Matthieu

2 Apré Jézi fèt Bètléyèm, an Jidé, pannan lépòk rwa Éròd, astrològ-ya ki té ka soti di Lès rivé Jérizalèm. 2 Yé di : « Koté sa-la ki fèt pou divini rwa Jwif-ya ? Nou wè so zétwèl lò nou té a Lès é nou vini kroubé douvan li. » 3 Lò i tandé sa, rwa Éròd té boulvèrsé, é tout sa ki té ka rété Jérizalèm osi. 4 I rasanblé tout chèf prèt-ya ké èskrib-ya, é i doumandé yé koté Kris-a té divèt fèt. 5 Yé réponn li : « Bètléyèm, an Jidé, paské a sa profèt-a ékri : 6 “É to, o Bètléyèm ki annan péyi Jida, asiré, gouvèrnèr Jida-ya pa ka wè to kou vil-a ki gen mwens valò. Paské a koté to roun moun ki ké dirijé ké soti, i ké sa roun bèrjé pou mo pèp Israyèl.” » 7 Atò Éròd fè yé aplé astrològ-ya san pésonn pa savé épi i doumandé yé kitan zétwèl-a té parèt èkzaktéman. 8 Apré sa i voyé yé Bètléyèm é i di yé : « Alé laba é byen chaché timoun-an. Lò zòt ké trapé l’, rouvin di mo l’ pou mo menm osi mo alé kroubé douvan li. » 9 Lò rwa-a fin di yé sa yé té gen pou fè, yé pati. É zétwèl-a yé té wè lò yé té a Lès alé douvan yé jiktan i arété laro koté timoun-an té fika. 10 Lò yé wè zétwèl-a, yé té kontan bokou. 11 Lò yé antré annan kaz-a, yé wè timoun-an ké so manman, Mari. Yé mété yé jounou atè é yé kroubé douvan li. Yé louvri yé trézòr é yé bay li kado : lò, oliban ké myrrhe. 12 Mé, kou Bondjé té di yé annan roun rèv pa routounen koté Éròd, yé pran rounòt chimen pou roupati annan yé péyi. 13 Lò yé pati, zanj Jéova-a parèt annan rèv Jozèf épi i di li : « Lévé, kouri an Éjip ké timoun-an ké so manman, épi rété la jouktan mo di to routounen. Paské Éròd ké chaché timoun-an pou i tchwé l’. » 14 Atò, Jozèf lévé pannan lannwit, i pran timoun-an ké so manman, é i pati Éjip. 15 I rété laba jouktan Éròd mouri. A konsa sa Jéova té fè so profèt di, fèt : « Mo aplé mo pitit pou i soti Éjip. » 16 Lò Éròd wè ki astrològ-ya té doublé li, i koumansé kòlè. I doumandé so moun tchwé tout tibolonm-yan ki té gen dézan ouben mwens annan vil Bètléyèm ké tout ròt vil-ya a so lantou. I té ka tchenbé kont di dat astrològ-ya té bay li-a. 17 A konsa sa profèt Jérémi té di, fèt : 18 « Annan vil Rama, nou ka tandé vwa roun moun : roun moun ka pléré é ki ka jémi bokou. A Rachèl ki ka pléré pou so pitit, é i pa lé yé konsolé l’, paské so pitit pa la ankò. » 19 Apré lanmò Éròd, zanj Jéova-a parèt annan rèv Jozèf lò i té Éjip. 20 I di li : « Lévé, pran timoun-an ké so manman épi routounen Israyèl, paské sa-ya ki té ka chaché tchwé timoun-an, yé mouri. » 21 Donk, i lévé é i routounen Israyèl ké timoun-an ké so manman. 22 Mé lò i anprann ki a Arkélayis ki té ka dirijé Jidé annan plas so papa, Éròd, i té pè alé Jidé. Épi, kou Bondjé té avèrti li annan roun rèv, i pati Galilé. 23 I alé rété annan roun vil yé k’aplé Nazarèt pou sa profèt-ya té anonsé réyalizé : « Yé ké aplé l’ Nazaréyen. »