Sous a sa nou kay étidyé adan Kayé Vi é ministè
4-10 NOVANM
TRÉZÒ KI AN PAWÒL A BONDYÉ | 1 JAN 1-5
Lèkti a Labib
(1 Jan 1:1–2:6) Anrapò èvè pawòl a lavi, ki té la dépi odépa, kè nou tann, kè nou vwè èvè dé zyé an nou, kè nou pran tan gadé é kè nou mannyé èvè dé men an nou, 2 (wi, lavi parèt on mannyè ki klè, é vi étèwnèl la, nou vwè-y, é nou ka témwagné asi-y é nou ka fè-zòt konnèt-li, vi étèwnèl la ki sòti owa Papa-la é ki parèt ban nou on mannyè ki klè), 3 li kè nou vwè é kè nou tann, nou ka fè-zòt konnèt-li, pou zò pé sa ini èvè nou, ansanm èvè Papa-la é èvè Gason a-y Jézikri. 4 É nou ka ékri sé biten-lasa pou tchè an nou kontan toubònman. 5 Mi mésaj-la kè nou tann-li ka bay é kè nou ka anonsé-zòt : Bondyé sé limyè, é pa ni pon nwèsè adan-y. 6 Si nou ka di : « Nou ini èvè-y », é pannansitan nou ka kontinyé maché an nwèsè, nou ka manti é nou pa ka viv annakò èvè lavérité. 7 Men, si nou ka maché an limyè-la kon limenm an limyè-la osi, nou ini yonn èvè lòt, é san a Jézi, Gason a-y, ka lavé-nou dè tout péché. 8 Si nou ka di : « Nou pa ni péché », sé noumenm nou ka kouyonné é lavérité pa andidan an nou. 9 Si nou ka rèkonnèt péché an nou, konm i fidèl é i jis, i ka padoné péché an nou é i ka pwòpté-nou dè tout kalté enjistis. 10 Si nou ka di : « Nou pa péché », nou ka fè-y pasé pou on mantè, é pawòl a-y pa andidan an nou.
2 Pitit an mwen, an ka ékri-zòt sé biten-lasa pou zò pa péché. É poutan, si on moun ka vin fè on péché, nou ni on moun pou édé-nou owa Papa-la, Jézikri, on moun ki jis. 2 É i sé on sakrifis pou péché an nou, on sakrifis ki ka rékonsilyé-nou èvè Bondyé, men a pa pou péché an nou tousèl, men sé pou péché a lèmondantyé osi. 3 É mi konsa nou ka vwè si nou aprann konnèt-li : sé si nou ka kontinyé obéyi komandman a-y. 4 Si on moun ka di : « An rivé konnèt-li », men pannansitan i pa ka obéyi komandman a-y, sé on mantè, é lavérité pa andidan a-y. 5 Men si on moun ka obéyi pawòl a-y, lanmou a Bondyé vin pawfè andidan a-y poudèbon. Konsa nou ka sav nou ini èvè-y. 6 Si on moun ka di i ka rété ini èvè-y, moun-lasa oblijé kontinyé viv kon Jézi viv.
11-17 NOVANM
TRÉZÒ KI AN PAWÒL A BONDYÉ | 2 JAN 1– JID
Lèkti a Labib
(2 Jan 1-13) Mwen vyé misyé-la, an ka ékri madanm-la Bondyé chwazi la é timoun a-y, kè an vréman enmé — é a pa mwen tousèl, men tout moun ki aprann konnèt lavérité osi — 2 akòz dè vérité-la ki adan nou la é ki ké toujou la èvè nou. 3 Bondyé, Papa-la, é Jézikri, Gason a Papa-la, ké ban-nou favè-la nou pa mérité la, mizérikòd é lapé, èvè vérité é lanmou. 4 A pa ti kontan an kontan pas an vin sav kè déotwa adan timoun a-w ka maché adan lavérité, kon Papa-la mandé-nou. 5 É aprézan, madanm-la Bondyé chwazi la, mi sa an ka mandé-w : fò yonn enmé lòt. (An pa ka ékri-zòt on komandman ki nouvo, men sé menm-la nou ni la dépi odépa.) 6 É mi sa lanmou vlé di : kè nou kontinyé maché dapré komandman a-y. Mi komandman-la, kon zò tann-li dépi odépa : fò zò kontinyé maché adan lanmou. 7 Pas ni onlo moun malonnèt an mond-la, sé moun-la ki pa ka rèkonnèt kè Jézikri vin adan lachè. Sé yo ki malonnèt-la é antikris-la. 8 Tansyon a zòt, pou zò pa pèd tout bon biten travay a zòt pòté, men pou zò pé sa ni on rékonpans ki total. 9 Tout moun ki pa ka rété adan ansègnman a Kris é ki k’ay pli lwen ki ansègnman-lasa pa ini èvè Bondyé. Moun-la ki ka rété adan ansègnman-lasa, sé li ki ini, ki èvè Papa-la, ki èvè Gason-la. 10 Si on moun ka vin akaz a zòt é i pa ka vin èvè ansègnman-lasa, pa rèsèvwa-y akaz a zòt é pa di-y bonjou nonplis. 11 Pas moun-la ki ka di-y bonjou ka pawtisipé adan mové biten i ka fè. 12 An ni onlo biten a di-zòt, men an vé pa fè-y èvè papyé é èvè lank. An ni èspwa vin akaz a zòt pou palé ba zòt zyé dan zyé, pou zòt pé pa pli kontan ki sa. 13 Timoun a sè a-w, madanm-la Bondyé chwazi la, ka voyé bonjou ba-w.
18-24 NOVANM
TRÉZÒ KI AN PAWÒL A BONDYÉ | RÉVÉLASYON 1-3
Lèkti a Labib
(Révélasyon 1:1-11) Révélasyon Bondyé ba Jézikri pou i montré èsklav a-y sa ki pou rivé byento. É Jézi voyé zanj a-y, é grasa zanj-lasa, i sèvi èvè dé senbòl pou ba Jan, èsklav a-y, révélasyon-lasa. 2 Jan bay on témwagnaj anrapò èvè sa Bondyé di, é anrapò èvè témwagnaj-la Jézikri bay la, wi, anrapò èvè tousa i vwè. 3 Tchè-kontan pou moun-la ki ka li byen ho sa ki maké adan pwofési-lasa, é pou touséla ki ka tann é ki ka fè sa ki maké adan-y, pas lè-la ki fiksé la toupré rivé. 4 Mwen Jan, an ka ékri sé sèt lasanblé-la ki adan téritwa a Lazi : An ka swété kè zò ni favè-la nou pa mérité la é lapé, ki ka vin dè « sila ki la, ki té la é ki ka vin », dè sé sèt lèspri-la ki douvan twòn a-y, 5 é dè Jézikri, li ki sé Témwen fidèl la, li ki sé prèmyé pitit ki sòti adan lanmò é ki sé chèf a sé wa a latè la. Sila ki enmé-nou é ki libéré-nou dè péché an nou grasa san a-y — 6 li ki fè-nou vin wa é prèt pou sila ki sé Bondyé a-y, é ki sé Papa-y —, wi, i mérité yo ba-y glwa é puisans pou touttan. Amèn. 7 Gadé sa ! I ka vin adan sé niyaj-la, é toutmoun ké vwè-y, menm séla ki pèsé-y la. É akòz dè-y, tout tribi a latè ké bat lèstonmak a yo tèlman yo ké ni lapenn. Wi, amèn. 8 Mi sa Jéova Dyé di : « Sé mwen ki Alfa-la é sé mwen ki Oméga-la, sila ki la, ki té la é ki ka vin, Toupuisan-la. » 9 Mwenmenm, Jan, frè a zòt yo ka pèwsékité ansanm èvè zòt, é ki ké an wayòm-la èvè zòt é ki ka andiré èvè zòt ansanm èvè Jézikri, an té asi lilèt-la yo ka kriyé Patmòs pas an palé dè Bondyé é pas an bay on témwagnaj asi Jézi. 10 Grasa lèspri sen, an touvé-mwen an jou a Ségnè-la, é an tann on vwa fò dèyè do an mwen, kon on son a tronpèt, 11 ki di-mwen : « Sa ou ka vwè, maké-y adan on woulo é voyé-y ba sé sèt lasanblé-la : Éfèz, Èsmiwn, Pèwgam, Tiyati, Sawd, Filadèlfi é Laodisé. »
25 NOVANM–1é DÉSANM
TRÉZÒ KI AN PAWÒL A BONDYÉ | RÉVÉLASYON 4-6
Lèkti a Labib
(Révélasyon 4:1-11) Aprésa, gadé ! Mi sa an vwè : on pòt wouvè adan syèl-la, é prèmyé vwa an tann ka palé ban mwen té ka sanm son a on tronpèt. I di-mwen : « Monté-w kotésit, é an ké fè-w vwè sa ki pou rivé. » 2 Tousuit apré, an touvé-mwen anba pouvwa a lèspri sen, é gadé ! on twòn an syèl-la, é té ni on moun sizé asi twòn-la. 3 É moun-la ki té sizé la té ka kléré kon wòch-la yo ka kriyé jasp é kon wòch-la yo ka kriyé sardwàn. É toutalantou a twòn-la té ni on lawkansyèl ki té ka kléré kon wòch-la yo ka kriyé émwòd. 4 Toutalantou a twòn-la, té ni 24 twòn, é an vwè 24 ansyen ki té sizé asi sé twòn-lasa, èvè lenj blan asi yo, é yo té ni kouwòn an lò asi tèt a yo. 5 Zéklè, vwa, é tonnè té ka sòti an twòn-la, é douvan twòn-la té ni sèt lanp èvè difé adan. Yo ka rèprézanté sèt lèspri a Bondyé. 6 Douvan twòn-la, té ni on biten ki té ka sanm on lanmè an vè, kon kristal. Anmitan twòn-la é alantou a twòn-la, té ni kat kréyati vivan ki té plen zyé ki douvan ki dèyè. 7 Prèmyé kréyati vivan la té ka sanm on liyon, dézyèm kréyati vivan la té ka sanm on jenn toro, figi a twazyèm kréyati vivan la té kon figi a on nonm, é katriyèm kréyati vivan la té ka sanm on zozyo rapas ka volé. 8 Chak sé kat kréyati vivan la té ni sis zèl ki té kouvè èvè zyé pa anho é pa anba. É lajouné kon lannuit, yo té ka di akontinyé : « Jéova Dyé, Toupuisan-la, li ki té la é ki la é ki ka vin, i sen, i sen, i sen. » 9 Chakfwa sé kréyati vivan la ka ba sila ki sizé asi twòn-la, sila ki ka viv pou touttan la, glwa é lonnè, é chakfwa yo ka di-y mèsi, 10 sé 24 ansyen-la ka mété-yo ajounou douvan sila ki sizé asi twòn-la é yo ka adoré sila ki ka viv pou touttan la, é yo ka jété kouwòn a yo douvan twòn-la, toupannan yo ka di : 11 « Jéova, Dyé an nou, ou mérité rèsèvwa glwa-la é lonnè-la é ou mérité ni tout puisans-la ou ni la, pas sé vou ki kréyé tout biten, é si yo vin ka ègzisté é si ou kréyé-yo, sé pas ou té vlé. »