Késyon moun-yan ka pozé

Titalò, kisa Jéova ké bay nasyon-yan « anvi » fè ?

Men sa Révélation 17:16, 17 ka di asou sa ki ké rivé lò gran tribilasyon ké koumansé : « Kanta dis kòrn to wè-ya ké bèt féròs-a, yé ké rayi fanm-an ki ka kouché ké tout wonm é yé ké kayakaya l’ é yé ké lésé l’ toutouni ; yé ké manjé so lachè é yé ké boulé l’ nèt. Paské Bondjé mété anvi fè so volonté annan yé tchò, wi, anvi fè sèl bagaj yé lé fè-a é yé ka bay bèt féròs-a pouvwar-a pou i rwa ». Anvan, nou piblikasyon té ka di ki Jéova té ké bay nasyon-yan « anvi » krazé fo rélijyon-yan.

Mé, nou divèt rouvin asou sa èsplikasyon-an. Anfèt, Jéova ké bay nasyon-yan « anvi » bay « bèt féròs-a pouvwar-a pou i rwa ». Pou konprann kouman sa profési-a ké fèt, nou ké réponn déztrwa késyon.

Di kimoun yé ka palé annan sa profési-a ? « Fanm-an ki ka kouché ké tout wonm », sa lé di « Gran Babilòn-an », ka réprézanté tout fo rélijyon-yan yé tout ansanm. « Bèt féròs-a ki rouj » ka réprézanté Organisation des Nations unies-a. Yé fè sa òrganizasyon-an an 1919 pou éséyé mété lapè asou latè-a. A sa lépòk-a, yé té k’aplé l’ Société des Nations (Rév. 17:3-5). « Dis kòrn »-yan yé menm ka réprézanté tout gouvèrnman-yan ki ka soutni bèt féròs-a.

Kisa fanm-an ki ka kouché ké tout wonm ka fè ké bèt féròs-a ki rouj ? Fanm-an ki ka kouché ké tout wonm « asiz » asou bèt féròs-a, sa lé di ki i ka idé l’ é i ka chaché fè l’ fè sa i lé.

Kisa ki ké rivé fanm-an ki ka kouché ké tout wonm ? Bèt féròs-a ké dis kòrn-yan ki ka soutni sa bèt féròs-a « ké rayi fanm-an ki ka kouché ké tout wonm » tèlman ki yé ké pran tout so richès é yé ké di moun-yan kouman i méchan. É apré sa, yé ké krazé l’ nèt pas a sa Bondjé désidé pou li (Rév. 17:1 ; 18:8). I pa ké gen pyès fo rélijyon ankò. Mé anvan sa, Jéova ké fè nasyon-yan fè roun bagaj yé pa jen fè anvan.

Kisa Jéova ké bay nasyon-yan anvi fè ? Jéova ké mété « anvi fè so volonté » annan tchò dis kòrn-yan. So volonté, a « bay bèt féròs-a [ki rouj] », Nations unies-ya, « pouvwar-a pou i rwa » (Rév. 17:13). Réfléchi asou sa sa lé di. Ès a gouvèrnman-yan ki ké désidé bay bèt féròs-a yé pwisans ké yé pouvwar ? Non ! Profési-a ka montré ki a Bondjé ki ké bay yé anvi fè sa (Prov. 21:1 ; gadé Isaïe 44:28). Ès a roun bagaj ki ké fèt piti piti ? Non ! A roun bagaj ki ké fèt rounsèl kou. É lò i ké rousouvwè sa pouvwar-a, lanmenm bèt féròs-a ké fè sa Bondjé ké désidé pou fo rélijyon-yan : i ké krazé yé nèt.

Atò, kisa nou pouvé antann ? A pa lapenn nou gadé enfòrmasyon-yan pou wè si gouvèrnman-yan ka soutni Nations unies-ya plizanplis. Pasé sa, men sa nou divèt antann : Jéova ké fè gouvèrnman-yan bay Nations unies-ya yé pouvwar rounsèl kou. A sa moman-an, nou ké savé ki gran tribilasyon-an tou pròch. Toupannan nou ka antann, « annou gardé nou wéy byen louvri é annou gardé nou bon sans », pas titalò, i gen bagaj ki ké chanjé rounsèl kou ! (1 Thess. 5:6).