Kouman ou pouvé divini zanmi Bondjé ?

1, 2. Bay non déztrwa zanmi Jéova.

KI KALITÉ zanmi ou lé gen ? Ou lé roun moun ou kontan é ki ka tonbé dakò ké ou. Roun moun ki byen é ki gen kalité ou ka admiré.

² Jéova ka chwazi sèrten moun pou yé divini so zanmi. Parèkzanp, Abraam té sa roun zanmi di Jéova (Isaïe 41:8 ; Jacques 2:23). Jéova té kontan David osi. I di ki David té sa « roun wonm ki [té] ka aji sélon so volonté » (Actes 13:22). É profèt Danyèl té sa roun moun « ki [té] gen bokou valò » pou Jéova (Daniel 9:23).

3. Poukisa Abraam, David ké Danyèl té sa zanmi Jéova ?

³ Kouman Abraam, David ké Danyèl divini zanmi ké Jéova ? Jéova di Abraam : « To kouté tousa mo di to » (Genèse 22:18). Jéova ka divini Zanmi ké moun ki enb, ki ka fè yé kò tou piti douvan li é ki ka kouté l’. I menm pouvé divini Zanmi tout roun nasyon. I di Israyélit-ya : « Fè sa mo ka di zòt é mo ké divini zòt Bondjé, é zòt ké divini mo pèp » (Jérémie 7:23). Si ou vréman lé divini zanmi Jéova, ou divèt kouté l’.

JÉOVA KA PROTÉJÉ SO ZANMI

4, 5. Kouman Jéova ka idé so zanmi ?

⁴ Labib-a ka di ki Jéova ka chaché okazyon pou idé moun-yan ki kontan li ké tout yé tchò (2 Chroniques 16:9). Annan Psaume 32:8, Jéova ka promèt so zanmi : « Mo ké fè to divini pèrspikas (entélijan) é mo ké anprann to chimen to divèt pran-an. Mo lé konséyé to, mo wéy asou to. »

⁵ Nou gen roun lèlmi pwisan ki pa lé nou divini zanmi Bondjé. Mé Jéova lé protéjé nou (li Psaume 55:22). Nou ka adoré l’ ké tout nou tchò paské nou sa so zanmi. Nou ka rété fidèl menm lò sa rèd. É kou David, nou sir ki i ké idé nou. I ékri asou Jéova : « Mo pa ké tonbé paské i a mo drèt. » (Psaume 16:8 ; 63:8). Kisa Satan ka fè pou nou pa rété zanmi ké Bondjé ?

SATAN KA AKIZÉ MOUN-YAN

6. Di kisa Satan ka akizé moun-yan ?

⁶ Annan chapit 11-a, nou anprann ki Satan akizé Jéova, i di ki i té sa roun mantèr. É i di osi ki Jéova pa jis paské i pa lésé Adan ké Èv désidé pou yé menm sa ki bon ké sa ki mové. Liv Job ka anprann nou ki Satan ka akizé osi moun-yan ki lé divini zanmi Bondjé. Satan ka di ki si yé ka adoré Bondjé, a pa paské yé kontan l’, mé a paské yé pouvé rousouvwè roun bagaj di li. I jis ka di ki i pouvé pousé nenpòrt moun révòlté kont Bondjé. Annou wè kouman Jéova protéjé Jòb é kisa nou pouvé anprann asou sa ki rivé l’.

7, 8. a) Kisa Jéova té ka pansé di Jòb ? b) Kisa Satan di asou Jòb ?

⁷ Jòb, a té kimoun ? Jòb, a té roun bon moun ki té asou latè-a i gen 3 600 lannen. Jéova di ki annan sa lépòk-a, i pa té gen pyès moun kou Jòb asou latè-a. Jòb té gen bokou rèspè pou Jéova, é i té rayi sa ki mové (Job 1:8). I té sa roun vré zanmi Bondjé.

⁸ Mé Satan di ki si Jòb té ka adoré Bondjé a paské i té ka gadé pou so pròp kò, pou sa i té pouvé trapé. Satan di Jéova : « Ès a pa to menm ki mété roun baryè a so lantou é alantou so kaz ké tousa ki di li [...] ? To béni tousa i fè, é i rivé gen roun patché zannimo annan péyi-a. Mé, pou chanjé, lonjé to lanmen, é détrwi tousa i gen, épi to ké wè si i pa ka gadé to an mitan to wèy pou i modi to » (Job 1:10, 11).

9. Kisa Jéova lésé Satan fè ?

⁹ Satan akizé Jòb, i di ki i ka adoré Jéova sèlman pou bénédiksyon i té ka bay li. Satan di osi ki i té ké rivé fè Jòb arété sèrvi Bondjé. Jéova pa té dakò ké Satan. Mé i lésé l’ kouvri Jòb ké éprèv. Konsa, sa té ké montré si Jòb té vréman kontan Jéova.

SATAN KA ATAKÉ JÒB

10. a) Kouman Satan ataké Jòb ? b) Kouman Jòb réyaji ?

¹⁰ Pou koumansé, Satan fè ki Jòb pédi so zannimo, i gen sa yé vòlò i gen sa yé tchwé. Dèyè sa, i fè près tout so sèrvitèr-ya mouri. Jòb pédi tousa i té gen. Pou fini, Satan jis fè so 10 pitit mouri annan roun tanpèt. Magré tousa, Jòb rété fidèl douvan Jéova. I pa janmen di a Bondjé ki té fè roun bagaj ki pa té byen (Job 1:12-19, 22).

11. a) Kouman Satan ataké Jòb ankò ? b) Kouman Jòb réyaji ?

¹¹ A pa sa rounso Satan fè. I provoké Bondjé lò i di asou Jòb : « Frapé so zo ké so lachè, épi to ké wè si i pa ka [...] modi to » (Job 2:5, 7). A konsa, Satan bay Jòb roun maladi ki té ka fè l’ soufri bokou. Mé magré sa, Jòb rété fidèl douvan Jéova. I di ki i té ké rété fidèl jistan i mouri (Job 27:5).

12. Kouman Jòb montré ki Satan sa roun mantèr ?

¹² Jòb pa té savé anyen di tousa Satan té di é i pa té savé non plis poukisa i té ka soufri konsa. I té ka pansé ki so problèm té ka vini di Jéova (Job 6:4 ; 16:11-14). Mé i rété fidèl douvan Jéova kan menm. Dipi sa jou-a, i pa té gen pyès dout ankò : Jòb pa té janmen ka gadé pou so pròp kò. I té sa zanmi Bondjé paské i té kontan l’. Anyen di sa Satan té di pa té vré !

13. Kisa fidélité Jòb mennen ?

¹³ Menm si Jòb pa té savé sa ki té ka pasé annan syèl-a, i rété fidèl douvan Bondjé é i montré ki Satan té sa roun moun mové. Jéova rékonpansé so zanmi Jòb pou so fidélité (Job 42:12-17).

OU OSI, SATAN KA AKIZÉ OU

14, 15. Di kisa Satan ka akizé tout moun ?

¹⁴ Sa ki rivé Jòb ka anprann nou plizyèr bagaj enpòrtan. Jòdla, Satan ka akizé nou, i ka di ki nou ka adoré Jéova paské i ka bay nou ròt bagaj an échanj. Annan lépòk Jòb, Satan té di : « Roun moun ké bay tousa i gen pou so lavi » (Job 2:4). Atò, a pa Jòb rounso Satan akizé : i akizé tout moun, i di ki yé tout ka gadé pou yé pròp kò. Roun patché lannen apré Jòb mouri, Satan té ka kontinyé jouré Jéova ké akizé so sèrvitèr-ya. Parèkzanp annan Proverbes 27:11, Bondjé di : « Mo pitit, aji ké sajès, é fè mo tchò kontan, pou mo pouvé réponn sa-la ki ka provoké mo [jouré mo]. »

¹⁵ Ou pouvé désidé obéyi Jéova, divini so zanmi é rété fidèl douvan li. A konsa ou ké montré ki Satan sa roun mantèr. Menm si ou gen gran chanjman pou fè pou divini zanmi Bondjé, a pi bon désizyon ou pouvé pran ! É a roun désizyon enpòrtan. Satan ka di ki, si ou gen problèm, ou pa ké rété fidèl douvan Bondjé. Anplis di sa, i ka éséyé bloublou nou pou nou pa rété fidèl. Kouman i ka fè sa ?

16. a) Kouman Satan ka fè pou anpéché moun-yan adoré Jéova ? b) Kouman Djab-a pouvé éséyé anpéché ou adoré Jéova ?

¹⁶ Satan ka sèrvi bokou bagaj pou détrwi nou lanmityé ké Bondjé. I ka ataké nou « kou roun lyon ki ka grondé fò », pou manjé nou (1 Pierre 5:8). A pa pou ou rété èstébékwé : zanmi, moun di ou fanmi ouben ròt moun ké pitèt éséyé anpéché ou étidyé Labib-a é fè sa ki byen. A sa moman-an, pitèt ou ké santi yé ka « ataké » oua (Jean 15:19, 20). Anplis di sa, Satan ka fè kousidiré i sa roun « zanj limyèr » : i ka éséyé bloublou nou pou fè nou dézobéyi Jéova (2 Corinthiens 11:14). Épi, pou anpéché nou adoré Jéova, i ka fè nou krè ki nou pa janmen asé bon pou Jéova (Proverbes 24:10).

OBÉYI JÉOVA

17. Kisa ki ka pousé nou obéyi Jéova ?

¹⁷ Lò nou ka obéyi Jéova, nou ka montré ki Satan sa roun mantèr. Kisa ki ké idé nou obéyi Jéova ? Labib-a ka di : « To divèt kontan Jéova to Bondjé ké tout to tchò, tout to nanm, épi ké tout to fòrs » (Deutéronome 6:5). Nou ka obéyi Jéova paské nou kontan li. É plis nou kontan li, plis nou anvi fè tousa i ka doumandé nou fè. Apot Jan ékri : « Kontan Bondjé, men sa sa lé di : obéyi so lalwa. Mé, so lalwa pa fòrsan » (1 Jean 5:3).

18, 19. a) Jéova ka di ki i gen bagaj ki mové. Kilès ? b) Jéova pa janmen ka doumandé nou fè roun bagaj ki nou pa pouvé fè. Kouman nou savé sa ?

¹⁸ Jéova ka di ki i gen bagaj ki mové. Kilès ? Yé ka bay déztrwa èkzanp annan ankadré « Rayi sa Jéova rayi ». Lò ou ké li l’ prémyé kou-a, pitèt ou ké pansé ki roun ran annan sa bagaj-ya pa anyen. Mé li vèrsé Labib-ya ki ékri épi pran tan pou réfléchi asou yé. A konsa ou ké konprann ki obéyi lalwa Jéova a roun bon bagaj. Anplis di sa, pitèt ou ké konprann ki ou divèt fè chanjman annan ou lavi. Si ou ka fè sa chanjman-yan, ou ké konnèt lapè ké tchò kontan tout zanmi Bondjé ka rousanti (Isaïe 48:17, 18). Menm si sa pa fasil, ou pouvé rivé fè l’. Kouman nou pouvé sir di sa ?

¹⁹ Jéova pa janmen ka doumandé nou fè roun bagaj ki nou pa pouvé fè (Deutéronome 30:11-14). I sa roun vré Zanmi é i konnèt nou pasé nou menm. I konnèt nou kalité ké nou défo (Psaume 103:14). Apot Pòl ka bay nou sa ankourajman-an : « Bondjé fidèl, é i pa ké janmen pèrmèt ki zòt tanté pasé sa zòt pouvé sipòrté épi, lò tantasyon-an ké rivé, i ké préparé fason-an pou zòt soti anba l’, pou zòt pouvé andiré l’ » (1 Corinthiens 10:13). Asiré pa pitèt Jéova ké toujou bay nou fòrs pou fè sa ki byen. I ké bay ou « pwisans ki ka dépasé pwisans ki nòrmal-a », sa lé di roun pwisans ki èstraòrdinèr pou idé ou tchenbé rèd anba sitiyasyon ki difisil (2 Corinthiens 4:7). Pòl santi Jéova idé l’ lò i té anba éprèv. A pou sa i di : « Pou tout bagaj mo gen fòrs gras a sa-la ki ka bay mo pwisans » (Philippiens 4:13).

ANPRANN KONTAN SA BONDJÉ KONTAN

20. Ki kalité nou divèt imité ? É poukisa ?

²⁰ Pou divini zanmi Jéova, a pou arété fè sa i ka di ki mové. Mé i gen ròt bagaj ankò pou fè (Romains 12:9). Zanmi Bondjé kontan sa Bondjé kontan. Psaume 15:1 jiska 5 (li) ka palé di zanmi Bondjé. Annan yé konpòrtman yé ka imité kalité Jéova : « lanmou, lajwa, lapè, pasyans, byenvéyans, labonté, lafwa, dousèr ké kontròl asou nou kò » (Galates 5:22, 23).

21. Kisa ki pouvé idé ou travay kalité Bondjé kontan ?

²¹ Kisa ki pouvé idé ou travay sa kalité-ya ? Fo ou pran labitid li ké étidyé Labib-a pou anprann sa Jéova kontan (Isaïe 30:20, 21). Si ou ka fè sa, ou ké kontan Jéova plis ankò. É pi ou ké kontan l’, pi ou ké anvi fè sa i ka di.

22. Si ou ka obéyi Jéova, kisa ki ké rivé ?

²² Lò ou ka fè chanjman ou divèt fè annan ou lavi, a kousidiré ou ka tiré vyé lenj ki té asou ou pou mété lenj ki nòv. Labib-a ka di ki nou divèt tiré « vyé pèrsonalité-a » épi mété « nouvo pèrsonalité-a » (Colossiens 3:9, 10). Menm si sa pa fasil, si nou ka fè sa chanjman-yan é si nou ka obéyi Jéova, i ké bay nou « roun gran rékonpans » (Psaume 19:11). A sa i promèt. Atò, pran désizyon obéyi Jéova é montré ki Satan sa roun mantèr ! Adoré Jéova paské ou kontan li, pa paské ou lé rousouvwè roun rékonpans. Konsa ou ké vréman divini zanmi Bondjé !