LÈSON 20
Kijan lasanblé-la òwganizé ?
Jéova sé on Dyé ki enmé biten ki byen annòd (1 Korentyen 14:33). Sé pousa sèwvitè a-y byen òwganizé osi. Kijan Témwen a Jéova ka fonksyonné ? Ka nouchak pé fè pou tout biten maché byen ?
1. Kimoun ki antèt a lasanblé-la ?
« Kris sé chèf a lasanblé-la » (Éfézyen 5:23). Dépi an syèl-la, sé-y ka dirijé tousa sèwvitè a Jéova ka fè si tout latè. Jézi mèt « èsklav fidèl é prévwayan la » anplas. Èsklav-lasa sé déotwa ansyen ki ni onlo èkspéryans. Yo ka kriyé gwoup-lasa « Komité santral » osi (li Matyé 24:45-47). O prèmyé syèk, sé apòt-la é sé ansyen-la ki té a Jérizalèm té ka dirijé tout sé lasanblé-la. Jòdijou, Komité santral la ka fè menm biten (Akt 15:2). Men sa pa vé di kè sé yo ki chèf a òwganizasyon an nou ! Yo ka lésé Jéova gidé-yo, é pousa yo k’ay gadé ka i ka di an Bib-la. É anplisdisa, yo ka suiv dirèksyon-la Jézi ka ba-yo la.
2. Ka ki on ansyen é ka i ka fè adan lasanblé-la ?
Sé ansyen-la sé dé nonm ki fidèl, é ki ka sèvi Jéova dépi plizyè lanné. Yo ka sèvi èvè Bib-la pou anségné, pou édé é pou ankourajé sèwvitè a Jéova. Ponmoun pa’a péyé-yo pou yo fè sa. Okontrè, yo ka travay pou lasanblé-la ‘dè bonkè douvan Bondyé ; yo pa’a fè-y pas yo té’é enmé ni on biten anrètou men yo ka pòté mannèv lè yo ka fè-y’ (1 Pyè 5:1, 2). Ni déotwa frè ki ka édé-yo é kè yo ka kriyé asistan. Sé asistan-la pé vin ansyen si yo kontinyé pwogrésé.
Komité santral la ka chwazi déotwa ansyen pou mèt-yo rèsponsab a siwkonskripsyon. Yo ka vizité plizyè lasanblé lokal pou ankourajé-yo é pou di-yo ki dirèksyon pou yo pran. Grasa sa ki maké an Bib-la, sé rèsponsab a siwkonskripsyon la ka nonmé sé ansyen-la é sé asistan-la (1 Timoté 3:1-10, 12 ; Tit 1:5-9).
3. Ki rèsponsabilité chak Témwen a Jéova tini ?
Tout sé frè é sè-la ka « louwé non a Jéova ». Yo ka fè sa lè yo ka fè on komantè, lè yo ka fè on diskou oben on démonstrasyon, lè yo ka chanté oben lè yo ka fè tousa yo pé pou ay préché (li Sòm 148:12, 13).
AN-NOU FOUYÉ PI FON
An-nou vwè ki jan dè chèf Jézi yé, ki éfò sé ansyen-la ka fè pou imité-y, é kijan nou pé travay men-dan-lamen èvè Jézi é sé ansyen-la.
4. Jézi sé on chèf ki janti
Jézi ka fè-nou on bèl envitasyon toubònman. Li Matyé 11:28-30 é fè on ti kozé asi kèsyon-lasa :
Lè ou ka lésé Jézi dirijé-w, kijan ou ka santi-w ?
Kijan sé ansyen-la ka imité Jézi ? Gadé VIDÉO-la.
Labib ka èspliké on mannyè ki klè, kijan pou sé ansyen-la fè travay a yo adan lasanblé-la.
Li Izayi 32:2 é 1 Pyè 5:1-3, é fè on ti kozé asi sé kèsyon-lasa :
Kon Jézi, sé ansyen-la ka fè tousa yo pé pou yo konsolé sé pwoklamatè-la. Lè ou ka vin sav sa, ka ou ka rèsanti ?
Ki dòt biten sé ansyen-la ka fè pou imité Jézi ?
5. Sé ansyen-la ka montré-nou kijan pou nou fè
Kijan Jézi vlé sé ansyen-la konsidéré travay-la yo ka fè la ? Gadé VIDÉO-la.
Jézi èspliké on mannyè ki klè, ki konpòwtasyon sé ansyen-la dwèt ni adan lasanblé-la. Li Matyé 23:8-12 é fè on ti kozé asi kèsyon-lasa :
Lè ou ka gadé ka Labib ka mandé sé ansyen-la fè é lè ou ka vwè ka sé chèf a sélézòt rèlijyon-la ka fè, ka ou ka konstaté ?
Sé ansyen-la ka fè tousa ki fo pou rété bon bon zanmi èvè Jéova é yo ka édé fanmi a yo an sans-lasa osi.
Chak frè é sè ki adan lasanblé-la ni onlo valè pou sé ansyen-la.
Sé ansyen-la ka pòté bon mannèv an prédikasyon.
A pa enki diskou sé ansyen-la ka fè. Yo ka nétwayé sal-la é yo ka fè dòt biten ankò.
6. Sé ansyen-la bizwen nou kolaboré èvè yo
Labib ka di-nou kè lè sé ansyen-la ka pran on désizyon, fò-nou soutyenn-yo, pas sé on biten enpòwtan toubònman. Li Ébré 13:17 é fè on ti kozé asi sé kèsyon-lasa :
Poukwa Labib ka di kè fò-nou kouté séla ki ka dirijé-nou la ? Ka ou ka pansé dè sa ?
Li Lik 16:10 é fè on ti kozé asi kèsyon-lasa :
Pou ki biten fò-nou kolaboré èvè sé ansyen-la, menmsi sa yo ka mandé-nou fè ka sanm sa i pa ni onlo enpòwtans ?
MI SA MOUN KA DI : « Ou pa bizwen rantré adan pon rèlijyon pou adoré Bondyé. »
Sèlon vou, ki bon biten sa pé pòté ba-w lè ou ka adoré Bondyé èvè frè é sè a lasanblé-la ?
ON TI RÉZIMÉ
Jézi sé chèf a lasanblé-la. Sé ansyen- la ka fè sa Jézi ka mandé-yo. Nou ka travay men-dan-lamen èvè sé ansyen-la pas yo ka ankourajé-nou é yo ka ban-nou on bèl ègzanp.
Ka ou woutyenn
Kimoun ki chèf a lasanblé-la ?
Kijan sé ansyen-la ka édé lasanblé-la ?
Ki rèsponsabilité chak Témwen a Jéova tini ?
AY GADÉ SA OSI
Mi on vidéo ki ka montré jan sé frè a Komité santral la é sé ansyen a lasanblé-la enmé sé frè é sè-la toubònman.
Vidéo-lasa ka montré ki travay on rèsponsab a siwkonskripsyon ka fè.
Gadé ki plas on madanm ni adan lasanblé-la.
Gadé ki sakrifis sé ansyen-la paré a fè pou ankourajé frè é sè a yo.
« Les anciens, “compagnons de travail pour notre joie” » (Tou dè Gad a 15 janvyé 2013 an fransé)