Daniel

11 Alòr i di mo : « O Danyèl, to ki sa roun wonm ki gen bokou valò, byen kouté sa mo ké di to. Aprézan, mété to kò dibout, paské yé voyé mo koté to. » Lò i di mo sa, mo mété mo kò dibout, mo té tou ka tranblé. 12 Épi i di mo : « Pa pè, o Danyèl. Dipi prémyé jou to chaché konprann é to chaché fè to kò toupiti douvan to Bondjé, yé tandé to paròl, é a pou sa mo vini. 14 Mo vini èspliké to sa ki ké rivé to pèp pannan dèrnyé jou-ya, paské sa vizyon-an gen pou fèt toujou. » 16 Alòr roun moun ki té ka sanblé roun wonm touché mo lèv ; mo louvri mo bouch é mo di sa-la ki té douvan mo-a : « Mo sényèr, vizyon-an ka bay mo rounsèl latranblad, é mo pa gen fòrs. 17 Donk mo menm ki sa to sèrvitèr, kouman mo ké pouvé palé ké to, mo sényèr ? Paské, mo pa gen pyès fòrs, ni pyès souf ankò. » 19 Apré sa, i di mo : « Pa pè, to ki gen bokou valò ! A pou lapè rété asou to. A pou to fò, wi a pou to fò. » Pannan i té ka palé pou mo, mo roupran fòrs épi mo di li : « Palé, mo sényèr, paské to bay mo fòrs. »