Ès ou té sav sa ?

Kijan Étyèn on disip, fè pou i ni onlo métriz lè yo té ka pèwsékité-y ?

ÉTYÈN ni douvan a-y 71 jij ki hay-li menm. Tout sé jij-lasa ka fè pawti a Sannédren-la, pli gran tribinal juif-la. Yo té pawmi sé nonm-la ki ni plis pouvwa adan nasyon-la. Yo sanblé asi lòd a Kayif, on gran prèt. Sé li ki té ka dirijé gran tribinal juif-la lè yo kondanné Jézi a mò déotwa tan avan (Mat. 26:57, 59 ; Akt 6:8-12). Toupannan yo fè moun vini yonn apré lòt pou bay on fo témwanyaj, yo vwè on biten ki souprann-yo toubònman : figi a Étyèn vin « kon figi a on zanj » (Akt 6:13-15).

Kijan Étyèn fè pou i ni onlo métriz konsa adan on sitiyasyon ki té fò toubònman ? Avan yo té menné-y douvan Sannédren-la, puisans a lèspri sen té ja aji asi-y, lè i té mété tout fòs a-y adan on travay kè yo té bay an kongrégasyon-la (Akt 6:3-7). Pannan prosé-la, sé menm lèspri sen la ki konsolé-y, men osi ki fè-y sonjé biten i té ja aprann (Jan 14:16, nòt). Toupannan Étyèn té ka défann-li èvè kouraj, dapré sa ki maké adan Akt chapit 7, lèspri sen fè-y sonjé pliski 20 pasaj a Lézékriti ébrayik (Jan 14:26). Men fwa a-y vin pli fò ankò lè i vwè adan on vizyon Jézi « doubout adwat a Bondyé » (Akt 7:54-56, 59, 60).

Pétèt on jou, nou ké touvé-nou douvan moun ki vlé fè-nou pè oben douvan moun ki vlé pèwsékité-nou (Jan 15:20). Si nou ka pran labitid étidyé Labib touttan é si nou ka préché èvè onlo balan, nou ké pèwmèt lèspri a Jéova aji asi nou. Sé konsa nou ké touvé fòs pou kenbé douvan toutmoun ki kont nou, toupannan lapé ka rété andidan tchè an nou (1 Pyè 4:12-14).