2 Timothée

2 é bagaj-ya to tandé mo di to é ki roun patché témwen wè osi, a pou to bay plizyèr wonm fidèl tchenbé yé, é yé menm apré sa ké adòk pou ansényé ròt-ya. 3 Kou roun bon sòlda Jézi Kris, a pou to paré pou soufri. 9 a pou sa bon nouvèl-a mo ka soufri é mo lajòl kou roun bandi. Paròl Bondjé-a li menm pa maré. 10 A pou sa mo ka kontinyé tchenbé rèd pou tout sa Bondjé chwazi, pou yé menm osi trapé délivrans ké laglwar pou tout-tan grasa Jézi Kris. 12 si nou ka kontinyé tchenbé rèd, nou ké rwa é nou ké dirijé ké li osi ; si nou ka di nou pa konnèt li, li menm osi ké di i pa konnèt nou ; 13 si nou pa fidèl, li menm ka rété fidèl, paské i pa pouvé alé kont so pròp kò. 15 Fè tousa to pouvé pou to vini douvan Bondjé kou roun moun i kontan, roun ouvriyé ki pa gen pyès rézon pou i ronté, ki ka byen èspliké paròl lavérité-a. 16 Mé pa kouté pyès diskour ki pa gen pyès valò ki ka sali sa ki sakré, paské pi sa ké alé pi yé ké dérèspèkté Bondjé. 19 Magré sa, fondasyon Bondjé mété-a, solid é i pa ka boujé. Men sa ki marké asou l’ : « Jéova konnèt sa ki di li » é « A pou tout moun ki ka poté non Jéova arété fè sa ki mové ». 20 Mé, annan roun gran kaz, a pa yenki bagaj fèt ké lò ouben ki fèt an arjan i gen, mé i gen osi bagaj an bwa ké bagaj fèt ké latè gra. Yé ka sèrvi roun ran pou fè bagaj ki enpòrtan épi rounòt ran pou fè bagaj ki pa enpòrtan. 21 Donk, si roun moun ka rété lwen di sa bagaj-ya ki pa enpòrtan, yé ké itilizé sa moun-an pou fè bagaj ki enpòrtan, i ké sen, i ké itil pou so mèt, i ké paré pou fè tout kalité bon bagaj. 22 Donk pran kouri pou tout anvi jennjan-yan gen, mé kontinyé chaché fè sa ki jis, lafwa, lanmou, lapè, ansanm ké sa-ya ki ka fè Bondjé konfyans ké roun tchò ki pròp. 23 Anplis di sa, pa asèpté kozé sòt ké initil, paské to savé ki a sa ki ka lévé blo. 24 Paské roun èsklav Sényèr-a pa gen pou briga ; pasé i fè sa, i divèt dous ké tout moun, a pou i vayan pou ansényé, a pou i kontrolé so kò lò yé ka malmennen l’, 25 é lò i gen moun ki pa dakò ké sa i ka ansényé, a pou i ansényé yé ké dousèr. Bondjé ké pitèt pèrmèt yé répanti pou yé jwenn vré konésans di lavérité-a, 26 konsa, yé ké viré gen bon sans é yé ké soti anba trap Djab-a ki pran yé tou vivan pou yé fè so volonté.