Psaume

72 O Bondjé, bay rwa-a to jijman épi bay pitit rwa-a to jistis. 2 A pou i défann to pèp ké jistis é a pou i défann sa-ya ki ka soufri ké jistis. 3 A pou montangn-yan poté lapè pou pèp-a é a pou ti montangn-yan poté jistis. 4 A pou i défann sa-ya ki ka soufri annan pèp-a, a pou i sové pitit moun-an ki maléré é a pou i krazé sa-la ki ka vòlò. 5 Yé ké gen lakrent pou to tout tan i ké gen solèy é tout tan lalin-an ké la, jénérasyon apré jénérasyon. 6 I ké kou lapli ki ka tonbé asou zèrb-a yé koupé, kou lapli ki ka rozé latè-a. 7 Anba so dominasyon, moun ki jis ké vin bokou, é i ké gen bokou lapè, jistan lalin disparèt. 8 I ké gen moun dipi roun lanmè jouk rounòt lanmè é dipi Flèv-a jouk ròt bò latè-a. 12 Paské i ké sové maléré-a ki ka rélé pou yé idé l’, épi osi sa-la ki ka soufri, é i ké sové nenpòrt kimoun ki pa gen pésonn pou idé l’. 13 I ké gen pityé pou sa-la ki piti ké sa-la ki maléré é i ké sové maléré-ya. 14 I ké fè yé soti annan malò é pyès moun pa ké fè yé méchansté ankò, é yé disan ké gen bokou valò pou li. 16 Latè-a ké plen ké grenn pou manjé ; i ké gen patché manjé laro tèt montangn-yan. Bati rwa-a ké bay bokou kou pyébwa ki ka pousé Liban, é annan vil-ya i ké gen bokou moun kou zèrb asou tout latè-a. 18 A pou tout moun louwé Bondjé Jéova, Bondjé Israyèl-a, a li rounso ki ka fè bagaj ki bèl toubonnman. 19 A pou tout moun louwé so non ki plen ké laglwar pou tout-tan é a pou so laglwar plen tout latè-a ! Anmèn é anmèn.