LÈSON 02

Labib ka pwomèt-nou kè lavi ké pi bèl dèmen

Vèwsyon papyé

Toupatou asi latè, onlo moun ka jwenn pwoblèm ki ka istrésé-yo oben ki ka fè-yo soufè. Èskè sé ka a-w ? Pétèt kè ou malad, oben kè ou pèd on moun ou té enmé. Kifè, ou pé ka mandé-w : « Ès lavi ké vin pi bèl on jou ? » Bib-la ka ba-w on èspwa, é a pa on èspwa a malpapay.

1. Ki èspwa Bib-la ka ban-nou ?

Bib-la ka di-nou poukwa nou ka jwenn tousa pwoblèm, men i ka anonsé-nou on bon nouvèl osi : tout pwoblèm an nou ké disparèt talè. Sé pwomès-la ki an Bib-la ka ban-nou « on landèmen é on èspwa » (li Jérémi 29:11, 12). Sé pwomès-lasa ka édé-nou sipòté lè nou ka jwenn difikilté. Yo ka édé-nou rété pozitif, é grasa yo, tchè an nou ka kontan poubon.

2. Ki bèl landèmen Labib ka pwomèt-nou ?

Labib ka di kè, talè, « lanmò pé ké la ankò » é kè « pé ké tini ni dèy, ni kri, ni doulè ankò » (li Révélasyon 21:4). Tout pwoblèm ki ka fè-nou mèt men si tèt ké disparèt. Moun pé’é ka vwè mizè ankò ; moun pé’é ka pwofité si moun ankò ; ni maladi, ni lanmò pé’é la ankò. Labib ka di kè nou ké viv adoumanman adan on paradi asi latè.

3. Ka ou pé fè pou ou pé sèten kè sé pwomès-la ki an Bib-la ké réyalizé ?

Onlo moun ka èspéré kè mond-la nou ka viv adan-y la ké vin méyè, men yo pa ni pon garanti kè sa ké fèt. Pawkont, pou sé pwomès-la ki adan Bib-la, sa diféran : nou pé sèten yo ké réyalizé. Pou ou pé sa sèten dè sa, fò ou « pran tan ègzaminé Lézékriti byen » (Akt 17:11). Sé lè ou ké pran tan étidyé Bib a-w, ou ké sav si ou pé ni konfyans adan sé pwomès-la i ka fè-w la.

AN-NOU FOUYÉ PI FON

An-nou ègzaminé kijan lavi ké yé lè sé pwomès-la ki an Bib-la ké réyalizé. É an-nou vwè kijan èspwa-la Bib-la ka ban-nou la pé édé-nou dépi konnyéla.

On séri imaj : Plizyè imaj ka montré ki diférans ki ni ant vi-la nou ka viv la jòdijou é vi-la Bib-la ka pwomèt-nou pou dèmen. Aprésa, yo ké èspliké-nou sa nou ka vwè asi chak imaj.

4. Bib-la ka pwomèt-nou kè nou ké pé viv pou touttan san pon pwoblèm

Jété on koudzyé asi sé pwomès-la ki adan tablo-la ki pi ba la. Yo ka touvé-yo an Bib-la. Kilès ou pi enmé é poukwa ?

Apré chak pwomès, yo ka di-w ola yo yé an Bib-la. Li sé vèwsé-lasa é réfléchi asi sé kèsyon-lasa :

Apré ou li sé pasaj-lasa, kijan ou ka santi-w ? Ès sa pòté on biten dè bon ba-w ? Si fanmi a-w é zanmi a-w ka li sé pasaj-lasa, ès ou ka di sa ké fè-yo dibyen ?

Imajiné-w ka viv on koté

PONMOUN...	TOUTMOUN...
pé’é ka soufè, pé’é ka vyéyi, é pé’é ka mò (Izayi 25:8).	ké wouvwè moun yo té enmé, pas yo ké résisité asi latè (Jan 5:28, 29).
pé’é tonbé malad, é pé’é vin enfim (Izayi 33:24 ; 35:5, 6).	ké byen pòtan é ké plen fòs (Jòb 33:25).
pé’é pwofité asi ponmoun (Izayi 32:16, 17).	ké ni manjé pou tann-é-konprann, on kaz pou yo alèz a yo, é on travay entérésan toubònman (Sòm 72:16 ; Izayi 65:21, 22).
pé’é soufè akòz dè lagè (Sòm 46:9).	ké adoumanman pas ké ni lapé toupatou asi latè (Sòm 37:11).
pé’é rété ka réfléchi asi mové biten ki ja pasé (Izayi 65:17).	ké ni méyè vi-la ki tini la pou touttan (Sòm 37:29).

On tigason té malad é jòdijou i byen pòtan. I ka bo manman-y.

On misyé ki té ni on bèl laj wouvin jenn é i ka bouwé on bouwèt plen légim.

5. Sé pwomès-la ki an Bib-la pé chanjé vi a-w

Konm ni onpakèt pwoblèm asi latè, sa ka kasé 2 bra a onlo moun oben sa ka jis fè-yo fè kòlè. Ni sa ki ka goumé pou éséyé ranjé sitiyasyon-la. Bib-la ka pwomèt kè sitiyasyon-la ké vin méyè, é lidé-lasa ja édé onlo moun. Gadé kijan sa édé on madanm. Gadé VIDÉO-la é fè on ti kozé asi sé kèsyon-la ki ka vin la.

VIDÉO : An té vlé lité kont pwofitasyon (4:07)

On séri imaj : Plizyè imaj a vidéo-la « An té vlé lité kont pwofitasyon ». 1. Rafika, lè i té jenn ; i ka rékòlté koton èvè moun ki sòti menm koté ki-y. 2. Prèmyé fwa Rafika ay adan on lasanblé a Témwen a Jéova, i rété èstèbèkwè lè i vwè kijan moun a diféran nasyon té ka antann-yo byen.

Ki enjistis Rafika pa té ka rivé sipòté ?
Menmsi kalité enjistis-lasa ka ègzisté toujou, kijan Bib-la édé Rafika ?

Labib ka pwomèt-nou kè dèmen lavi ké pi bèl. Lèwvwè nou ka kwè adan pwomès-lasa, sa ka ban-nou fòs pou nou pa dékourajé é pou nou rivé about a difikilté nou ka jwenn. Li Pwovèb 17:22 é Women 12:12, é fè on ti kozé asi sé kèsyon-lasa :

Kon nou sòti vwè, Labib ka anonsé kè dèmen lavi ké pi bèl. Ès ou ka di mésaj-lasa té’é pé rann vi a-w pi bèl dépi konnyéla ? Poukwa ou ka di sa ?

MI SA MOUN KA DI : « Sé pwomès-la ki an Bib-la, sé blag-a-mas ! »

Sèlon vou, poukwa on moun dwèt vérifyé limenm a-y, si sa Labib ka di sé lavérité ?

ON TI RÉZIMÉ

Adan Bib-la, ni onpakèt pwomès ki ka anonsé kè dèmen lavi ké bèl toubònman. É èspwa-lasa ka édé-nou rivé about a difikilté nou ka jwenn.

Ka ou woutyenn

Poukwa fò sé moun-la konnèt sa Bondyé ka pwomèt ?
Ka Labib ka pwomèt pou dèmen ?
Sé pwomès-la ki an Bib-la pé édé-w viv pibyen dépi konnyéla. Kijan ?

Jou-la lèson-la fin la :

On biten ou pé éséyé fè

Wouli sé vèwsé-la ki an lèson-lasa, pou ou pé sa konnèt sé pwomès-la ki an Bib-la pibyen.

Ondòt biten ou pé fè :

Ondòt biten ou pé fè

AY GADÉ SA OSI

Déotwa awtik ki ka montré kè èspwa-la Bib-la ka ban-nou la ka ban-nou fòs.

« L’espoir : où le trouver ? » (Réveillez-vous ! a 22 avril 2004)

Lè on moun ka soufè èvè on maladi ki pa’a géri, èspwa-la Bib-la ka ba-y la pé édé-y. An-nou vwè kijan.

« Viv èvè on maladi ki pa’a géri : ès Labib pé édé-w ? » (on awtik ki asi jw.org)

Gadé vidéo-lasa, é imajiné kè vou é fanmi a-w ka viv an paradi-la Bib-la ka pwomèt la.

Imagine ce jour (3:37)

Ni on boug ki té ka goumé pou pwotéjé zannimo, é lè i vin konnèt sa Labib ka pwomèt, vi a-y chanjé bout-pou-bout. Pran tan li istwa a-y.

« Je ne pense plus devoir changer le monde » (Tou dè Gad a 1^é juiyé 2013 an fransé)