Matthieu

6 Mé roun jou, pannan anivèrsèr Éròd, tifi Érodyad dansé douvan sa ki té envité, é afòrs Éròd té kontan so dansé 7 i promèt douvan tout moun ki i té ké bay li tousa i té ké doumandé li. 8 Alòr, kou so manman té dèyè li pou sa, i di : « Bay mo tèt Janbatis asou roun plato, isi-a menm. » 9 Sa fè rwa-a lapenn, mé kou i té bay so paròl douvan tout sa-ya ki té ka manjé ké li, i bay lòrd pou yé bay li tèt Jan-an. 10 I voyé roun moun koupé tèt Jan annan lajòl-a. 13 Lò i tandé sa, Jézi pran bato-a, i soti koté i té fika é i alé annan roun koté i pa té gen pyès moun, pou i rété li rounso. Mé moun plizyèr koté vin savé sa é roun patché moun swiv li a pyé. 16 Mé Jézi di yé : « Yé pa bézwen alé. Bay yé manjé zòt menm. » 17 Yé réponn li : « Nou gen senk dipen ké dé poson rounso isi-a. » 18 I di yé : « Mennen yé bay mo. » 19 Apré sa i doumandé moun-yan asiz atè asou radyé-a. I pran senk dipen-yan ké dé poson-yan, i lévé so wéy pou gadé laro syèl-a épi i fè roun lapriyè. Apré i kasé dipen-yan, i bay disip-ya, é disip-ya bay moun-yan dipen-yan. 20 A konsa tout moun manjé plen yé vant. É yé ranmasé moso dipen-yan ki té ka rété : yé plen 12 panyen. 21 Apéprè 5 000 wonm manjé, san menm konté fanm ké timoun. 23 Apré i fè moun-yan alé, i monté asou montangn-an tousèl, pou priyè. Lò soukou tonbé, i té la, li rounso. 24 Bato-a té ja gen tan fè plizyèr santenn mèt asou lanmè-a ; i té ka briga ké vag-ya paské van-an té ka vini annan ròt sans-a. 25 Mé lò lannwit-a té pròch fini, Jézi vini òbò yé, i té ka maché asou dlo-a. 26 Lò yé wè li ka maché asou dlo-a, disip-ya pran pè. Yé di : « A roun aparisyon ! » É yé koumansé rélé paské yé té pè. 27 Mé lanmenm Jézi di yé : « Pran kouraj, a mo ! Pa pè. » 28 Pyèr réponn li : « Sényèr, si a to, di mo vini ké to asou dlo-a. » 29 I di li : « Vini ! » Alòr Pyèr désann di bato-a é i maché asou dlo-a pou alé òbò Jézi. 30 Mé lò i wè kouman van-an té ka souflé fò, i pran pè. É kou i té ka koumansé koulé, i rélé : « Sényèr, sové mo ! » 31 Jézi lonjé so lanmen lanmenm pou trapé l’ é i di li  : « Kouman to gen roun tibi lafwa konsa, poukisa to lésé dout pran pyé asou to ? » 33 Atò, sa-ya ki té abò bato-a kroubé douvan l’ é yé di li : « To sa Pitit Bondjé vré. »