LÉSON 38
Lavi a roun kado ki divèt gen valò pou nou
Annan lavi-a, i gen patché bagaj ki bèl toubonnman ki nou pouvé fè é ki ka bay nou tchò kontan. Menm si nou anba problèm, i toujou gen bagaj annan lavi-a ki ka bay nou lajwa. Atò, kouman nou pouvé montré ki lavi-a a roun bèl kado ki gen valò pou nou ? É poukisa nou divèt bay lavi-a valò ?
1. Poukisa nou divèt bay lavi-a valò ?
Nou divèt bay lavi-a valò paské a roun kado ki ka vini di nou Papa Jéova ki plen ké lanmou. A li ki « sours lavi-a », sa lé di, a li ki kréyé lavi-a (Psaume 36:9). « A li ki ka bay tout moun lavi ké souf ké tout bagaj » (Actes 17:25, 28). Sa vèrsé-a ka montré ki Jéova ka bay nou tousa nou bézwen pou kontinyé viv. Mé Jéova ka fè plis ki sa. I ka bay nou tousa nou bézwen di roun fason ki ka pèrmèt nou pran plézi annan lavi-a (li Actes 14:17).
2. Kouman nou pouvé montré Jéova ki lavi-a gen valò pou nou ?
Annan Labib-a, David, roun wonm ki té ka sèrvi Bondjé, té di Jéova : « To wéy wè mo lò mo té kou roun ti grenn annan vant mo manman » (Psaume 139:16). Sa ka montré ki Jéova ka gadé pou ou dipi lò ou té annan vant ou manman. Ou lavi gen bokou valò pou Jéova (li Matthieu 10:29-31). Lavi-a gen tèlman valò pou Jéova ki lò i ka wè roun moun tchwé rounòt moun ouben lò i ka wè roun moun tchwé so kòa, so tchò krazé (gadé nòt-a) (Exode 20:13). Sa ké fè Jéova lapenn osi si nou ka mété nou lavi ouben lavi ròt-ya an danjé. Lò nou ka protéjé nou lavi ké rèspèkté lavi ròt-ya, nou ka montré ki sa bèl kado-a gen valò pou nou.
ANNOU FOUYÉ ANNAN LABIB-A
Gadé plizyèr fason ou pouvé montré ki kado lavi-a gen valò pou ou.
3. Pran swen di ou lasanté
Lò nou ka vouwé nou lavi bay Jéova, nou ka promèt itilizé nou lavi pou fè so volonté. A kousidiré nou ka bay nou kò kou roun sakrifis pou Bondjé. Li Romains 12:1, 2, épi kozé asou sa késyon-yan :
Dapré sa vèrsé-ya, kisa ki divèt pousé ou pran swen di ou lasanté ?
Ki fason ou pouvé fè sa ?
4. Protéjé ou lavi ké sa-la di ròt-ya
Labib-a ka ankourajé nou évité fè bagaj ki danjéré. Gadé VIDÉYO-a pou wè sa ou pouvé fè pou pa mété ou lavi ké sa-la di ròt-ya an danjé.
Li Proverbes 22:3, épi kozé asou fason ou pouvé protéjé ou lavi ké sa-la di ròt-ya...
annan ou kaz,
annan ou travay,
lò ou ka fè èspòr,
lò ou annan roun loto.
5. Rèspèkté lavi timoun-an ki annan vant so manman
Ké bèl ti palò, David èspliké ki Jéova ka gadé tousa ka rivé ké roun timoun ki annan vant so manman. Li Psaume 139:13-17, épi kozé asou sa késyon-an :
Pou Jéova, lavi-a ka koumansé lò roun madanm ka tonbé ansent ouben lò bébé-a fin fèt ?
Lalwa-ya Jéova té bay pou pèp Israyèl té ka protéjé manman ké bébé-a ki té annan so vant. Li Exode 21:22, 23, épi kozé asou sa késyon-yan :
Kisa Jéova té ka pansé di roun moun ki té ka tchwé san fè èsprè roun bébé ki té annan vant so manman ?
Kisa Jéova ka rousanti lò roun moun ka chwazi tchwé bébé-a ki annan vant so manmanb ? (gadé nòt-a).
Kisa ou ka pansé di fason Jéova ka wè sa ?
Menm roun madanm ki savé ki lavi-a gen bokou valò pouvé pansé ki sèl bagaj-a i pouvé fè a jité so timoun. Li Isaïe 41:10, épi kozé asou sa késyon-an :
Si yé ka mété présyon asou roun madanm pou i jité so timoun, kimoun i pouvé doumandé pou idé li ? Poukisa ou ka pansé sa ?
I GEN MOU KA DI : « Tout madanm gen drwa désidé jité so timoun, a pa so kò non ? »
Poukisa ou sir ki lavi roun madanm ké bébé-a i gen ofon so vant gen valò pou Jéova ?
SA NOU WÈ
Labib-a ka anprann nou ki lavi-a, a roun bèl kado di Jéova. Nou divèt kontan, rèspèkté ké protéjé nou lavi ké sa-la di ròt-ya.
Kisa ou anprann
Poukisa nou lavi gen valò pou Jéova ?
Kisa Jéova ka rousanti lò roun moun ka tchwé rounòt moun ouben ka tchwé so kò ?
Poukisa lavi-a, a roun bèl kado ki gen valò pou ou ?
SA OU POUVÉ TRAPÉ OSI
Kouman nou pouvé di Jéova mèrsi pou bèl kado lavi-a ?
Ès Bondjé pouvé pardonnen roun madanm ki jité so timoun ?
« Kisa Labib-a ka di asou zafè jité timoun ? » (artik jw.org)
Kouman sa Bondjé ka pansé asou lavi-a divèt idé nou chwazi nou anmizman ?
« “Sports de l’extrême” : doit-on faire abstraction des risques ? » (Réveillez-vous !, 8 òktòb 2000)
É si roun moun lé tchwé so kò, kouman Labib-a pouvé idé l’ ?
« Mo lé mouri — Ès Labib-a pouvé idé mo si mo lé tchwé mo kò ? » (artik jw.org)
a Nòt-a : Jéova ka konprann doulò roun moun ki lé mouri é i lé idé l’. Jéova ka gadé pou sa-ya yé tchò krazé (Psaume 34:18). Pou wè kouman Jéova ka idé sa-ya ki lé tchwé yé kò, li annan parti « Sa ou pouvé trapé osi » sa artik-a : « Mo lé mouri — Ès Labib-a pouvé idé mo si mo lé tchwé mo kò ? »
b Nòt-a : Roun madanm ki ja jité so timoun pa bézwen kondannen so kò tròp. Jéova pouvé pardonnen l’. Pou gen plis enfòrmasyon asou sa, li annan parti « Sa ou pouvé trapé osi » sa artik-a : « Kisa Labib-a ka di asou zafè jité timoun ? ».