1 Samuel

2 Alòr Sayil chwazi 3 000 wonm annan larmé israyélit-a épi i pati pou chaché David ké wonm-yan ki té ké li, koté i gen bokou ròch, koté kabrit montangn-yan ka rété. 3 Sayil rivé annan pak mouton ki té òbò chimen-an é ki té fèt ké ròch. Annan sa koté-a, i té gen roun gro trou ròch, é i antré annan l’ pou soulajé so kò. David ké so sòlda té séré jis ofon trou ròch-a. 4 Sòlda-ya di David : « Anfen jou-a rivé koté Jéova ka di to : “Gadé : mo ka fè to ganyen asou to lèlmi é to pouvé fè li sa to lé.” » Alòr David lévé é i koupé tou dousman roun ti moso annan manto san manch Sayil-a. 5 Mé apré sa, konsyans David koumansé bat li, paské i té koupé roun ti moso annan manto Sayil. 6 Donk i di so sòlda-ya : « Paské mo ka rèspèkté Jéova, mo pa menm pouvé sonjé fè mo sényèr, sa-la Jéova chwazi-a, roun bagaj konsa. Mo pa ké fè li pyès méchansté, paské Jéova chwazi li. » 7 Lò David di sa, i anpéché so sòlda manyen Sayil. Sayil li menm soti annan gro trou ròch-a épi i kontinyé so chimen. 8 David osi lévé, i soti annan gro trou ròch-a épi i aplé Sayil : « Mo sényèr, mo rwa ! » Lò Sayil gadé dèyè li, David mété so jounou atè é i kroubé so kò. 9 Épi i di Sayil : « Poukisa to ka kouté sa-ya ki ka di ki mo lé fè to méchansté ? 10 Jòdla menm, to wè ki Jéova té bay mo okazyon tchwé to annan trou ròch-a. Mé lò roun annan mo sòlda di mo tchwé to, mo pran pityé pou to é mo réponn : “Mo pa ké fè mo sényèr pyès méchansté, paské Jéova chwazi li.” 11 Aprézan mo papa, gadé, wi, gadé : mo gen roun bout di to manto annan mo lanmen. Lò mo koupé l’, mo té pouvé tchwé to osi, mé mo pa fè l’. Aprézan to ka byen wè ki mo pa té gen lentansyon ni fè to pyès méchansté ni révòlté kont to. É mo pa péché kont to, alòr ki to, to ka kouri dèyè mo pou tchwé mo. 12 A pou Jéova jijé ant mo ké to. Jéova ké vanjé mo pou tout mové bagaj to fè mo. Mé mo menm, mo pa ké fè to anyen. 13 Kou vyé dolo-a ka di : “A moun méchan ka fè méchansté”, mé mo menm mo pa ké fè to anyen. 14 O rwa Israyèl, poukisa to soti ké to larmé ? Dèyè kimoun to ka kouri konsa ? Dèyè roun chyen ki mouri ? Dèyè roun ti pis ? 15 A pou Jéova sa jij-a, wi, a pou i jijé ant mo ké to. I ké byen gadé sa zafè-a, i ké défann mo, i ké jijé mo, é i ké délivré mo anba to lanmen. » 19 Pourtan, lò roun moun ka bité ké so lèlmi, nòrmalman i pa ka lésé l’ pati san i pa fè li anyen. Parapòrta sa to fè pou mo jòdla, Jéova ké béni to i ké fè bon bagaj pou to. 20 Mo savé ki to ké rwa é ki rwayonm Israyèl-a ké kontinyé èkzisté anba to otorité.