LÈSON 36
Fò-nou réglo adan tousa nou ka fè
Noutout enmé ni zanmi ki séryé an zafè a yo. Jéova vlé kè zanmi a-y séryé osi. Men adan mond-lasa, sa pa fasil pou touvé on moun ki réglo pas lamajorité a sé moun-la pa konsa. Men ki bénéfis sa ka pwokiré-nou lè nou toujou réglo adan tousa nou ka fè ?
1. Pou ki rézon fò-nou réglo ?
Lè nou sé on moun ki réglo, nou ka montré Jéova kè nou enmé-y é kè nou ka rèspèkté-y. Pa oubliyé kè Jéova ka vwè tousa ki ka pasé an lèspri an nou é tousa nou ka fè (Ébré 4:13). Lè nou ka désidé fonksyonné on mannyè ki réglo, i ka vwè sa é sa ka fè-y plézi. Mi sa Pawòl a-y ka di : « Jéova hay on kouyonnè, men i bon zanmi èvè moun ki ka maché dwèt » (Pwovèb 3:32).
2. Ka nou pé fè pou nou aji on mannyè ki réglo touléjou Bondyé fè jou ?
Jéova vlé kè « yonn di lòt lavérité » (Zakari 8:16, 17). Ka sa vlé di ? Lè nou ka palé èvè fanmi an nou, èvè kolèg-travay an nou, èvè frè é sè an nou adan lasanblé-la oben èvè lalwa, fò pa nou manti pou yo é fò pa nou rakonté-yo pon tim-tim-bwasèk. On moun ki ka maché dwèt pa’a volé biten a moun é i pa’a madragé moun nonplis (li Pwovèb 24:28 é Éfézyen 4:28). Anplisdisa, i ka péyé Léta tousa i ka doué-y (Women 13:5-7). Anfinaldikont, ‘i ni on bon konduit adan tousa i ka fè’ (Ébré 13:18).
3. Ki entéré sa ni lè nou réglo ?
Si toutmoun sav kè nou séryé, yo ké fè-nou konfyans. Lè nou réglo, nou ka édé chak moun santi-y ansékirité adan lasanblé-la konsi i té adan on fanmi ki plen lanmou. Nou ni on konsyans ki nèt. É konm nou séryé an zafè an nou, nou pé ‘rann ansègnman a Bondyé pli bèl’, é nou pé ba moun ki poko Témwen anvi sèvi Jéova (Tit 2:10).
AN-NOU FOUYÉ PI FON
An-nou vwè ka Jéova ka rèsanti lè nou réglo é ki bénéfis sa ka pòté pou nou. An-nou vwè osi kijan pou nou aji on mannyè ki réglo adan diféran sitiyasyon.
4. Jéova enmé moun ki réglo
Li Sòm 44:21 é Malaki 3:16, é fè on ti kozé asi sé kèsyon-lasa :
Dapré-w, poukwa fò pa nou mèt an tèt an nou kè ni mwayen kaché lavérité ?
Sèlon vou, ka Jéova ka rèsanti lè nou ka désidé di lavérité menm lè sa difisil ?
Lè on timoun ka di lavérité, i ka fè fanmi a-y plézi. Lè nou ka di lavérité, nou ka fè Jéova plézi.
5. Fò-nou réglo toutlè
Ni onlo moun ki ka pansé kè délè, pisimé ou malonnèt pas sinon sé-w ki ké pèd adan sa. Men an-nou vwè pou ki biten fò-nou réglo toutlè. Gadé VIDÉO-la.
Li Ébré 13:18 é fè on ti kozé pou vwè kijan ou pé aji on mannyè ki réglo...
èvè fanmi a-w,
an travay a-w oben lè ou lékòl,
adan dòt sitiyasyon.
6. Lè ou réglo, sé bénéfis sa ka pwokiré-w
Délè, lè ou réglo, ou ni lenprésyon kè sé pwoblèm sa ka menné ba-w. Men anfinaldikont, sé toujou méyè biten ki ni a fè. Li Sòm 34:12-16 é fè on ti kozé asi kèsyon-lasa :
Lè nou réglo, sa ka rann vi an nou pi bèl. Kijansa ?
Lè on mari réglo èvè madanm a-y é lè madanm-la ka aji menmjan-la èvè mari a-y, yo ka vin pi soudé.
Lè on moun réglo an travay a-y, patwon a-y ka fè-y konfyans.
Lèwvwè on sitwayen pa malonnèt, Léta pa ni ayen a di dè-y.
MI SA MOUN KA DI : « Débouya pa péché ! Si sé on ti mansonj ou di, sa pa tèlman grav. »
Sèlon vou, poukwa Jéova hay tout kalté mansonj ?
ON TI RÉZIMÉ
Jéova vlé kè zanmi a-y toujou di lavérité é kè yo réglo adan tousa yo ka fè.
Ka ou woutyenn
A ki moman nou pé di kè on moun réglo ? Bay déotwa ègzanp.
Poukwa fò pa nou mèt an tèt an nou kè ni mwayen kaché lavérité ?
Poukwa ou vlé aji on mannyè ki réglo toutlè ?
AY GADÉ SA OSI
Ka on papa é on manman pé fè pou édé timoun a yo vin réglo ?
Lè nou ka tchenn pwomès an nou, poukwa sé on bon biten ?
Lè nou ka tchenn pwomès an nou, sa ka pwokiré-nou onlo bénédisyon (9:09)
Pou ki rézon fò-nou péyé enpo an nou menmsi nou ni lenprésyon kè Léta ka mal sèvi èvè lajan-la ?
« Faut-il payer ses impôts ? » (Tou dè Gad a 1é sèptanm 2011 an fransé)
Ka ki pousé on misyé malonnèt chanjé é ka ki édé-y gangné vi a-y san madragé moun ?
« J’ai découvert la miséricorde et le pardon de Jéhovah » (Tou dè Gad a 1é mé 2015 an fransé)