Sous a sa nou kay étidyé adan Kayé Vi é ministè
6-12 JANVYÉ
TRÉZÒ KI AN PAWÒL A BONDYÉ | JÉNÈZ 1-2
Lèkti a Labib
(Jénèz 1:1-19) Okoumansman, Bondyé kréyé lèsyèl é latè. 2 Latè pa té ni pon fòm é pa té ni ayen anlè a-y, é nwèsè té ka kouvè sé dlo-la ; é fòs-la Bondyé ka sèvi èvè-y la té ka déplasé-y anlè sé dlo-la. 3 É Bondyé di : « Fò limyè-la parèt. » É limyè-la parèt. 4 Aprésa Bondyé vwè kè limyè-la té bon, é i koumansé séparé limyè é nwèsè. 5 Bondyé kriyé limyè-la « lajouné » é i kriyé nwèsè-la « lannuit ». Vin ni on swa é vin ni on maten : prèmyé jou. 6 Aprésa Bondyé di : « Fò i ni on èspas ant sé dlo-la pou séparé-yo an dé. » 7 Alò Bondyé mété-y ka fè èspas-la é i mété-y ka séparé sé dlo-la ki té anba èspas-la é sé dlo-la ki té anho a èspas-la. É sé konsa sa fèt. 8 Bondyé kriyé èspas-la « syèl ». Vin ni on swa é vin ni on maten : dézyèm jou. 9 Aprésa Bondyé di : « Fò sé dlo-la ki anba syèl-la sanblé onsèl koté é fò tè ki sèk parèt. » É sé konsa sa fèt. 10 Bondyé kriyé tè sèk la « tè », men i kriyé sé dlo-la ki té sanblé la « lanmè ». É Bondyé vwè sa té bon. 11 Aprésa Bondyé di : « Fò zèb pousé si latè é plant ki ka bay grenn osi. Fò pyébwa ki ka pòté fwi pousé osi, sèlon èspès a yo, é fò-yo bay fwi èvè grenn asi latè. » É sé konsa sa fèt. 12 Zèb koumansé pousé si latè, é plant ki ka fè grenn èvè pyébwa ki ka bay fwi é grenn, sèlon èspès a yo, koumansé pousé. Alò Bondyé vwè sa té bon. 13 Vin ni on swa é vin ni on maten : twazyèm jou. 14 Aprésa Bondyé di : « Fò limyè parèt an syèl-la pou séparé lajouné é lannuit. Yo ké sèvi sign ki pou sé sézon-la, ki pou sé jou-la, ki pou sé lanné-la. 15 Yo ké sèvi limyè an syèl-la pou kléré latè. » É sé konsa sa fèt. 16 É Bondyé mété-y ka fè sé dé gran limyè-la : gran-la pou kléré pannan lajouné é piti-la pou kléré pannan lannuit. I fè sé zétwal-la osi. 17 Sé konsa Bondyé mété-yo an syèl-la pou kléré latè, 18 pou kléré pannan lajouné é pannan lannuit, é pou séparé limyè-la é nwèsè-la. Alò Bondyé vwè sa té bon. 19 Vin ni on swa é vin ni on maten : katriyèm jou.
13-19 JANVYÉ
TRÉZÒ KI AN PAWÒL A BONDYÉ | JÉNÈZ 3-5
Lèkti a Labib
(Jénèz 4:17–5:8) Aprésa, Kayen vin ni rèlasyon sèksyèl èvè madanm a-y ; madanm a-y tonbé ansent é i vin fè Énòk. Aprésa Kayen konstwi on vil é i ba vil-la non a gason a-y Énòk. 18 Plita, Énòk vin papa a Irad. Irad vin papa a Méouyaèl, Méouyaèl vin papa a Métouchaèl é Métouchaèl vin papa a Lamèk. 19 Lamèk vin ni dé madanm. Non a prèmyé-la sé té Ada é dézyèm-la sé té Zila. 20 Ada fè Jabal. Jabal vin zansèt a touséla ki ka rété anba tant é ki ka nouri bèt. 21 Non a frè a-y sé té Joubal. Joubal vin zansèt a touséla ki ka jouwé awp é a touséla ki ka jouwé flit. 22 Li Zila, i fè Toubal-Kayen, ki té ka fè toutkalté zouti an kuiv é an fè. Sè a Toubal-Kayen, sé té Naama. 23 Lamèk maké sé pawòl-lasa pou sé madanm a-y la, Ada é Zila : « Kouté vwa an mwen, zòt madanm a Lamèk, kouté pou tann sa an ka di : An tchouyé on nonm ki té blésé-mwen, wi, on jennboug ki té ban-mwen kou. 24 Si fò-yo vanjé Kayen 7 fwa, alò fò-yo vanjé Lamèk 77 fwa. » 25 Adan vin ni rèlasyon sèksyèl èvè madanm a-y ankò, é madanm a-y fè on tigason. Madanm a-y kriyé-y Sèt, pas, kon i té ka di, « Bondyé ban-mwen ondòt pitit anplas a Abèl, pas Kayen tchouyé-y ». 26 Sèt vin ni on gason osi ; i kriyé-y Énòch. An tan-lasa, yo koumansé kriyé non a Jéova.
5 Mi liv a istwa a Adan. Lè Bondyé kréyé Adan, Bondyé fè-y on mannyè pou i sanm-li. 2 I kréyé-yo mal é fimèl. Jou-la i kréyé-yo la, i béni-yo é i kriyé-yo « moun ». 3 Adan viv 130 an, aprésa i vin papa a on gason ki té ka sanm-li, ki té pòtré a-y, é i kriyé-y Sèt. 4 Apré i vin papa a Sèt, Adan viv 800 an. É i vin ni tigason é tifi. 5 Sé konsa Adan viv 930 an antout, aprésa i mò. 6 Sèt viv 105 an, aprésa i vin papa a Énòch. 7 Apré i vin papa a Énòch, Sèt viv 807 an. É i vin ni tigason é tifi. 8 Sé konsa Sèt viv 912 an antout, aprésa i mò.
20-26 JANVYÉ
TRÉZÒ KI AN PAWÒL A BONDYÉ | JÉNÈZ 6-8
Lèkti a Labib
(Jénèz 6:1-16) Lè koumansé ni onlo nonm asi latè é lè yo fè tifi, 2 sé gason a vré Dyé-la rann-yo kont kè fi a lézòm té bèl. Kifè yo mèt-yo ka chwazi touséla yo té vlé la pou mayé èvè yo. 3 Alò Jéova di : « An pé ké sipòté lòm touttan konsa, paskè sé chè tousèl i yé. Sé pousa i ké viv 120 an. » 4 A moman-lasa sé Néfilim-la té asi latè, é aprésa osi. An tan-lasa, sé gason a vré Dyé-la té ni rèlasyon sèksyèl èvè fi a lézòm, é sé fi-la ba-yo tigason : sé té sé boug solid la ki té ni la an tan lontan, kè toutmoun té konnèt. 5 Alò Jéova vwè kè lézòm té ka fè onlo méchansté asi latè, é kè sé yenki mové biten yo té ni an tèt a yo. 6 Jéova règrété i té mèt lézòm si latè, é sa fè-y lapenn. 7 É Jéova di : « Sé nonm-la an kréyé la, an kay woté-yo asi latè, ki sé nonm-la, ki sé zannimo domèstik la, ki sé zannimo-la ki ka ranpé la, ki sé zannimo-la ki ka volé la, pas an ka règrété an fè-yo. » 8 Men Noé té ni favè a Jéova. 9 Mi istwa a Noé. Noé sé té on nonm jis. I pa té ni ayen a vwè èvè sé moun-la ki té ka viv an tan a-y la, i té fidèl. Noé té ka maché èvè vré Dyé-la. 10 Rivé onlè, Noé vin ni twa gason : Sèm, Kam é Jafèt. 11 Men latè té vin mové an zyé a vré Dyé-la, é i té plen vyolans. 12 Wi, Bondyé gadé latè é i té mové. Toutmoun asi latè té ka menné on vyé vi. 13 Alò Bondyé di Noé : « An désidé détwi toutmoun, paskè latè plen vyolans akòz dè yo. Sé pousa, an kay détwi-yo é an kay mèt latè anchèpi. 14 Fè on lawch èvè bwa-gra. Ou ké fè plizyè pyès adan-y é ou ké kouvè-y èvè goudwon, ki andidan ki andéwò. 15 Mi kijan ou ké fè lawch-la : i ké fè 300 koudé longè, 50 koudé lajè é 30 koudé wotè. 16 Ou ké fè on finèt a on koudé anba tèt a lawch-la pou fè limyè rantré. Ou ké mèt pòt-la asi kan a lawch-la, ou ké ba-y on prèmyé étaj, on dézyèm étaj é on twazyèm étaj.
27 JANVYÉ – 2 FÉVRIYÉ
TRÉZÒ KI AN PAWÒL A BONDYÉ | JÉNÈZ 9-11
Lèkti a Labib
(Jénèz 10:6-32) Gason a Kam sé té Kouch, Mizrayim, Pout é Kanaan. 7 Gason a Kouch sé té Séba, Avila, Sabta, Raama é Sabtéka. Gason a Raama sé té Saba é Dédàn. 8 Kouch sé té papa Nèmwòd. Nèmwòd sé prèmyé nonm ki vin puisan asi latè. 9 Sé té on gran chasè ki té lènmi èvè Jéova. Sé pousa ni on pawòl ki ka di : « Menmjan ki Nèmwòd, on gran chasè ki té lènmi èvè Jéova. » 10 Prèmyé vil a wayòm a-y sé té Babèl, Érèk, Akad é Kalné, ki té an péyi Chinéa. 11 Adan péyi-lasa, i ay an Asiri é i konstwi Niniv, Réobòt-Iw, Kala 12 é Résèn, ant Niniv é Kala : sé gran vil-la. 13 Mizrayim sé té papa Loudim, Anamim, Léabim, Naftouyim, 14 Patwousim, Kaslouyim (zansèt a sé Filisten-la) é Kaftorim. 15 Kanaan sé té papa Sidon, prèmyé timoun a-y, é sé té papa Èt, 16 é sé té papa Jébizéen-la, Amorit-la, Giwgachit-la, 17 Ivit-la, Awkit-la, Sinit-la, 18 Awvadit-la, Zémarit-la é Amatyen-la. Aprésa, fanmi a sé Kananéyen-la vin simé toupatou. 19 Kifè, téritwa a sé Kananéyen-la té ka sòti Sidon pou ay jis Géra, owa Gaza, é jis Sodòm, Gomò, Adma é Zéboyim, owa Lacha. 20 Sé yo ki gason a Kam, dapré fanmi a yo é lang a yo, dapré péyi a yo é nasyon a yo. 21 Sèm, ki té zansèt a tout timoun a Ébè é frè a Jafèt, pli gran gason-la, té ni timoun osi. 22 Gason a-y sé té Élam, Asou, Awpakchad, Loud é Aram. 23 Gason a Aram sé té Ouz, Oul, Gétè é Mach. 24 Awpakchad sé té papa Chéla, é Chéla sé té papa Ébè. 25 Ébè té ni dé gason. Yonn yo té ka kriyé Pélèg, pas an tan a-y, yo vin simé pèp a latè toupatou. Yo té ka kriyé frè a-y Jòktàn. 26 Jòktàn sé té papa Almodad, Chélèf, Azawmavèt, Jéra, 27 Adoram, Ouzal, Dikla, 28 Obal, Abimaèl, Saba, 29 Ofir, Avila é Jobab. Tout sé nonm-lasa sé té gason a Jòktàn. 30 Téritwa a yo té ka koumansé dépi Mécha pou ay jis Séfa, on réjyon a Lès ki té ni onlo montangn. 31 Sé yo ki gason a Sèm dapré fanmi a-yo é lang a yo, dapré péyi a yo é nasyon a yo. 32 Sé yo ki fanmi a gason a Noé dapré la fanmi a yo sòti é dapré nasyon a yo. Sé yo ki zansèt a tout nasyon ki vin simé toupatou si latè apré Délij-la.