LÈSON 33
Sa Wayòm-la ké fè
Wayòm a Bondyé ja ka gouvèné an syèl-la. Talè, i ké mèt on lòd asi latè, é sa ké pòté onlo bon biten. An-nou pran tan gadé sa.
1. Kijan wayòm a Bondyé kay menné lapé é lajistis asi latè ?
Sé Jézi ki wa adan wayòm a Bondyé. Adan on lagè yo ka kriyé Awmagédon, i ké détwi tout sé moun méchan la é sé mové gouvènman-la (Révélasyon 16:14, 16). Lè sa ké fèt, pwomès-la ki maké an Sòm 37:10 ké réyalizé : « On titak tan ankò, é sé méchan-la pé ké la ankò ». Jézi ké sèvi èvè Wayòm-la pou mèt lapé é lajistis toupatou asi latè (li Izayi 11:4).
2. Kijan lavi ké yé lè volonté a Bondyé ké fèt asi latè ?
Mi sa Labib ka di : « Moun ki jis, latè sé ké ta yo, é yo ké viv anlè-y pou touttan » (Sòm 37:29). Sa ké fèt lè wayòm a Bondyé ké ka gouvèné. Imajiné-w ! Toutmoun ké ka aji èvè jistis é anplisdisa, toutmoun ki asi latè ké enmé Jéova, é yo ké enmé pwochen a yo. Ponmoun pé’é tonbé malad ankò, é nou ké viv pou touttan.
3. Ka wayòm a Bondyé ké fè lè i ké fin bat èvè sé méchan-la ?
Lèwvwè sé méchan-la ké disparèt, Jézi ké gouvèné pannan 1000 an. Pannan péryòd-lasa, Jézi é sé 144000 la ké édé lézimen vin pawfè. Lè sé 1000 lanné-la ké bout, latè ké vin on bèl ti paradi. Toutmoun ké ni tchè-kontan pas yo ké ka fè volonté a Jéova. Aprésa, Jézi ké woumèt Pap’a-y Wayòm-la. ‘Non a Jéova ké vin sen’ kon sa poto’o jen fèt (Matyé 6:9, 10). Toutmoun ké pé vwè an dé zyé a yo kè Papa Jéova sé on bon dirijan ki ka pran swen dè pitit a-y. Pou fin, Jéova ké détwi Satan, sé démon-la, é tout moun ki chwazi ba-y do (Révélasyon 20:7-10). Tout sé bon biten-la Wayòm-la ké pòté la ké diré pou touttan.
AN-NOU FOUYÉ PI FON
Nou pé sèten kè Bondyé ké sèvi èvè Wayòm-la pou i pé sa akonpli sa Labib ka pwomèt pou dèmen. An-nou vwè sa.
4. Wayòm a Bondyé ké fin bat èvè tousélézòt gouvènman-la
« Lòm ka dominé lòm pou fè-y soufè » (Éklézyas 8:9). Ni onlo enjistis asi latè. Grasa wayòm a-y, Jéova ké mèt on lòd adan tousa.
Li Danyèl 2:44 é 2 Tésalonisyen 1:6-8, é fè on ti kozé asi sé kèsyon-lasa :
Ka Jéova é Jézi ké fè èvè tout sé gouvènman-la é sipòtè a yo ?
Dapré sa ou aprann asi Jéova é Jézi, poukwa ou sèten yo ké aji on mannyè ki jis ?
5. Jézi sé méyè wa-la ki tini la
Jézi ké édé toutmoun ki asi latè. I ké fè-yo dibyen toubònman ! Gadé VIDÉO-la, konsa ou ké vwè kè Jézi ja montré kè i anvi édé moun é kè anplisdisa, Jéova ba-y pouvwa pou i pé fè sa.
Lè i té si latè, Jézi bay on lidé asi sa Wayòm-la ké fè. Pawmi tout sé pwomès-la ki pi ba la, kilès adan yo ou té’é anvi vwè an dé zyé a-w ? Pou chak sé pwomès-lasa, li sé vèwsé-la ki kay èvè yo la.
ASI LATÈ, JÉZI... |
ÉTAN AN SYÈL-LA, JÉZI KÉ... |
|---|---|
|
|
|
|
|
|
|
|
6. On bèl landèmen grasa wayòm a Bondyé
Grasa Wayòm-la, Jéova ké fè sa i té prévwa odépa pou lézimen. Yo ké viv pou touttan asi latè adan on paradi. Jéova ké sèvi èvè Jézi pou réyalizé pwojé a-y. Gadé VIDÉO-la pou vwè sa.
Li Sòm 145:16 é fè on ti kozé asi kèsyon-lasa :
Jéova ké « rasazyé anvi a tousa ki ka viv ». Ka ou ka rèsanti lè ou ka réfléchi asi lidé-lasa ?
MI SA MOUN KA DI : « Si noutout ka travay ansanm-ansanm, ni mwayen réglé tout pwoblèm a limanité. »
Ni onpakèt pwoblèm asi latè é sé wayòm a Bondyé tousèl ki ké pé réglé-yo. Ki pwoblèm ésa ?
ON TI RÉZIMÉ
Wayòm a Bondyé ké fè tousa Bondyé ka atann dè-y. I ké fè latè vin on paradi, é sèwvitè a Jéova ké viv adan-y pou touttan.
Ka ou woutyenn
Kijan wayòm a Bondyé ké fè non a Jéova vin sen ?
Tout sé pwomès-la ki an Bib-la ké akonpli grasa wayòm a Bondyé. Poukwa ou pé sèten dè sa ?
Adan tout sé pwomès-la wayòm a Bondyé ké réyalizé la, ka ou présé vwè ?
AY GADÉ SA OSI
Ka sa vlé di Awmagédon ?
« Lagè a Awmagédon, ka sa yé ojis ? » (on awtik ki asi jw.org)
Gadé sa ki ké fèt pannan péryòd-la Jézi kriyé « gwo tribilasyon-la » (Matyé 24:21).
On fanmi ka imajiné jan vi a-y ké bèl an paradi-la.
On boug ki té ka milité kont gouvènman a péyi a-y touvé répons a kèsyon i té ka pozé-y. I ka èspliké sa adan awtik-la « J’étais tourmenté par de nombreuses questions ».
« La Bible transforme des vies » (Tou dè Gad a 1é janvyé 2012 an fransé)