LÉSON 8

Sèrvi èkzanp pou anprann moun bagaj

Matthieu 13:34, 35

SA TO DIVÈT FÈ : Lò to ka anprann moun bagaj, sèrvi èkzanp ki senp pou bay moun-yan anvi kouté, é pou fè yé konprann lidé enpòrtan-yan.

Chwézi èkzanp ki senp. Menm fason Jézi té ka fè l’, sèrvi toupiti bagaj pou èspliké gran bagaj, é sèrvi bagaj ki senp pou èspliké bagaj ki rèd pou konprann. Pa palé di bagaj initil ki ka anpéché moun-yan konprann èkzanp-a. Panga pou sa i gen annan èkzanp-a byen maché ké sa to ka anprann moun-yan, pou yé pa mété yé lidé asou pyès bagaj ki pa k’alé annan sans sa to ka anprann yé.

A pou to byen gadé. Gadé sa ki ka pasé annan monn-an, étidyé piblikasyon-yan, épi kouté ansényan ki vayan. Marké èkzanp to ké pouvé sèrvi pou anprann moun-yan pi byen. Mété sa èkzanp-ya asou koté annan roun dosyé.
Sonjé pou kimoun to ké palé. Chwézi èkzanp ki ka palé di bagaj yé kontan fè é di bagaj ki ka entérésé yé. Panga pou sa to ké di pa jennen yé ouben fè yé mal.
Palé di lidé ki pi enpòrtan-an. Bay èkzanp pou lidé ki pi enpòrtan-yan pasé to fè l’ pou lidé ki pa enpòrtan. Moun-yan pa divèt tchenbé èkzanp-a rounso, mé léson yé anprann ké sa èkzanp-a osi.