1 Samuel

2 Alòr Sayil pati ké 3 000 wonm i té chwazi an Israyèl, pou alé chaché David annan dézèr Zif-a. 3 Sayil enstalé so kan asou ti montangn Akila, ki anfas ké Jéchimòn, òbò larout-a. David té ka viv annan dézèr-a. I anprann ki Sayil té vin annan dézèr-a pou tchenbé li. 4 Donk David voyé plizyèr èspyon pou vérifyé si Sayil té vini vré. 5 Pita, David alé koté Sayil té enstalé so kan. I wè ki koté Sayil té ka dronmi é i wè osi ki koté Abnèr pitit Nèr, chèf so larmé, té ka dronmi. Sayil té ka dronmi annan kan-an é sòlda-ya té kouché a so lantou. 6 Alòr David doumandé Ayimélèk Itit-a ké Abichay, pitit Zérouya é frè Joab : « Kimoun ki ké vini ké mo annan kan-an jik òbò Sayil ? » Abichay réponn li : « Mo, mo ké vini ké to. » 7 Alòr David antré annan kan-an ké Abichay. A té lannwit. Yé trapé Sayil ka dronmi, so lans té piké annan latè-a òbò so tèt. Abnèr ké sòlda-ya té kouché a so lantou. 8 Alòr Abichay di David : « Jòdla, Bondjé ka fè to ganyen asou to lèlmi. Souplé, pèrmèt mo bay li rounsèl kout lans pou i rété kolé atè ; mo pa ké bézwen roukoumansé ! » 9 Mé David réponn li : « Pa fè li anyen, pas kimoun ki pouvé lévé lanmen asou sa-la Jéova wen épi i ka rété inosan ? » 10 Anplis di sa, David di : «  Menm fason Jéova vivan, Jéova ké bay li roun kou, ouben i ké mouri kou tout moun, ouben i ké mouri annan roun lagèr. 11 Paské mo ka rèspèkté Jéova, mo pa ka menm sonjé fè roun bagaj ki mové kont sa-la Jéova chwazi-a. Annou pran lans-a ki òbò so tèt ké ja dlo-a, é annou alé. » 12 Alòr David pran lans-a ké jar dlo-a ki té òbò tèt Sayil, épi yé toulédé pati. Pésonn pa wè yé, pésonn pa rémarké yé, pésonn pa lévé non plis. Yé tout té ka dronmi paské Jéova té fè somèy baré yé, yé té ka dronmi rèd.