Proverbes

3 Maré yé annan to dwèt, marké yé asou tablèt to tchò. 6 Pannan mo té annan lafinèt mo kaz, mo té ka gadé annan fant lafinèt-a. 7 Mo té ka gadé moun-yan ki pa gen èspéryans, é mo wè annan ran jennjan-yan, roun tiboug ki pa té gen anyen annan so tèt. 8 I pasé òbò kwen lari sa fanm-an, épi i maché annan dirèksyon kaz madanm-an. 9 Solèy-a té ka kouché, i té oswè, lannwit ké soukou té ka tonbé. 10 Épi mo wè madanm-an vini òbò li, i té abiyé kou roun fanm ki ka mennen roun vyé lavi, ké roun mové lidé dèyè so tèt. 11 A roun fanm ki kontan fè dézòrd é ki ka provoké moun, i pa janmen a so kaz. 12 Roun kou i dèrò, roun kou i asou tout laplas, i òbò tout kwen lari ka djété. 13 Épi men, i ka pran l’ épi i ka bo l’, i ka gadé l’ ké toupé, épi i ka di li : 14 « Mo té pou ofri sakrifis lapè. Jòdla mo rèspèkté promès mo fè-a. 15 A pou sa mo soti pou wè to, pou chaché to, é mo trapé to ! 16 Mo mété bèl dra asou mo lit, fèt ké len ké bokou koulèr ki ka vini di Éjip. 17 Mo mété mir, aloès ké kannèl asou mo lit pou i santi bon. 18 Vini, a pou nou fè lanmou jik jou louvri ; annou pran plézi fè lanmou ansanm. 19 Paské mo mari pa annan kaz-a, i pati pou vwayajé roun koté ki lwen. 20 I pran roun sak soumaké é i pa ké rouvini anvan lalin-an ké plen. » 21 Fanm-an ka rivé bloublou tiboug-a afòrs i fò pou pran tèt moun. I ka charmé l’ ké paròl dous kou myèl. 22 Rounsèl kou i ka swiv fanm-an, kou roun toro yé ka mennen pou yé tchwé l’, kou roun wonm abèbè yé ka mennen pou maré l’ ké chenn pou pini l’, 23 jiktan roun flèch krévé so fwa ; kou roun zozo ki ka kouri annan roun trap, i pa gen roun lidé i ké pédi so lavi akoz di sa. 24 É aprézan mo pitit, kouté mo ; byen louvri to zorè pou kouté sa mo ka di to-a. 25 Pa lésé to tchò pran chimen sa fanm-an. Pa alé dèyè sa fanm-an. 26 Paské akoz di li i gen bokou ki mouri ; wi, i tchwé roun patché moun. 27 So kaz ka mennen annan Tonm-an, i ka désann koté moun mouri-ya fika.