Isaïe

45 Men sa Jéova ka di Siris, so wen, sa-la i tchenbé so lanmen drèt-a, pou fè nasyon-yan kouché plat douvan li, pou tiré zarm annan lanmen rwa-ya, pou louvri douvan li dé lapòt-ya, konsa lapòt vil-a pa ké fronmen : 2 « Mo ké maché douvan to, é mo ké fè ti montangn-yan vini plat. Lapòt kwiv-ya, mo ké krazé yé, bar fè-ya, mo ké krazé yé. 9 A pou malò tonbé asou moun-an ki ka briga ké Sa-la ki fè l’, pas i sa roun moso potri anmitan plizyèr moso potri kasé ki atè ! Ès latè gra ké di Moun-an ki ka travay li-a : « Kisa to ka fè ? » Ouben ès bagaj-a to fè ké to lanmen ké di : « To pa gen lanmen » ? 10 A pou malò tonbé asou sa-la ki ka di roun papa : « Ki kalité timoun to vin gen ? », é sa-la ki ka di roun madanm : « Ki kalité pitit to fè la ? » 11 Men sa Jéova, Sen Israyèl-a, sa-la ki fè l’, ka di : « Ès zòt ké gen toupé doumandé mo bagaj asou sa ki ké rivé ? Ès zòt ké bay mo lòrd parapòrta mo pitit ké parapòrta sa mo fè ? 12 Mo fè latè-a é mo fè moun-yan ki asou l’. Mo louvri syèl-a kou roun létòf ké mo pròp lanmen, é mo di zétwèl-ya ké tousa ki annan syèl-a sa pou yé fè. » 18 Paské Jéova, Kréyatèr syèl-a, vré Bondjé-a, sa-la ki kréyé latè-a, ki fè l’ rété byen solid, ki pa kréyé l’ pou anyen, mé ki fè l’ pou moun viv asou l’, men sa i ka di : « Mo sa Jéova, i pa gen ròt.