LÈSON 22
Ka ou pé fè pou préché bon nouvèl-la ?
Toupannan ou ka aprann sé vérité-la ki an Bib-la, ou dwèt ka di an tchè a-w : « Men fò toutmoun okouran a sa ! » É sé vré sa, piskè toutmoun bizwen konnèt sé vérité-la ki an Bib-la. Men lè ou ka sonjé kè fò ou ké palé dè sa ou ka aprann èvè dòt moun, sa dwèt ka istrésé-w. Si sé ka a-w, an-nou vwè ka ou pé fè pou latranblad pa pran lanmen asi-w é pou ou ni tchè-kontan lè ou ka préché bon nouvèl-la.
1. Kijan ou pé palé dè sa ou ka aprann èvè moun ou konnèt ?
Mi sa disip a Jézi di : « Nou pé pa arété palé dè sé biten-la nou vwè la é dè sé biten-la nou tann la » (Akt 4:20). Tèlman yo té enmé lavérité, yo té anvi palé toutmoun dè sa yo té ka aprann. Ès ou ka rèsanti menm biten-la ? Si sé ka a-w, éséyé touvé on mwayen pou ou palé dè sa ou ka aprann èvè fanmi a-w é zanmi a-w. Men pa oubliyé fè sa èvè onlo rèspé (li Kolosyen 4:6).
Bon ti konsèy pou koumansé préché
Lè ou ka kozé èvè on moun ki an fanmi a-w é kè ou anvi palé-y dè on biten ki an Bib-la, mi sa ou pé di-y : « Simenn-lasa an aprann on biten ki té tèlman entérésan ! Ban’an ba-w fré-la bay ! »
Si ou ni on zanmi a-w ki malad oben ki enkyèt, li on vèwsé ba-y pou pé sa ankourajé-y.
Si on kolèg-travay a-w mandé-w kijan ti wikenn a-w pasé, ou pé palé-y dè on biten ou aprann adan étid a-w oben dè on biten ou tann an réinyon.
Fè zanmi a-w konnèt sit Entèwnèt an nou jw.org.
Ou pé envité dòt moun adan étid a-w, oben montré-yo kijan yo pé mandé on étid asi jw.org.
2. Si ou ni lentansyon préché èvè lasanblé-la, sé on bon biten toubònman. Poukwa nou ka di sa ?
Disip a Jézi pa té ka préché bon nouvèl-la enki ba moun yo té konnèt. Jézi ‘voyé-yo préché dé pa dé adan tout sé vil-la’ (Lik 10:1). Sé konsa Jézi òwganizé prédikasyon-la, kifè onlo moun tann bon nouvèl-la. Men anplisdisa, konm sé disip-la té ka préché ansanm, sa pwokiré-yo onlo jwa (Lik 10:17). Ès sa pa’a di-w dè préché èvè lasanblé-la ?
AN-NOU FOUYÉ PI FON
An-nou vwè ka ou pé fè pou lafrous pa pran lanmen asi-w, é kijan ou pé ni tchè-kontan lè ou ka fè moun konnèt bon nouvèl-la.
3. Jéova ké la èvè-w
Ni dé moun ki té’é byen anvi préché, men lè yo ka sonjé jan lézòt ké réyaji é sa yo ké di, lafrous ka pran-yo.
Ès ou on ti jan pè palé dè sa ou ka aprann ? Poukwa ?
Gadé VIDÉO-la é fè on ti kozé asi kèsyon-la ki ka vin la.
Sé jenn-lasa pa lésé lafrous pran lanmen asi yo. Kijan yo fè ?
Li Izayi 41:10 é fè on ti kozé asi kèsyon-lasa :
Si ou pè préché, poukwa fò ou priyédyé ?
Ès ou té sav sa ?
Ni onlo Témwen a Jéova ki konpranndèdi kè yo pa té’é jen rivé ay préché. Sergey osi pasé pa la. I té ni lenprésyon kè i té on manb initil, é i té on ti jan sovaj. Mi sa i ka di : « Menmsi an té pè, an koumansé palé dè sa an té ka aprann an Bib-la alantou an mwen. É sa ki pli bèl adan sa, sé kè pi an té ka préché é pi an té ka santi-mwen alèz pou palé dè sa an té ka aprann. Anplisdisa, sa konsolidé fwa an mwen. »
4. Fò ou ni onlo rèspé pou sé moun-la
Avan ou ay préché ba on moun, réfléchi pou sav ka ou kay di, é pou sav ka ou pé fè pou palé ba-y. Li 2 Timoté 2:24 é 1 Pyè 3:15, é fè on ti kozé asi sé kèsyon-lasa :
Kijan ou té’é pé apliké sé vèwsé-lasa lè ou ka palé dè Labib èvè on moun ?
Pétèt kè sèwten moun adan fanmi a-w oben zanmi a-w pé’é dakò èvè sa ou ka di-yo. Adan on ka konsa, ka pou ou fè é ka pou ou pa fè ?
Olyé ou di moun-la adan ki biten pou i kwè, sa té’é byen si ou té ka pozé-y kèsyon èvè onlo jantiyès. Poukwa sa ?
5. Lè ou ka préché, ou ka ni tchè-kontan
Jéova mandé Jézi préché bon nouvèl-la. Ki enpòwtans misyon-lasa té ni ba Jézi ? Li Jan 4:34 é fè on ti kozé asi sé kèsyon-lasa :
Nou bizwen manjé pou nou viv. É lè nou ka manjé on biten kè nou enmé, nou ka tété dwèt. Lè Jézi té ka fè volonté a Pap’a-y kon pa ègzanp lè i té ka préché, sé konsi i té ka manjé on bon ti manjé. Poukwa i té ka vwè sa konsa ?
Poukwa lè ou ka préché bon nouvèl-la sa pé ba-w tchè-kontan ?
Déotwa ti konsèy
Pannan réinyon a simenn-la, maké déotwa lidé ki ké édé-w démaré on ti kozé.
Mandé moun-la ki ka fè étid a-w la ka pou ou fè pou yo ba-w fè sijé adan réinyon a simenn-la. Si ou ka fè sijé, ou ké pi alèz pou palé sé moun-la dè sa ou ka aprann.
Adan « Mi sa moun ka di » oben « Mi sa yo té’é pé mandé-w », ou ké touvé déotwa kèsyon oben déotwa biten kè moun ka di an téritwa-la.
MI SA YO TÉ’É PÉ MANDÉ-W : « On syèktan an pa vwè-w ! Ka ou ka divini ? »
Mi on bèl lokazyon pou ou pé palé dè sa ou ka aprann adan étid a-w. Kijan ou té’é pé fè sa ?
ON TI RÉZIMÉ
Si ou ka palé dè bon nouvèl-la, tchè a-w ké kontan. É pa pè, byensouvan, sé zyé ki lach.
Ka ou woutyenn
Poukwa fò ou palé dè bon nouvèl-la ?
Kijan ou pé fè sa san dérèspèkté sé moun-la ?
Si ou on ti jan pè préché, ka ou pé fè ?
AY GADÉ SA OSI
Mi 4 mannyè tou senp pou palé dè bon nouvèl-la èvè on kat jw.org.
On ti lidé asi sa ou pé di pou ba on moun on kat jw.org (1:43)
4 kalité ki ké édé-w palé dè bon nouvèl-la.
« Ès ou paré pou vin on moun ki ka péché moun ? » (Tou dè Gad a sèptanm 2020)
Gadé kijan on ègzanp ki an Bib-la pé édé-nou palé dè bon nouvèl-la menmsi nou sé on jennmoun.
Kijan ou pé palé dè sa ki an Bib-la èvè moun ki an fanmi a-w é ki po’o konnèt Jéova ?
« Touchons le cœur de nos parents non Témoins » (Tou dè Gad a 15 maws 2014 an fransé)