Proverbes

9 Vré sajès-a fè so kaz ; i fè so sèt kolonn. 2 I byen préparé so vyann, i mélanjé so diven, apré sa i mété tout bagaj asou so tab. 3 I voyé so sèrvant rélé dipi koté ki pi rot annan vil-a : 4 « Zòt ki ka krè tout bagaj, vini isi-a ! » I ka di sa-ya ki pa gen bon sans : 5 « Vini ! Manjé mo dipen épi bwè diven mo mélanjé-a. 6 Arété krè tousa yé ka di zòt, é zòt ké viv ; vansé asou chimen entélijans-a. » 7 Sa-la ki ka korijé roun moun ki arogan, ké ronté. É sa-la ki ka korijé roun moun ki mové, ké soufri. 8 Pa korijé roun moun ki arogan, pas a rayi i ké rayi to. Korijé roun moun ki gen sajès, é i ké kontan to. 9 Si to ka partajé roun bagaj ké roun moun ki saj, i ké vin pi saj ankò. Si to ka ansényé roun moun ki jis, i ké konnèt plis bagaj ankò. 10 Krenn Jéova, a koumansman sajès-a, é konnèt Sa-la ki Pi-Sen-an, men sa ki entélijans-a. 12 Si to ka vin gen sajès, a to ki ké trapé bénédiksyon. Si to sa roun moun ki arogan, a to rounso ki ké rékòlté sa to sonmen. 13 Roun fanm sòt ka fè dézòrd. I pa konnèt pyès anyen. 14 I ka asiz douvan so lapòt kaz, asou roun ban, dipi koté ki pi rot annan vil-a, 15 é men sa i ka rélé pou moun ka pasé, pou sa-ya ki ka maché drèt douvan yé : 16 « Zòt ki ka krè tousa yé ka di zòt, vini isi-a ! » I ka di sa-ya ki pa gen bon sans : 17 « Dlo moun ka vòlò dous pou bwè, é manjé moun ka manjé san pyès moun pa wè chwit pou manjé. » 18 Mé yé pa savé ki a la sa-ya ki san fòrs annan lanmò fika, ki sa-ya sa fanm-an ka envité, a ofon Tonm-an yé fika.