Daniel

9 Annan prémyé lannen di Daryis, pitit Asiyéris — roun désandan di Mèd-ya ki moun-yan té mété pou i rwa asou rwayonm Kaldéyen-yan — , 2 pannan prémyé lannen i té rwa, mo, Danyèl, mo konprann grasa sa ki marké annan liv-ya, dapré sa Jéova té di profèt Jérémi, konmyen lannen Jérizalèm té ké rété krazé : 70 lannen. 3 Atò mo palé pou Jéova vré Bondjé-a. Mo sipliyé l’, mo rété san manjé, ké roun twèl sak asou mo é mo té kouvri ké sann. 4 Mo priyè Jéova mo Bondjé é men sa mo di li : « O Jéova vré Bondjé-a, Bondjé ki gran é ki ka fè tout moun rété èstébékwé, ki ka rèspèkté so alyans é ki ka aji ké lanmou fidèl ké sa-ya ki kontan l’ é ki ka obéyi so koumannman, 5 nou péché, nou fè sa ki mové, nou aji ké méchansté, nou rébélé nou kò ; é nou tounen nou do bay to koumannman ké to règ. 6 Nou pa kouté to sèrvitèr, profèt-ya, ki vini annan to non pou palé bay nou rwa, nou prens, nou gangan ké tout moun annan péyi-a. 7 O Jéova, a to ki drèt, mé nou menm, a ronté ki asou nou jòdla, wi asou wonm Jida-ya, asou sa-ya ki ka rété Jérizalèm ké tout Israyèl, asou sa ki pròch ké sa ki lwen, annan tout péyi koté to fè yé alé paské yé pa té fidèl. 8 « Ô Jéova, ronté asou nou, asou nou rwa, nou prens ké nou gangan, paské nou péché kont to. 9 O Jéova nou Bondjé, a to ki gen mizérikòrd é ki ka pardonnen, paské nou rébélé nou kò kont to. 10 Nou pa obéyi to, o Jéova, nou pa swiv lalwa to té fè to sèrvitèr, profèt-ya, bay nou. 11 Tout pèp Israyèl-a dézobéyi to Lalwa épi tounen so do bay to, i pa obéyi. Atò, to fè malò ké sèrman-an ki annan Lalwa Moyiz, sèrvitèr vré Bondjé-a, tonbé asou nou paské nou péché kont to. 12 To fè sa to té di ki té ké rivé nou é ki té ké rivé chèf-ya ki té ka dirijé nou, to fè roun gro malò vini asou nou ; sa ki rivé Jérizalèm pa té janmen fèt pyès koté asou latè-a. 13 Tout sa malò-ya tonbé asou nou kou sa té marké annan Lalwa Moyiz. É magré sa, nou pa arété fè sa ki té mové pou fè to plézi, o Jéova nou Bondjé, é nou pa chaché konprann to vérité. 14 « Atò, Jéova té ka gadé é i fè malò-a vini asou nou, paské Jéova nou Bondjé jis annan tousa i ka fè, é magré sa, nou pa obéyi l’. 15 « O Jéova nou Bondjé, to ki fè to pèp soti an Éjip grasa to lanmen ki fò, to ki fè tout moun konnèt to non jik jòdla, nou péché é nou aji ké méchansté. 16 O Jéova, dapré tousa to ka fè ki jis, souplé, a pou to kòlè ké to raj pasé lwen di to vil Jérizalem, to montangn ki sen ; paské tout moun a nou lantou ka méprizé Jérizalèm ké to pèp akoz di nou péché é akoz di fot nou gangan-yan. 17 É aprézan, o nou Bondjé, kouté lapriyè to sèrvitèr ké tousa i ka di pou sipliyé to é, akoz di to non, o Jéova, fè to vizaj kléré asou to tanp yé krazé. 18 Kouté mo, o mo Bondjé, épi tandé ! Louvri to wéy épi gadé kouman nou krazé, gadé vil-a ki ka poté to non ; pas a pa paské nou ka fè bagaj ki jis nou ka sipliyé to, mé a paské to gen bokou mizérikòrd. 19 O Jéova, tandé. O Jéova, pardonnen nou. O Jéova, pran tan gadé épi fè roun bagaj ! Pa pran tròp tan, akoz di to non, o mo Bondjé, pas to vil ké to pèp ka poté to non. 23 Lò to koumansé sipliyé mo, mo rousouvwè roun mésaj é mo vini bay to l’, paské to sa roun moun ki gen bokou valò. Donk, a pou to byen gadé sa mésaj-a é a pou to konprann vizyon-an. 25 A pou to savé é a pou to konprann ki, dipi lòrd yé bay pou réparé é pou roukonstrwi Jérizalèm jik Mési-a, Gid-a, rivé, i ké gen 7 simenn, ké 62 simenn osi. Yé ké réparé l’ é yé ké roukonstwri l’, ké roun plas piblik ké roun kannal, mé sa ké rivé annan roun lépòk difisil. 26 « É lò 62 simenn-yan ké fini, yé ké tchwé Mési-a, é pésonn pa ké la pou idé l’. « É roun chèf ki ka vini ké so larmé ké détrwi vil-a ké koté ki sen-an. É a gro dlo ki ké krazé l’. É jouktan lafen-an rivé, i ké gen lagèr. Bondjé désidé krazé l’ nèt.