LÉSON 53
Kouman byen chwazi ou anmizman
Jéova sa « Bondjé ki éré-a » (1 Timothée 1:11). I lé nou tchò kontan é ki nou profité di lavi-a. I kontan lò nou ka pran tan pou pozé nou kò épi pou anmizé. Annan sa léson-an, nou ké wè kouman nou pouvé anmizé roun fason ki bon pou nou é ki ka fè Jéova plézi.
1. Kisa nou divèt sonjé lò nou ka chwazi roun anmizman ?
Kisa ou kontan fè pou détann ou kò ? I gen moun ki kontan rété annan yé kaz pou li roun liv, kouté lanmizik, gadé roun fim ouben alé asou Entèrnèt. Épi i gen ròt ki préféré soti pou alé maché, najé ouben jwé ké yé zanmi. Kèlkanswa sa nou kontan fè, nou divèt sir ki anmizman nou ké chwazi-a ké « fè Sényèr-a plézi » (Éphésiens 5:10). Sa enpòrtan réfléchi asou sa, paské annan bokou bagaj moun-yan kontan fè pou anmizé, i gen bagaj Jéova rayi, kou lavyolans, imoralité sèksyèl ké tchenbwa (li Psaume 11:5). Kisa ki pouvé idé nou byen chwazi nou anmizman ?
Si nou zanmi kontan Jéova, yé ké ankourajé nou é sa ké pi fasil pou nou chwazi anmizman ki bon. Kou nou wè annan léson 48-a, « moun-an ki ka maché ké moun ki saj ké gen sajès ». Parkont, si nou ka pasé tan ké moun ki pa kontan lalwa Jéova-ya nou « ké gen traka » (Proverbes 13:20).
2. Poukisa sa enpòrtan kontrolé kantité tan nou ka pran pou anmizé ?
A pa loutou di byen chwazi roun anmizman, mé kantité tan nou ké pasé annan l’ enpòrtan osi. Sinon, nou pa ké gen tan pou ròt aktivité-ya ki pi enpòrtan. Labib-a ka ankourajé nou « itilizé [nou] tan pi bon fason-an » (li Éphésiens 5:15, 16).
ANNOU FOUYÉ ANNAN LABIB-A
Annou wè kouman byen chwazi nou anmizman.
3. Rété lwen di anmizman ki pa bon
Poukisa nou divèt byen chwazi nou anmizman ? Gadé VIDÉYO-a, épi kozé asou sa késyon-yan :
Jòdla, i gen anmizman ki ka sanblé ké konba romen-yan té ka fè tan-lontan. Poukisa nou ka di sa ?
Kisa Danny anprann asou anmizman-yan ?
Li Romains 12:9, épi kozé asou sa késyon-an :
Kouman sa vèrsé-a pouvé idé ou chwazi ou anmizman ?
Ki bagaj Jéova rayi ? Li Proverbes 6:16, 17 ké Galates 5:19-21. Apré sa, kozé asou sa késyon-an :
Annan sa vèrsé-ya, i gen plizyèr bagaj nou ka trapé annan anmizman-yan jòdla. Kilès ?
Kouman byen chwazi roun anmizman ?
Doumandé ou kò :
Kisa ? Annan sa anmizman-an, ès i gen bagaj Jéova rayi ?
Kitan ? Ès sa anmizman-an ké anpéché mo fè bagaj ki pi enpòrtan ?
Kimoun ? Ès sa anmizman-an ké fè mo pasé bokou tan ké moun ki pa kontan Jéova ?
Pou protéjé ou kò, miyò ou rété lwen di roun danjé. Atò, nou divèt rété lwen di tout anmizman ki pa bon.
4. Byen itilizé ou tan
Gadé VIDÉYO-a, épi kozé asou sa késyon-an :
Menm si frè-a pa té ka gadé anyen ki pa bon, a té kisa so problèm ?
Li Philippiens 1:10, épi kozé asou sa késyon-an :
Kouman sa vèrsé-a pouvé idé ou désidé ki kantité tan ou ké anmizé ?
5. Chwazi anmizman ki bon
A vré, i gen anmizman ki pa ka fè Jéova plézi, mé i gen osi bokou bagaj nou pouvé fè pou anmizé nou kò. Li Ecclésiaste 8:15 ké Philippiens 4:8, épi kozé asou sa késyon-an :
Ki anmizman ki bon ou kontan ?
I gen bokou anmizman ki bon.
I GEN MOUN KA DI : « Si annan mo anmizman, i gen vyolans, imoralité sèksyèl ouben tchenbwa, i pa gen pyès problèm annan sa. Dipi a pa mo ki ka fè l’, a sa ki enpòrtan. »
Kisa ou ka pansé ?
SA NOU WÈ
Jéova lé nou anmizé ké bon bagaj.
Kisa ou anprann
Annan ki kalité anmizman roun krétyen pa ké partisipé ?
Poukisa nou divèt véyé kantité tan nou ka pran pou anmizé ?
Poukisa ou lé chwazi anmizman ki ka fè Jéova plézi ?
SA OU POUVÉ TRAPÉ OSI
Kimoun ki ka chwazi nou anmizman ?
« Ès Témwen Jéova-ya ka entèrdi sèrten fim, liv ouben chanté ? » (artik jw.org)
Gadé kouman ou pouvé pran bon désizyon lò ou ké chwazi kisa ou ké fè pou anmizé ou kò.
« Comment se détendre sainement ? » (La Tour de Garde, 15 oktòb 2011)
Li istwè roun mouché ki chanjé fason i té ka anmizé (istwè mo lavi : « J’ai même surmonté mes préjugés »).
« La Bible transforme des vies » (La Tour de Garde, 1é févriyé 2010)
Kouman roun manman pitit ka réyaji lò i ka wè roun fim ki gen tchenbwa annan l’ ?