LÈSON 34
Kijan nou pé montré Jéova kè nou enmé-y ?
Dépi ou koumansé étidyé Labib, ès ou ka santi ou vin pi bon zanmi èvè Bondyé ? Ès ou anvi konsolidé lanmityé-lasa ? Alò sonjé kè Jéova ka òbsèwvé-w. Si i vwè kè pi tan-la ka pasé, pi ou enmé-y, pi i ké enmé-w osi, é pi i ké pran swen a-w. Kijan ou pé montré-y kè ou enmé-y ?
1. Kijan nou ka montré Jéova kè nou enmé-y ?
Nou ka montré Jéova kè nou enmé-y lè nou ka fè sa i ka mandé-nou (li 1 Jan 5:3). I pa ka fòsé ponmoun obéyi. I ka lésé nouchak chwazi si nou vlé oben si nou vé pa obéyi. Poukwa ? Pas Jéova vlé kè nou ‘obéyi-y èvè tout tchè an nou’ (Women 6:17). Sa vlé di kè Jéova vé pa ou obéyi-y pas ou oblijé, men pas ou enmé-y. Adan 3èm é 4èm pati a liv-lasa, ou ké vwè kijan ou pé montré Jéova kè ou enmé-y. Pou sa, ou ké vwè kè fò ou fè sa ki ka fè-y plézi, é kè fò ou hay sa i pa enmé.
2. Poukwa nou pé touvé sa rèd dè montré Jéova kè nou enmé-y ?
« On moun ki jis ka jwenn onlo pwoblèm » (Sòm 34:19). Noutout ni ti défo an nou, é nou ka lité kont yo. Anplisdisa, nou ka jwenn pwoblèm a lajan, yo ka mal aji èvè nou, oben nou ni dòt difikilté ankò. Akòz dè tout sé pwoblèm-lasa, pétèt kè nou pé ni dimal a fè sa Jéova ka mandé-nou. Nou pé jous ni lenprésyon kè sa pi senp si nou pa ka kouté-y. Men si magrésa, ou ka fè sa Jéova ka mandé, ou ka montré-y kè ou enmé-y plis ki tout biten. Anplis, ou ka montré on mannyè ki klè kè ou fidèl a-y. É li Jéova aprézan, i ké fidèl a-w. I pé’é jen lagé-w (li Sòm 4:3).
AN-NOU FOUYÉ PI FON
An-nou vwè poukwa Jéova ka ni tchè-kontan lè ou ka obéyi-y, é ka ki pé édé-w fè sa.
3. Satan ka akizé-w
Adan liv a Jòb, nou ka aprann kè a pa Jòb tousèl Satan akizé. I akizé touséla ki vlé sèvi Jéova osi. Li Jòb 1:1, 6 – 2:10 é fè on ti kozé asi sé kèsyon-lasa :
Dapré Satan, poukwa Jòb té ka obéyi Jéova ? (gadé Jòb 1:9-11).
Dè ki biten Satan akizé tou lézimen, kivédi voumenm osi ? (gadé Jòb 2:4).
Li Jòb 27:5b é fè on ti kozé asi kèsyon-lasa :
Kijan Jòb montré on mannyè ki klè kè i enmé Jéova poudèbon ?
Jòb montré on mannyè ki klè kè i enmé Jéova, davwa i rété fidèl a-y.
Nou osi, nou ka montré Jéova kè nou enmé-y lè nou ka rété fidèl a-y.
4. Mèt jwa an tchè a Jéova
Li Pwovèb 27:11 é fè on ti kozé asi sé kèsyon-lasa :
Ka Jéova ka rèsanti lè ou ka aji èvè sajès é lè ou ka kouté-y ? Poukwa ?
5. Ni mwayen ou fidèl a Jéova
Lè nou enmé Jéova, sa ka ban-nou anvi fè dòt moun konnèt-li. Si nou fidèl, nou ké palé dè-y menmsi sa pa fasil. Gadé VIDÉO-la é fè on ti kozé asi sé kèsyon-la ki ka vin la.
Ès délè ou ni dimal a palé dè Jéova èvè lézòt ?
Adan vidéo-la, ka ki édé Grayson pou lafrous pa té pran lanmen asi-y ?
Nou pé rété fidèl a Jéova pi fasilman si nou enmé sa i enmé, é si nou hay sa i hay. Li Sòm 97:10 é fè on ti kozé asi sé kèsyon-lasa :
Ès ou té’é pé bay déotwa biten kè Jéova enmé ? Ès ou té’ é pé bay déotwa biten kè i hay ?
Kijan ou pé aprann enmé sa ki byen é hay sa ki pa bon ?
6. Si nou kouté Jéova, sé yenki bon biten sa ké pwokiré-nou
Sa toujou ka pwokiré-nou bon biten lè nou ka kouté Jéova. Li Izayi 48:17, 18 é fè on ti kozé asi sé kèsyon-lasa :
Ès ou ka di Jéova toujou konnèt sa ki méyè pou nou ? Poukwa ou ka di sa ?
Ja ni kèlkètan ou koumansé étidyé Labib é kè ou koumansé konnèt kimoun ki Jéova, vré Dyé-la. Dépi sa, ki bon biten sa ja pwokiré-w ?
MI SA MOUN KA DI : « Mandé Bondyé menm si an la ! Ki an fè byen, ki an fè mal, sa pa’a fè-y ayen ! »
Ki vèwsé ou té’é pé itilizé pou montré kè sa nou ka fè pé swa fè Jéova plézi oswa rann-li tris ?
ON TI RÉZIMÉ
Ou pé montré Jéova kè ou enmé-y siwvwè ou ka obéyi-y é siwvwè ou ka rété fidèl a-y magré difikilté ou ka jwenn.
Ka ou woutyenn
Ka ègzanp a Jòb aprann-vou ?
Kijan ou pé montré Jéova on mannyè ki klè kè ou enmé-y ?
Ka ki ké édé-w rété fidèl a Jéova ?
AY GADÉ SA OSI
Kijan nou pé rété fidèl a Jéova é a lasanblé-la ?
Satan akizé lézimen. An-nou vwè plis détay asi sa.
« L’intégrité de Job » (La Bible : quel est son message ?, partie 6)
Kijan sé timoun-la osi pé montré kè yo enmé Jéova ?
Kijan on jennmoun pé rété fidèl a Jéova menmsi ni dòt jenn ki bizwen fòsé-y fè sa ki pa bon ?