò ki ka rèsèvwa dim, men adan dézyèm ka-la, sé on moun Lézékriti ka asiré i vivan ki ka rèsèvwa dim. 9 Anplisdisa, nou pé di kè difètkè Abraam péyé dim, menm Lévi, ki ka rèsèvwa dim, péyé dim osi, 10 pas sé on désandan a Abraam, men i potoko fèt lè Mèlkisédèk vin jwenn Abraam zansèt a-y. 11 Donk si on moun té pé vin pawfè grasa sé prèt-la ki té pitit a Lévi (pas sé sa ki té adan Lwa-la yo té ba pèp-la), poukwa sa té’é nésésè kè ondòt moun vin prèt, on prèt ki té’é « menmjan ki Mèlkisédèk » men ki pa té’é « menmjan ki Aawon » ? 12 Paskè, konm yo ka chanjé sistèm a sé prèt la, fò yo chanjé Lwa-la osi. 13 Pas moun-la yo ka di tousa dè-y la ka vin dè ondòt tribi, é ponmoun adan tribi-lasa pa sèvi asi lotèl-la. 14 Dayè, sa klè kè Ségnè an nou sòti an fanmi a Jida ; é poutan Moyiz pa jen palé dè prèt ki ka vin dè tribi-lasa. 15 É sa ka vin pli klè ankò lè ondòt prèt menmjan ki Mèlkisédèk ka parèt. 16 I pa vin prèt pas on lwa té’é ka mandé i sòti adan on fanmi a prèt, men i vin prèt grasa puisans a on vi yo pé pa détui. 17 Pas yo bay témwagnaj-lasa asi-y : « Ou prèt pou touttan menmjan ki Mèlkisédèk. »
9-15 SÈPTANM
TRÉZÒ KI AN PAWÒL A BONDYÉ | ÉBRÉ 9-10
Lèkti a Labib
(Ébré 9:1-14) Adan ansyen alyans-la, té ni sèwten biten kè Lalwa té ka mandé fè pou sèvi Bondyé, é té ni on koté sen pou yo té adoré-y asi latè. 2 Pas yo té konstwi prèmyé pyès a tant-la, é adan-y té ni chandilyé-la é tab a sé pen-la yo té ka prézanté la douvan Bondyé. Yo ka kriyé-y Koté-la ki Sen la. 3 Men dèyè dézyèm rido-la, té ni on pyès an tant-la yo té ka kriyé Koté-la ki Pli Sen la. 4 Adan-y, té ni on bòl a ansan an lò é tout lawch a Alyans la té kouvè èvè lò. É adan lawch a Alyans la, té ni ja an lò la, èvè lamàn adan-y, baton a Aawon ki té boujonné é sé tablèt a Alyans-la. 5 É anlè Lawch-la té ni sé chériben-la ki plen glwa la é lombraj a yo té ka kouvè kouvèti a Lawch-la. Men a pa alè pou palé dè sa andétay. 6 Konm sé konsa yo konstwi sé biten-lasa, chaklè sé prèt-la ka rantré adan prèmyé pyès a tant-la pou fè sa yo ni a fè pou sèvi Bondyé. 7 Men sé gran prèt-la tousèl ki ka rantré adan dézyèm pyès-la onsèl fwa an lanné-la. I toujou ka rantré èvè san i ka ofè ki pou limenm, ki pou sé péché-la pèp-la fè la san yo rann-yo kont. 8 Sé konsa lèspri sen ka montré kè toutotan prèmyé tant-la té doubout, yo poto’o konnèt chimen-la ki ka menné a koté-la ki sen la. 9 Tant-lasa sé on senbòl pou épòk an nou, é annakò èvè senbòl-lasa, yo ka ba Bondyé kado é sakrifis. Magrésa, sé biten-lasa pé pa ba on moun ki ka sèvi Bondyé on konsyans ki nèt a san pou san. 10 Yo lyanné sèlman èvè biten moun ka manjé, biten moun ka bwè é èvè diféran kalté batèm. Sé sa Lalwa té ka mandé pou kò-la é moun té oblijé suiv sa jiskatan lè-la rivé pou woumèt tout biten annòd. 11 Men, lè Kris vin antankè gran prèt ki ja fè bon biten rivé, i rantré adan tant-la ki pli gran é ki pli pawfè, ki pa fèt èvè men a nonm, kivédi ki pa ka vin dè kréyasyon-lasa. 12 I pa rantré adan koté-la ki sen la èvè san a bouk é èvè san a jenn toro, men i rantré èvè pwòp san a-y onbonfwa, é i trapé on délivrans étèwnèl ban nou. 13 Paskè si san a bouk, san a toro é si sann a jenn fimèl-bèf yo ka voyé asi séla ki pa pwòp la ka rann-yo sen pou chè a yo vin pwòp, 14 ou ka tou konprann kè san a Kris, Kris ki ofè Bondyé limenm a-y san tach grasa on lèspri étèwnèl, ké pwòpté konsyans an nou dè sa nou ka fè ki pa ni pon valè, pou nou pé sa sèvi Bondyé-la ki vivan la ?
16-22 SÈPTANM
TRÉZÒ KI AN PAWÒL A BONDYÉ | ÉBRÉ 11
Lèkti a Labib
(Ébré 11:1-16) Lafwa sé lè nou pliski sèten kè sa nou ka èspéré ké rivé, sé on prèv ki klè anrapò èvè dé biten byen réyèl kè nou pa’a vwè. 2 Sé paskè moun an tan lontan té ni on fwa konsa kè yo rèsèvwa on témwagnaj ki fè-yo sav yo té ka fè Bondyé plézi. 3 Grasa lafwa, nou ka konprann sé grasa pawòl a Bondyé si sé sistèm-la anplas, kifè sa nou ka vwè ka vin dè sa nou pé pa vwè. 4 Grasa lafwa, Abèl ofè Bondyé on sakrifis ki té ni plis valè ki ta Kayen, é sé grasa fwa-lasa i rèsèvwa témwagnaj-la kè i té jis, pas Bondyé aksèpté sé don-la i fè la ; é grasa fwa a-y, menmsi i ja mò, i ka palé toujou. 5 Grasa lafwa, Bondyé mèt Énòk ondòt koté pou i pa vwè lanmò, é yo pa té ka touvé-y ponkoté, pas Bondyé té déplasé-y ; avan i té déplasé-y, Bondyé té fè-y sav kè i té fè-y plézi. 6 Dayè, san lafwa, pa ni mwayen fè Bondyé plézi, pas moun-la ki ka vansé owa Bondyé dwèt kwè kè i ka ègzisté é kè i ka divini sila ki ka rékonpansé moun ki ka chèché-y vréman. 7 Grasa lafwa, lèwvwè Bondyé fè Noé sav kè dé biten yo po’o té ka vwè té ké rivé, Noé mété-y ka krenn Bondyé toubònman é i fè on lawch pou sové fanmi a-y ; é grasa fwa-lasa, i kondanné mond-la é i vin érité jistis-la ki ka vin dè lafwa. 8 Grasa lafwa, lè Bondyé kriyé Abraam, i obéyi, i lésé kaz a-y pou ay on koté i té pou érité ; i pati san i té sav ola i té k’ay. 9 Grasa lafwa, i viv kon étranjé asi tè-la Bondyé té pwomèt la, konsi i té adan on péyi étranjé, é i té ka rété anba tant èvè Izaak é Jakòb, ki érité dè menm pwomès-la osi. 10 Pas i té ka atann vil-la ki té ni fondasyon solid, on vil sé Bondyé ki désiné plan a-y é ki konstwi-y. 11 Sé grasa lafwa osi Sara rèsèvwa puisans pou i té tonbé ansent, alòskè i té ja pasé laj pou fè timoun, pas i konsidéré kè sila ki té fè pwomès-la té fidèl. 12 Sé pousa, adan onsèl nonm ki té près mò, ni onpakèt timoun ki sòti, yo kon zétwal ki an syèl-la, é pa ni mwayen konté-yo, yo kon sab-la ki bòd lanmè la. 13 Tout sé moun-lasa kontinyé ni lafwa jistan yo mò, menmsi yo pa rèsèvwa sa Bondyé té pwomèt ; men yo vwè sé pwomès-la olwen, kifè yo té kontan, é yo déklaré douvan toutmoun kè yo té étranjé an péyi-la é kè yo té la enki pou on tan. 14 Pas moun ki ka palé konsa ka montré on mannyè ki klè kè yo ka chèché on koté ki ké ta yo. 15 Men si yo té rété ka sonjé koté-la yo té sòti la, yo té ké touvé on mwayen pou yo rètouné. 16 Men konnyéla, yo anvi viv on koté ki méyè, kivédi on koté ki sé ta syèl-la. Sé pousa Bondyé pa wont-yo, i pa wont yo kriyé-y Bondyé a yo, pas i préparé on vil ba yo.
23-29 SÈPTANM
TRÉZÒ KI AN PAWÒL A BONDYÉ | ÉBRÉ 12-13
Lèkti a Labib
(Ébré 12:1-17) Alò, nou osi, padavwa nou ni on foul témwen konsa alantou an nou, an-nou débarasé-nou dè tout chaj é dè péché-la ki ka mélé-nou fasilman. É an-nou kouri èvè andirans kous-la ki douvan nou la, 2 toupannan zyé an nou fiksé asi Jézi, ki sé Gid prensipal a fwa an nou é Sila ki ka rann-li pawfè. Pou jwa-la i té ni douvan-y la, i tchenn tchè asi on poto, i méprizé lahont, é i sizé adwat a twòn a Bondyé. 3 Wi, pran tan réfléchi asi sila ki andiré tousa mové pawòl péchè voyé ba-y, pawòl ki kont pwòp entéré a yo ; konsa, zò pé ké vin las é zò pé ké dékourajé. 4 Adan konba a zòt kont péché-lasa, zò po’o jen ni a tchenbé jiskatan san a zòt koulé. 5 É zò enki oubliyé konsèy-la Bondyé ka ba-zòt la, kon on papa ki ka palé ba gason a-y, lè i di : « Gason an mwen, pa méprizé disiplin a Jéova, é pa dékourajé lè i ka korijé-w, 6 pas Jéova ka korijé séla i enmé la. An réyalité, i ka pini touséla i ka akéyi kon gason a-y. » 7 Sa zò ka andiré la ka sèvi pou korijé-zòt. Bondyé ka aji èvè zòt konsi zò sé gason a-y. Pas, ki gason papa-y pa’a korijé ? 8 Men si zò pa ka rèsèvwa disiplin-lasa, sé kè zò pa gason a-y, zò sé timoun-déwò. 9 Anplisdisa, sé papa-la nou té ni la té abityé korijé-nou é nou té ka rèspèkté-yo. Èskè fò pa nou lésé Pap’an nou ki fè-nou grasa lèspri a-y, komandé-nou pli volontyé ankò, pou nou pé sa viv ? 10 Pas yo, yo korijé-nou pannan on ti moman, sèlon sa ki té ka parèt-yo bon, men Pap’an nou ki an syèl-la, i ka korijé-nou pou byen an nou, pou nou pé sa vin sen menmjan ki-y. 11 Sé vré, pa ni pon disiplin ki ka sanm sa i ka rann tchè an nou kontan lè yo sòti ban nou-y, men i plito ka rann-nou tris ; sèlman, plita, moun ki ka lésé disiplin-la fòwmé-yo ka fin pa maché dwèt adan lapé. 12 Sé pousa, fò zò fòwtifyé sé men-la ki ka pann la é sé jounou-la ki fèb la, 13 é kontinyé trasé chimen dwèt pou pyé a zòt, pou sa ki ka bwété pa démi, men pou i géri plito. 14 Chèché a viv anpé èvè toutmoun é chèché a rété sen. Pas siwvwè on moun pa sen, i pé ké vwè Ségnè-la. 15 Pran tout prékosyon a zòt pou ponmoun pa pèd favè a Bondyé nou pa mérité la, pou pon rasin ki kon pwazon pa pousé pou mété dézòd é sali onlo moun. 16 Fò zò fè atansyon osi pou i pa ni ponyonn adan zòt ki ka fè péché sèksyèl, ni ponyonn ki ka méprizé biten ki sakré, kon Ézayi, ki bokanté dwa-la i té ni la antankè prèmyé pitit kont on bòl-manjé. 17 Zò sav kè, plita, lè i té vlé érité bénédisyon-la, yo pa aksèpté-y. Magré dlo sòti an zyé a-y lè i éséyé fè papa-y chanjé lidé, i pa réyisi.
30 SÈPTANM–6 ÒKTÒB
TRÉZÒ KI AN PAWÒL A BONDYÉ | JAK 1-2
Lèkti a Labib
(Jak 2:10-26) Pas si on moun ka fè tousa Lwa-la ka mandé men ni onsèl ti biten adan-y i pa’a fè, i ka vin koupab parapòt a tout Lwa-la. 11 Paskè, sila ki di « fò pa ou fè adiltè », di « fò pa ou tchouyé moun » osi. Kifè, si ou pa ka fè adiltè men ou ka tchouyé moun, ou ka vin on moun ka dézobéyi Lwa-la. 12 Kontinyé palé é kontinyé aji kon dé moun kè lwa a on pèp ki lib ké jijé. 13 Pas sila ki pa ni labitid aji èvè mizérikòd, yo ka jijé-y san pon mizérikòd. Mizérikòd-la ka gangné jijman-la. 14 Frè an mwen, ka sa ka sèvi si on moun ka di i ni lafwa, men i pa ni aksyon ? Zò ka di fwa-lasa pé sové-y ? 15 Siwvwè ni frè é sè ki pa ni lenj é ki pa ni on dèkwa pou manjé chakjou, 16 é magrésa yonn adan zòt ka di-yo : « Antré byen, tansyon a fwadi-la é manjé byen », men zò pa ka ba-yo sa yo bizwen pou yo viv, ka sa ka sèvi ? 17 Menmjan-la, si lafwa pa ni aksyon ki k’ay èvè-y, i mò. 18 Men, on moun pé rivé a di : « Vou ou ni fwa, é mwen an ni aksyon. Montré-mwen fwa a-w san pon aksyon èvè-y, é mwen an ké montré-w fwa an mwen grasa aksyon an mwen. » 19 Ou ka kwè sé onsèl Bondyé ki tini, pa vré ? Sé on bon biten. Men sé démon-la ka kwè osi é yo ni lafrous. 20 Vou ki pa’a konprann, ou vlé yo montré-w kè si lafwa pa ni aksyon k’ay èvè-y i pa’a sèvi ayen ? 21 Èskè a pa grasa aksyon a-y yo déklaré kè Abraam pap’an nou té jis, apré i té ofè gason a-y Izaak an sakrifis asi lotèl-la ? 22 Ou ka byen vwè kè fwa a-y é aksyon a-y té ka maché ansanm, é kè sé aksyon a-y ki fè si fwa a-y vin pawfè, 23 é kè pasaj-la ki adan Lézékriti réyalizé. Pasaj-lasa ka di : « Abraam té ni fwa an Jéova, é sé pousa Bondyé konsidéré kè i té jis », é yo kriyé Abraam zanmi a Jéova. 24 Zò ka byen vwè sé grasa aksyon on moun ka fè yo ka déklaré kè i jis, é a pa grasa lafwa tousèl. 25 Menmjan-la, Raab, madanm-la ki té ka vann kò a-y la, ès yo pa déklaré kè i jis grasa aksyon a-y, apré i té rèsèvwa sé èspyon-la akaz a-y é i té fè-yo pati pa ondòt chimen ? 26 Wi, menmjan si kò-la pa ni lèspri, i mò, menmjan-la osi, si lafwa pa ni aksyon ki k’ay èvè-y, i mò.