Bondyé pé konsidéré kè nou sé dé moun ki jis grasa fwa an nou é grasa aksyon an nou

1. Abraam lésé on bèl ègzanp ban nou anrapò èvè lafwa. Lè nou ka réfléchi asi sa, pétèt ki kèsyon ki ka vin an lèspri an nou ?

ONLO moun ja tann palé dè Abraam, men lamajorité adan yo pa konnèt granzafè asi-y. Men vou pawkont ou konnèt-li byen. Pa ègzanp, ou sav kè adan Labib yo ka kriyé-y « papa tout moun ki ni lafwa » (Wom. 4:11). Pétèt ou ka mandé-w : « Ès fwa an mwen pé vin fò kon ta Abraam ? » Wi, ou pé rivé fè sa !

2. Poukwa sa enpòwtan kè nou étidyé ègzanp a Abraam ? (Jak 2:22, 23).

² Si ou vé ni on fwa ki fò kon ta Abraam, on biten ou pé fè sé étidyé ègzanp a-y. Abraam toujou fè sa Bondyé té ka mandé-y fè. Pa ègzanp, i lésé koté-la i té ka rété la pou ay viv adan on péyi ki té lwen lwen lwen. I viv anba tant pannan onpakèt lanné é i té paré a sakrifyé Izaak, timoun a-y kè i té enmé onlo. Tousa ka montré jan i té ni onlo fwa. Grasa fwa a-y é grasa sé bèl aksyon-la i fè la, Jéova té kontan é Abraam vin zanmi a-y (li Jak 2:22, 23). Lè nou ka fè tchè a Jéova kontan é kè nou ka vin zanmi èvè-y, sé dé bénédisyon é sé sa Jéova vé pou noutout, alò sa valab pou vou osi. Sé pousa, i voyé lèspri sen a-y asi Pòl é Jak pou fè-yo palé dè ègzanp a Abraam adan sé liv-la yo maké la. An-nou vwè ka yochak maké anlè-y, an Women chapit 4 é an Jak chapit 2. Yo toulédé di on biten ki enpòwtan toubònman asi Abraam.

3. Pòl é Jak sèvi èvè menm vèwsé-la. Ki vèwsé ésa ?

³ Ki Pòl, ki Jak woupran sé pawòl-la nou ka touvé an Jénèz 15:6. Mi sa vèwsé-lasa ka di : « [Abraam] mèt fwa a-y an Jéova, kifè Jéova konsidéré-y kon on moun ki jis. » Adan Labib, lèwvwè yo ka di kè on moun « jis », sa vé di kè moun-lasa ka fè Bondyé plézi é kè pou Bondyé moun-lasa pa ni pon défo. Ou ka rann-vou kont, Jéova pé konsidéré on moun ki enpawfè é ki ka fè péché kon on moun ki pa ni pon défo ! Ou pa’a touvé sa èstraòwdinè ? Sèten sé konsa ou vé Bondyé konsidéré-w osi, é sa toutafè posib. Pou sa, an-nou vwè ka Abraam fè pou Bondyé vwè-y kon on nonm ki « jis ».

POU BONDYÉ VWÈ-NOU KON DÉ MOUN KI JIS, FÒ-NOU NI LAFWA

4. Poukwa pa ni ponmoun ki jis asi latè ?

⁴ Adan lèt-la i voyé pou sé Women-la, Pòl maké kè toutmoun ka fè péché (Wom. 3:23). Alò poukwa Bondyé pé kontan nou é poukwa i pé konsidéré kè nou sé dé moun ki jis ? Pòl sèvi èvè ègzanp a Abraam pou édé moun ki ni tchè sensè touvé répons a kèsyon-lasa.

5. Poukwa Jéova té ka vwè Abraam kon on moun ki jis ? (Women 4:2, 4).

⁵ Lèwvwè Abraam té ka viv adan péyi a Kanaan, Jéova konsidéré kè i té on moun ki jis. Poukwa ? Ès sé pas i té ka fè tousa Lwa a Moyiz té ka mandé ? Awa ! (Wom. 4:13). Jéova ba nasyon a Izrayèl Lwa-lasa 400 lanné apré. Alò asi ki biten Bondyé bazé-y pou i té konsidéré kè Abraam sé té on moun ki jis ? Jéova ba Abraam favè-la nou pa mérité la, é i déklaré kè i té on moun ki jis pas i montré kè i té ni lafwa (li Women 4:2-4).

6. Menmsi on moun ka fè péché, poukwa Jéova pé vwè-y kon on moun ki jis ?

⁶ Aprésa, Pòl èspliké kè lè on moun ni fwa adan Bondyé, fwa-la i ni la ka fè kè « yo ka konsidéré kè i jis » (Wom. 4:5). Mi sa i di apré : « Sé konsa David osi ka palé dè jwa-la on moun ni la davwa Bondyé ka konsidéré kè i jis, san tchenn kont dè travay a-y : “Tchè-kontan pou moun Bondyé padonné mové biten yo fè, moun Bondyé padonné péché a yo ; tchè-kontan pou moun-la Jéova pé ké tchenn kont dè péché a-y la anponjan” » (Wom. 4:5-8 ; Sòm 32:1, 2). Jéova ka padonné péché a séla ki ni fwa adan-y. I ka padonné-yo a san pou san é i pa’a tchenn kont ankò dè péché a yo ditou-ditou. Konm yo ni fwa adan-y, pou-y, yo sé dé moun ki jis é ki pa ni pon défo.

7. Poukwa Jéova té pé konsidéré sèwvitè a-y ki viv an tan a Labib kon dé moun ki jis ?

⁷ Menmsi pou Bondyé, Abraam, David é dòt sèwvitè a-y ki té fidèl té dé moun ki jis, yo té enpawfè é yo té ka fè péché. Men grasa fwa a yo, Jéova té ka vwè-yo kon moun ki pa ni pon défo, siwtou lè i té ka konparé-yo èvè moun ki pa té ka adoré-y (Éféz. 2:12). Adan lèt-la Pòl maké ba sé Women-la, i èspliké on mannyè ki klè kè lafwa sé on biten fondal pou on moun vin zanmi èvè Bondyé. Abraam é David té zanmi a Jéova pas yo té ni fwa adan-y. Nou osi, grasa fwa an nou, nou pé vin zanmi a Bondyé.

KI LYANNAJ KI NI ANTRÈ LAFWA É SA NOU KA FÈ ?

8-9. Ni sèwten moun ki pa’a byen konprann sa Pòl é Jak maké. Ka sé moun-lasa ka di é poukwa yo ka di sa ?

⁸ Dépi plizyè syèk, sé chèf a rèlijyon la pa ka tonbé dakò lè yo ka palé dè jan lafwa enpòwtan é dè jan sa on moun ka fè enpòwtan osi. Ni déotwa adan yo ki ka anségné lidé-lasa : « Enn kwè an Jézikris Ségnè an nou é ou ké sové ». Pétèt menm, kè vou osi, ou ja tann-yo di sa. Ni sèwten adan yo ki ka di kè sé sa Pòl anségné pas i di : « Bondyé ka konsidéré kè [on nonm] jis, san tchenn kont dè travay a-y » (Wom. 4:6). Pawkont, ni dòt ki ka di kè pou ou pé sa sové, fò ou ay an pélérinaj é fò ou fè dé bon biten. Pou èspliké sa, dépawfwa, yo ka sèvi èvè Jak 2:24. Mi sa vèwsé-lasa ka di : « Sé grasa aksyon on moun ka fè yo ka déklaré kè i jis, é a pa grasa lafwa tousèl ».

⁹ Konm ni plizyè lidé asi sa, sèwten èspésyalis a Labib ka pansé kè Pòl é Jak pa té dakò asi sa pou on moun té fè pou i pé sa fè Bondyé plézi. Dapré sèwten adan yo, Pòl té ka kwè kè sèl biten on moun té bizwen pou Bondyé té konsidéré kè i jis, sé ni lafwa alòskè pou Jak, fò moun-lasa té fè dé bon biten osi pou i fè Bondyé plézi. On pwofésè adan domenn a larèlijyon di kè Jak pa té ka konprann poukwa Pòl té ka répété kè pou Bondyé déklaré kè on moun jis, sé fwa a moun-lasa tousèl ki té ka konté é kè moun-lasa pa té bizwen fè pon aksyon. Men sé Bondyé ki voyé lèspri a-y ki asi Jak ki asi Pòl pou yo té maké sé biten-la yo maké la (2 Tim. 3:16). Alò, sèten ni on èsplikasyon tousenp pou édé-nou konprann sa yo di. Kilès ? Ében, fò-nou pran tan gadé ki dòt biten yo maké ankò.

10. Lèwvwè lapòt Pòl té ka palé dè ‘sa on moun ka fè’, dè ki biten i té ka palé ojis ? (Women 3:21, 28 ; gadé imaj-la osi).

¹⁰ Adan Women chapit 3 é Women chapit 4, lèwvwè lapòt Pòl té ka palé dè ‘sa on moun ka fè’, dè ki biten i té ka palé ojis ? I té ka di kè moun-lasa té ka fè ‘sa lwa-la ka mandé’ kivédi sa Lwa a Moyiz té ka mandé on moun fè. Lwa-lasa sé Bondyé ki té ba sé Izraélit-la li lèwvwè Moyiz té asi mòn Sinayi la (li Women 3:21, 28). Ni sèwten krétyen ki té juif é ki té ka kwè kè fò-yo té kontinyé suiv Lwa a Moyiz alòskè yo pa té oblijé fè sa ankò. Sé pousa lapòt Pòl sèvi èvè ègzanp a Abraam pou montré kè on moun pa bizwen suiv lwa-lasa pou i pé sa fè Bondyé plézi. Lidé-lasa ka ankourajé-nou toubònman pas grasa sa nou sèten kè nou pé fè Bondyé plézi é kè nou ké rivé fè sa siwvwè nou ni fwa adan-y é adan Gason a-y osi.

11. Lèwvwè lapòt Jak té ka palé dè « aksyon on moun ka fè », dè ki biten i té ka palé ojis ?

¹¹ Adan chapit 2 a lèt a-y, lè Jak palé dè « aksyon on moun ka fè », dè ki biten i té ka palé ojis ? I pa té ka palé dè sa Lwa a Moyiz té ka mandé, kon Pòl fè-y. Men, i té ka sonjé sé diféran biten-la on krétyen ka fè la adan vi a touléjou a-y. Jan-la moun-la ka aji la ka montré on mannyè ki klè kè i ni fwa adan Bondyé. An-nou pran tan ègzaminé 2 ègzanp kè Jak pran adan lèt a-y pou montré dè ki biten i té ka palé.

12. Kijan Jak ka èspliké ki lyannaj ki ni antrè lafwa é sa on moun ka fè ? (gadé imaj-la osi).

¹² Adan 1^é ègzanp-la i pran la, Jak èspliké kè fò pa sé krétyen-la fè préférans. I montré kè fò pa yo pòté moun ki rich anlè toupannan yo pa’a lévé maléré-la digad. I di kè si sé konsa on moun ka aji é kè i ka di kè i ni lafwa, sa i ka fè ka montré toutmoun kè sa pa vré (Jak 2:1-5, 9). Adan 2^èm ègzanp-la i pran la, i palé dè on moun ki ka vwè kè on frè oben on sè « pa ni lenj é [...] pa ni on dèkwa pou manjé », men i pa’a fè ayen pou édé-y. Menmsi moun-lasa ka di i ni lafwa, fwa a-y pa’a sèvi ayen pas i pa ni aksyon ki k’ay èvè-y. Kon Jak maké, « si lafwa pa ni aksyon ki k’ay èvè-y, i mò » (Jak 2:14-17).

13. Èvè ki ègzanp Jak sèvi pou montré kè fò on moun ni lafwa é kè fò i montré sa osi ? (Jak 2:25, 26).

¹³ Jak palé dè ègzanp a Raab pou èspliké kè sa i fè montré kè i té on moun ki té ni fwa (li Jak 2:25, 26). Raab té tann palé dè Jéova é i té rann-li kont kè Jéova té èvè sé Izraélit-la (Joz. 2:9-11). On jou, i ni lokazyon fè on biten ki montré jan i té ni fwa. I pwotéjé 2 Izraélit ki té vin véyé sa ki té ka pasé adan péyi-la la i té ka rété la. Menmjan ki Abraam, konm i té ni fwa, Jéova konsidéré kè i sé on moun ki jis menmsi i pa té pawfè é kè a pa té on Izraélit nonplis. Ègzanp a-y ka montré jan sa enpòwtan kè nou fè dé biten ki ka montré kè nou ni lafwa.

14. Pòl pa maké menm biten ki Jak, men poukwa nou pé di kè yonn pa kontrèdi lòt ?

¹⁴ Ki Pòl, ki Jak èspliké déotwa biten anrapò èvè lafwa é anrapò èvè sa on moun ka fè. Men, yo pa fè sa menmjan-la. Pòl té vé fè sé krétyen juif la konprann byen kè a pa lè yo ké fè tousa Lwa a Moyiz ka mandé kè yo ké fè Bondyé plézi. Kanta Jak, i palé dè jan sa enpòwtan kè tout sé krétyen-la montré kè yo ni lafwa lè yo ka aji byen èvè lézòt.

15. Bay déotwa biten nou pé fè pou montré kè nou ni lafwa (gadé sé imaj-la osi).

¹⁵ Jéova pa di kè on moun oblijé fè ègzaktèman sa Abraam fè pou i vwè-y kon on moun ki jis. An réyalité, nou pé fè plizyè biten diféran pou montré kè nou ni lafwa. Pa ègzanp, lèwvwè sé prèmyé fwa on moun ka vin adan lasanblé an nou, nou pé akéyi-y byen konm i fo. Nou pé édé frè é sè an nou ki bizwen yo ba-yo on pal. Nou pé fè moun ki an fanmi an nou dibyen osi. Tout sé biten-lasa ké fè Bondyé plézi é i ké béni-nou pou sa (Wom. 15:7 ; 1 Tim. 5:4, 8 ; 1 Jan 3:18). Ni on travay an pawtikilyé nou pé fè pou montré kè nou ni lafwa, sé préché bon nouvèl-la pou dòt moun, é fè sa èvè onlo balan (1 Tim. 4:16). Noutout, grasa aksyon an nou, nou pé montré kè nou sèten kè tousa Bondyé pwomèt ké réyalizé é kè i toujou ka aji méyè mannyè ki tini. É si nou ka fè sa, nou pé sèten a san pou san kè Bondyé ké vwè-nou kon on moun ki jis é kè nou ké zanmi èvè-y.

AN-NOU KONSANTRÉ-NOU ASI ÈSPÉRANS AN NOU É FWA AN NOU KÉ VIN PI FÒ

16. Ka Abraam té ka èspéré é konm i té ka fèfon asi sa, kijan sa aji asi fwa a-y ?

¹⁶ Adan Women chapit 4, ègzanp a Abraam ka aprann-nou ondòt biten enpòwtan : fò-nou atann sé biten-la nou ka èspéré la. Jéova té pwomèt Abraam kè « onlo nasyon » té’é risivwè bénédisyon grasa-y. Mi on bèl èspwa Jéova té ba Abraam mi ! (Jén. 12:3 ; 15:5 ; 17:4 ; Wom. 4:17). Men lè Abraam té ni 100 an é Sara 90 an, yo poto’o ni timoun-la Jéova té pwomèt-yo la. Kifè, moun té’é pé pansé kè yo pa té’é jen ni timoun on jou. Sé té on gwo éprèv pou Abraam. Men « èspérans a-y pèwmèt-li ni fwa kè i té’é vin papa a onlo nasyon » (Wom. 4:18, 19). É anfinaldikont, sa Abraam té ka èspéré la réyalizé : Izaak, gason-la i té ka atann la fin pa vwè jou (Wom. 4:20-22).

17. Bondyé pé konsidéré-nou kon dé moun ki jis é nou pé vin zanmi èvè-y. Kijan nou fè sav sa ?

¹⁷ Menmjan ki Abraam, nou pé fè Jéova plézi, i pé konsidéré-nou kon moun ki jis é nou pé vin zanmi èvè-y. Sé sa sé pawòl-la Pòl di la ka montré-nou. Mi sa i di : « Men, a pa pou [Abraam] tousèl yo maké sé pawòl-lasa : “Grasa sa, Bondyé konsidéré-y”, men, yo té maké-yo pou nou osi, davwa Bondyé ké konsidéré-nou kon dé moun ki jis paskè nou ka kwè adan Sila ki résisité Jézi Ségnè an nou » (Wom. 4:23, 24). Kon Abraam, fò-nou ni lafwa, fò-nou fè dé bon biten é fò-nou sèten a san pou san kè Bondyé ké réyalizé sé biten-la nou ka atann la. Pòl kontinyé palé dè èspérans an nou an Women chapit 5, é sé sa nou kay vwè adan awtik-la ki ka vin la.