Isaïe

11 Roun ti branch ké soti annan souch Jésé é roun plan di so rasin ké bay frwi. 2 Lèspri Jéova ké pozé asou li, lèspri sajès ké entélijans, lèspri konsèy ké fòrs, lèspri konésans ké lakrent Jéova. 3 É i ké kontan krenn Jéova. I pa ké jijé dapré sa i ké wè é i pa ké korijé pésonn sèlman dapré sa i ké tandé. 4 I ké jijé maléré-ya roun fason ki jis é i ké korijé sa-ya ki ka fè yé kò toupiti asou latè-a roun fason ki drèt. I ké frapé latè-a ké baton so bouch é i ké yenki souflé ké so bouch pou fè méchan-an mouri. 5 Lajistis ké sa so sentir asou so ren, é so fidélité ké sa so sentir asou so anch. 6 Lou-a ké pozé roun ti tan òbò ti-mouton-an, tig-a ké kouché òbò ti-kabrit-a, ti-béf-a, lyon-an ké zannimo ki byen gra yé tout ké ansanm ; é a roun tibolonm ki ké mennen yé. 7 Fimèl béf-a ké lous-a ké manjé ansanm, é yé pitit ké dronmi ansanm. Lyon-an ké manjé pay kou toro-a. 8 Timoun-an ki ka tété toujou ké jwé òbò koté kobra ka rété-a, é timoun-an ki ja sévré ké mété so lanmen asou trou koté sèrpan ki gen vénen ka séré. 9 Yé pa ké fè pyès méchansté ni pyès ravaj annan tout mo montangn sakré-a, paské asiré pa pitèt, latè-a ké plen ké konésans asou Jéova kou lanmè-a plen ké dlo. 10 Sa jou-a, rasin Jésé-a ké lévé kou roun sign pou pèp-ya. Nasyon-yan ké chaché so dirèksyon, é koté i ka rété ké divini plen ké laglwar.