Isaïe

9 Parkont, soukou-a pa ké kou anvan, lò péyi-a té ka soufri, lò yé té ka méprizé péyi Zabilon ké péyi Nèftali. Apré sa, i ké fè sa ki fo pou chimen bò d’ lanmè-a gen valò, sa chimen-an annan réjyon Jourden-an : Galilé koté moun ròt nasyon ka rété. 2 Pèp-a ki té ka maché annan soukou wè roun gro limyèr. Kanta sa-ya ki té ka rété annan péyi soukou dou-a, limyèr-a kléré yé. 3 To fè nasyon-an vin gran ; to fè so tchò kontan toubonnman. Yé tchò kontan lò yé douvan to, menm fason tchò moun-yan kontan lò a sézon pou rékòlté, menm fason tchò moun-yan kontan lò yé ka partajé bagaj-ya yé rivé pran. 4 Paské to krazé charj-a ki té ka pézé asou yé zépol, ti baton-an yé té ka frapé asou yé zépol, baton sa-la ki té ka fòrsé yé travay, to krazé l’ nèt kou to fè l’ ké Madyan. 5 Yé ké jité bòt moun-yan ki ka fè latè-a tranblé lò yé ka maché ké tout lenj-yan ki plen ké disan, yé ké jité yé a difé. 6 Paské roun timoun fin fèt pou nou, yé bay nou roun tiboug ; é dominasyon-an ké asou so zépol. Yé ké aplé l’ bèl Konséyé, Bondjé ki fò, Papa pou tout-tan, Prens lapè. 7 So dominasyon pa ké fini é lapè non plis, asou tronn David é annan so rwayonm. I ké byen tchenbé grasa sa ki drèt é grasa lajistis ki ké soutni l’, dipi jòdla ké pou tout-tan. Jéova Chèf larmé-ya byen désidé fè sa.