LÉSON 8
Poukisa Bondjé ka lésé mové bagaj-ya ké sé soufrans-ya ?
1. Kouman mové bagaj-ya koumansé èkzisté ?
Bondjé lésé moun-yan koumandé asé lontan pou montré ki yé pa pouvé réglé problèm monn-an.
Mové bagaj-ya koumansé èkzisté asou latè-a lò Satan di prémyé manti-a. O koumansman, Satan té sa roun zanj parfè, mé « i pa tchenbé annan lavérité-a » (Jean 8:44). I té lé moun-yan adoré l’, mé a Bondjé rounso nou divèt adoré. Satan manti pou Èv, prémyé fanm-an, é i rivé fè Èv obéyi l’ pasé i obéyi Bondjé. Adan swiv Èv : i dézobéyi Bondjé. So désizyon mennen soufrans ké lanmò. — Li Genèse 3:1-6, 19.
Lò Satan rivé fè Èv dézobéyi, i lévé roun rébélyon kont souvérènté Bondjé, (sa lé di drwa i gen di dirijé asou tout sa i kréyé). Laplipar sé moun-yan ka swiv Satan : kou li, yé pa lé Bondjé pou Chèf. A konsa Satan divini « chèf monn-an ». — Li Jean 14:30 ; 1 Jean 5:19.
2. Ès kréasyon Bondjé-a té gen défo ?
Tout bagaj Bondjé fè parfè. Sé moun-yan ké sé zanj-ya i kréyé té pouvé obéyi li parfètman (Deutéronome 32:4, 5). I fè nou ké libèrté di chwazi fè sa ki bon ouben fè sa ki mové. Sa libèrté-a ka pèrmèt nou montré li nou lanmou. — Li Jacques 1:13-15 ; 1 Jean 5:3.
3. Poukisa Bondjé lésé sé soufrans-ya jik jòdla ?
Jéova pèrmèt rébélyon kont so souvérènté jik jòdla. Poukisa ? Pou montré ki lò sé moun-yan ka éséyé dirijé san li, sa pa ka mennen pyès bon bagaj (Ecclésiaste 7:29 ; 8:9). Sé moun-yan ka dirijé yé kò dipi 6 000 lannen, é men sa nou tout ka wè : sé chèf imen-yan pa rivé tiré lagèr, kriminalité, enjistis ké sé maladi-ya. — Li Jérémie 10:23 ; Romains 9:17.
Dominasyon Bondjé pa kou sa di sé imen-yan, sopa ka mennen bon bagaj pou sa ki ka soutni l’ (Isaïe 48:17, 18). Titalò, Jéova ké tiré tout sé gouvèrnman imen-yan. Sé moun-yan ki ka chwazi Bondjé pou koumandé yé, a yé rounso ki ké rété asou latè-a (Isaïe 11:9). — Li Daniel 2:44.
Gadé vidéyo Poukisa Bondjé ka pèrmèt soufrans-ya ?
4. Kisa pasyans Bondjé ka pèrmèt nou fè ?
Satan di ki si sé moun-yan ka sèrvi Bondjé a pa paské yé kontan li, mé a pou rousouvwè roun bagaj. Ès ou lé montré ki sa bagaj-a a manti ? Ou pouvé ! Pasyans Bondjé ka pèrmèt nou montré si nou pi kontan i dirijé nou pasé moun dirijé nou. Fason nou ka viv ka montré ki chwa nou fè. — Li Job 1:8-12 ; Proverbes 27:11.
5. Kouman nou pouvé chwazi Bondjé pou Chèf ?
Nou chwa ka montré si nou lé Bondjé pou Chèf.
Kouman nou pouvé chwazi Bondjé pou Chèf ? A lò nou ka chaché kouman pou adoré l’ di bon fason-an é lò nou ka pratiké vré rélijyon-an ki ka apiyé asou so Paròl, Labib-a (Jean 4:23). Lò nou pa ka fè lapolitik ké lagèr, kou Jézi, nou ka montré ki nou pa chwazi Satan pou chèf. — Li Jean 17:14.
Satan ka itilizé so pouvwar pou pousé moun-yan fè péché sèksyèl é fè ròt mové bagaj. Si nou ka rijété sa bagaj-ya, moun di nou fanmi ké nou zanmi ké pétèt ari di nou tèt ouben yé ké baré nou chimen (1 Pierre 4:3, 4). A pou sa fo nou chwazi : Ès nou ké frékanté moun ki kontan Bondjé ? Ès nou ké swiv so lalwa ki saj é ki plen ké lanmou ? Si nou ka fè sa, nou ké montré ki Satan manti lò i di ki pyès moun pa té ké obéyi Bondjé anba éprèv. — Li 1 Corinthiens 6:9, 10 ; 15:33.
Bondjé kontan moun-yan, é so lanmou ka bay nou asirans ki mové bagaj ké sé soufrans-ya ké disparèt. Sa ki gen lafwa annan Bondjé é ki ka chwazi so gouvèrnman ké viv pou tout-tan asou latè-a. — Li Jean 3:16.