Psaume
139 O Jéova, to ka byen gadé annan mo tchò é to konnèt mo. 2 To savé lò mo ka asiz lò mo ka lévé. To ja wè dipi lontan sa ki ka maché annan mo lidé. 3 To ka gadé tout koté mo ka alé, lò mo ka lonjé mo kò ; to konnèt tousa mo ka fè. 4 Anvan menm mo di roun bagaj, o Jéova, to ja konnèt tousa mo ké di. 5 To a mo lantou, to douvan mo, to dèyè mo, é to ka protéjé mo ké to lanmen. 6 To konnèt tèlman bagaj asou mo, sa tròp pou mo konprann. Sa tro fò pou mo pouvé konprann. 7 Ki koté mo pouvé alé séré pou to lèspri pa trapé mo ? É ki bò mo pouvé pran kouri pou to pa wè mo ? 8 Si mo té k’alé laro syèl, to té ké la, é si mo té ka fè mo kabann annan Tonm-an, men, to té ké la. 9 Menmsi mo té ka volé vit anmitan syèl-a kou lò limyèr douvanjou ka parèt pou mo rété jik bò d’ lanmè ki pi lwen-an, 10 la osi, to lanmen té ké gidé mo, to lanmen drèt té ké tchenbé mo. 11 Si mo té ka di : « Asiré, soukou dou ké kouvri mo ! », a sa moman-an, a mo lantou, lannwit-a té ké vin klè kou limyèr-a. 12 Menm soukou dou pa té ké tròp pou to. Lannwit té ké klè kou lò jou louvri. Pou to, soukou ké limyèr, a menm bagaj-a. 13 A to ki fè mo ren, a to ki protéjé mo annan vant mo manman. 14 Mo ka louwé to lò mo ka wè kouman to fè mo di roun fason ki bèl toubonnman. Tousa to fè vréman bèl, mo byen savé sa. 15 To wè tout mo zo lò mo fèt koté pyès moun pa té ka wè, lò yé fè mo kou roun twèl annan koté ki pi fon annan latè-a. 16 To wéy wè mo lò mo té kou roun ti grenn annan vant mo manman, tout parti ki annan mo kò té ékri annan to liv, tout enfòrmasyon asou jou yé fèt, anvan menm rounsèl annan yé èkzisté. 17 A pou sa tousa to ka pansé gen bokou valò pou mo ! O Bondjé, a pa ti kantité bagaj to konnèt ! 18 Kouman mo té ké rivé konté yé ? Yé pi bokou pasé grenn sab ki bò d’ lanmè-a ! Lò mo ka lévé, mo toujou la ké to. 21 O Jéova, a pa ti rayi mo rayi sa-ya ki rayi to, é mo pa pouvé wè sa-ya ki ka lévé kont to ! 22 A pa ti rayi mo rayi yé ; yé vréman divini dé lèlmi pou mo. 23 Byen gadé annan mo tchò, o Bondjé, pou to savé sa i gen annan l’. Byen gadé annan mo tchò, pou to savé sa ki ka fè mo enkyèt. 24 Gadé pou wè si i pa gen mové bagaj annan mo tchò, é fè mo maché asou chimen lavi pou tout-tan-an.