Matthieu
1 Liv istwè lavi Jézi Kris, pitit David, pitit Abraam : 2 Abraam divini papa Izaak. Izaak divini papa Jakòb. Jakòb divini papa Jida ké so frè-ya. 3 Jida divini papa Pérèz ké Zéra, i fè yé ké Tamar. Pérèz divini papa Èzròn. 4 Ram divini papa Aminadab. Aminadab divini papa Nachòn. Nachòn divini papa Salmòn. 5 Salmòn divini papa Boaz, i fè l’ ké Raab. Boaz divini papa Obèd, i fè l’ ké Rit. Obèd divini papa Jésé. 6 Jésé divini papa David, rwa-a. David divini papa Salomon, i fè l’ ké madanm Ouri. 7 Salomon divini papa Roboam. Roboam divini papa Abiya. Abiya divini papa Aza. 8 Aza divini papa Jozafa. Jozafa divini papa Joram. Joram divini papa Ozyas. 9 Ozyas divini papa Jotam. Jotam divini papa Akaz. Akaz divini papa Ézékyas. 10 Ézékyas divini papa Manasé. Manasé divini papa Amon. Amon divini papa Jozyas. 11 Jozyas divini papa Jékonyas ké so frè-ya, annan lépòk yé mennen Jwif-ya alé Babilòn. 12 Apré yé mennen Jwif-ya Babilòn, Jékonyas divini papa Chéaltyèl. Chéaltyèl divini papa Zorobabèl. 13 Zorobabèl divini papa Abiyoud. Abiyoud divini papa Éliyakim. Éliyakim divini papa Azòr. 14 Azòr divini papa Zadòk. Zadòk divini papa Akim. Akim divini papa Éliyoud. 15 Éliyoud divini papa Éléazar. Éléazar divini papa Matàn. Matàn divini papa Jakòb. 16 Jakòb divini papa Jozèf. Jozèf maryé ké Mari, manman Jézi, yé ka aplé Kris. 17 Atò, dipi Abraam jouk David i té gen 14 jénérasyon, dipi David jouk lò yé mennen Jwif-ya alé Babilòn i té gen 14 jénérasyon, é dipi lò yé mennen Jwif-ya alé Babilòn jouk Kris i té gen 14 jénérasyon. 18 Men kouman Jézi Kris fèt : Lò so manman, Mari, té fiyansé ké Jozèf, i tonbé ansent grasa lèspri sen-an anvan yé maryé. 19 Kou Jozèf, so mari, té sa roun moun ki jis é i pa té lé fè l’ ronté douvan tout moun, i té lé divòrsé ké li san pyès moun pa savé. 20 Mé, apré i kalkilé asou sa, roun zanj Jéova palé pou li annan roun rèv é i di li : « Jozèf, pitit David, pa pè pran to madanm, Mari ,annan to kaz, paské timoun-an i gen annan so vant la grasa lèspri sen. 21 I ké fè roun tibolonm, é to ké divèt aplé l’ Jézi, pas i ké sové so pèp di so péché. 22 Tout sa bagaj-ya rivé pou sa Jéova té fè so profèt anonsé fèt : 23 « Vyèrj-a ké ansent é i ké fè roun tibolonm, é yé ké aplé l’ Émanyèl », sa lé di « Bondjé la ké nou ». 24 Alòr Jozèf lévé é i fè sa zanj Jéova-a té di li fè : i fè so madanm vini annan so kaz. 25 Mé i pa kouché ké Mari jiktan i akouché tibolonm-an. É i aplé l’ Jézi..