2 Corinthiens

3 Ès sa kou-a ankò, a nou menm ka di ki nou vayan ? Ès nou bézwen bay zòt lèt ki ka di ki nou vayan ouben lèt zòt menm té ké ékri, kou roun ran moun ka fè l’ ? 2 Nou lèt, a zòt menm ; é sa lèt-a marké asou nou tchò, é tout moun konnèt li é ka li l’. 3 Tout moun ka byen wè zòt sa roun lèt di Jézi Kris nou ékri grasa travay nou fè-a, i pa marké ké lank mé i marké ké lèspri roun Bondjé ki vivan, i pa marké asou moso ròch mé asou lachè, asou tchò moun. 5 A pa nou menm ki ka di nou adòk kousidiré nou té ka pansé ki sa té ka vini di nou pròp kò, mé a Bondjé ki fè si nou pouvé fè sa, 6 a li ki fè nou vin adòk pou divini sèrvitèr roun nouvo alyans, pa sèrvitèr roun lalwa ki ékri, mé sèrvitèr lèspri-a ; paské lalwa ki ékri-a ka kondané moun pou yé mouri, mé lèspri ka bay lavi. 10 Anfèt, sa ki té gen laglwar tan-lontan pédi sa laglwar-a akoz di laglwar ki pi gran pasé sa-la 11 Paské si sa ki té divèt disparèt rousouvwè laglwar, laglwar sa ki ka rété divèt pi gran ankò ! 12 Paské nou sir di sa, nou pouvé palé san anyen pa anpéché nou palé, 18 É nou tout — toupannan nou ka montré lagwlar Jéova kou roun mirwè ké nou vizaj ki pa gen vwèl —, nou ka chanjé pou divini sa menm zimaj-a, nou ka montré sa laglwar-a plizanpli byen, kou Jéova Lèspri-a ka fè l’.