Roun bèl lavi annan sèrvis pou Jéova

Roun lannen apré sa, yé di fanmi Bétèl-a ki yé té bézwen moun pou alé travay annan Bétèl Afrik di Sid koté yé té ké mété roun machin pou enprimé tou nòv. Mo di mo té lé alé. É mo té kontan toubonnman lò yé chwazi mo. Yé chwazi trwa ròt frè : Dennis Leech, Bill McLellan ké Ken Nordin. Yé byen di nou ki nou té ké rété an Afrik di Sid pannan roun bon ti moman...

Mo aplé mo manman é mo di li : « Manman, mo gen roun nouvèl pou bay to. Mo k’alé an Afrik di Sid ! » Mo manman té roun madanm ki té kalm, mé i té kontan Jéova é i té gen bokou lafwa. I pa di gran kichoz, mé mo té savé ki i té ka soutni mo. Ni mo manman ni mo papa, pa janmen di mo anyen asou mo désizyon menm si yé té tris paské mo té ka pati lwen.

MO K’ALÉ AN AFRIK DI SID

Annan Bétèl Brouklin, mo, Dennis, Bill ké Ken nou rousouvwè roun fòrmasyon pannan trwa mwa asou roun fason èspésyal pou enprimé. Apré sa, nou barké asou roun bato pou alé le Cap an Afrik di Sid. Mo té fin pran mo 20 an. Lò nou rivé le Cap, nou pran tren-an pou alé Joanèsbour ; soukou-a té ja tonbé. Lò jou louvri, tren-an arété annan roun ti vil, annan roun ti dézèr yé ka aplé Karoo. I té gen lapousyè, é i té ka fè cho. Nou kat gadé pa lafinèt é nou doumandé nou kò : a ki koté sa ? Koté nou té k’alé mété nou pyé ?! Plizyèr lannen apré, lò nou rouvin annan sa koté-a, nou wè kouman sa ti vil-ya té agréyab ké kalm.

Pannan plizyèr lannen, mo travay asou roun gro machin konpliké, yé ka aplé linotype. Mo té ka préparé ti lèt ki té ké sèrvi pou enprimé nou journal-ya. Bétèl-a té ka enprimé yé annan roun patché lang yé ka palé an Afrik, pou Afrik di Sid, mé osi pou patché ròt péyi an Afrik. Nou té kontan paské machin pou enprimé-a ki té fè nou soti dipi Kanada pou travay jis la té ka tounen san pran van !

Apré sa, mo travay annan biro enprimri-a ki té ka okipé di enprimé, voyé, ké tradwi piblikasyon-yan. Mo té gen bokou bagaj pou fè, mo lavi té bèl toubonnman.

MO KA MARYÉ É YÉ KA BAY MO ROUNÒT TRAVAY POU FÈ

An 1968, mo maryé ké Laura Bowen, ki té ka rété bò di Bétèl-a. I té pyonyé é i té ka travay osi annan Bétèl-a, annan sèrvis tradiksyon-an. A sa lépòk-a, bétélit ki té ka maryé pa té pouvé rété annan Bétèl-a. Alòr, nou divini pyonyé èspésyal. Mo té roun tibi enkyèt paské mo té fin fè dis lannen annan Bétèl-a, é pannan tousa tan-an yé té ka bay mo roun kaz ké manjé. Kouman nou té ké fè ké ti soumaké yé té ka bay pyonyé èspésyal-ya ? Chak mwa, nou chak té ké rousouvwè 25 rand (sa lé di apéprè 30 éro a sa lépòk-a), mé sèlman si nou té rivé préché kantité tan nou té divèt, rouwè kantité moun nou té divèt, épi bay kantité piblikasyon nou té divèt osi. Ké sa ti lajan-an nou té ké divèt péyé loyé kaz-a, péyé manjé, péyé pou lò nou té ké monté désann, péyé pou bagaj pou nou lasanté, é ròt bagaj ankò nou té ké bézwen.

Yé doumandé nou alé annan roun ti group bò di vil Durban, bò di oséyan Endyen-an. I té gen roun patché moun ki té soti Lend. Bokou annan yé té désandan di moun ki té vin travay pou fè sik bò d’ lannen 1875. Aprézan yé té ka fè ròt bagaj, mé yé té toujou gen yé kiltir, yé manjé, parèkzanp yé currys ki té bon toubonnman ! É yé té ka palé anglé, sa té pi fasil pou nou.

Pyonyé èspésyal-ya té divèt fè 150 lèr chak mwa annan prédikasyon-an. Donk mo ké Laura, nou désidé fè sis lèr prémyé jou-a. I té ka fè cho menm. Nou pa té gen pyès moun pou routounen wè, ni pyès léson biblik pou bay. Nou té divèt préché sis lèr yenki di kaz an kaz. Roun ti moman apré nou koumansé préché, mo gadé mo mont, 40 minit rounso té pasé. Mo doumandé mo kò kouman nou té ké rivé fè sa.

Nou pa pédi tan, nou fè roun program. Chak jou, nou té ka préparé sandwich, ké lasoup ouben kafé. Lò nou té lé pozé moso, nou té ka garé nou ti Volkswagen anba roun pyébwa. Détan, plizyèr bèl timoun endyen té ka rété la ka gadé nou, paské nou pa té ka sanblé yé. Déztrwa jou apré, nou konprann ki lò nou té fè déztrwa lèr pou koumansé, larèstan lajournen-an té ka pasé byen vit.

A pa ti kontan nou té kontan fè Endyen annan téritwar-a konnèt lavérité ki annan Labib-a ! Yé té gen bokou rèspè, yé té gen rékonésans, é yé té kontan Bondjé. Bokou endou té ka asèpté mésaj Labib-a nou té ka montré yé. Yé té kontan anprann bagaj asou Jéova, Jézi, Labib-a, monn-nouvo-a, ké èspwar pou moun mouri-ya. Apré roun lannen, nou té gen 20 léson biblik ! Chak jou, nou té ka manjé manjé di midi ké roun di sa fanmi-ya ki té ka étidyé Labib-a ké nou. Nou té kontan toubonnman !

Apré sa, yé doumandé nou fè rounòt bagaj : sèrvis sirkonskripsyon-an annan téritwar ki té ka lonjé bèl oséyan Endyen-an. Chak simenn, lò nou té k’alé wè roun asanblé pou préché ké ankourajé proklamatèr-ya, roun fanmi té ka rousouvwè nou annan so kaz. Yé té ka fè ké nou kousidiré nou té sa yé fanmi. Nou té ka pran plézi pasé tan ké yé, yé timoun, ké yé zannimo. Nou pasé dé bèl lannen konsa. Mé roun jou, roun frè filyal-a aplé mo é i di mo : « Nou té ké lé zòt rouvin Bétèl. » Mo réponn : « To savé, nou byen menm koté nou fika. » Mé nou té paré alé nenpòrt ki koté yé té ké voyé nou.

NOU KA ROUVIN BÉTÈL

Annan Bétèl-a, yé doumandé mo travay pou biro sèrvis-a, é mo té ka travay la ké plizyèr frè ki té gen bokou èspéryans. A sa lépòk-a, lò rèsponsab sirkonskripsyon-an té fin wè roun asanblé, i té ka voyé roun rapòr pou Bétèl-a. Apré sa, Bétèl-a té ka voyé roun lèt pou asanblé-a dapré sa rapòr rèsponsab-a té ka di. Lèt-ya té fèt pou ankourajé ké gidé asanblé-a. Sékrétèr-ya té ka travay rèd pou tradwi an anglé rapòr rèsponsab sirkonskripsyon-an ki té ékri an xhosa, zoulou ké ròt lang ankò. Apré sa, yé té ka tradwi lèt filyal-a ki té ékri an anglé, annan sa menm lang afriken-yan. Mo té gen rékonésans pou sa ki té ka travay rèd pou tradwi é ki idé nou osi konprann ki kalité problèm nou frè ké nou sò afriken nèg té ka gen.

A sa lépòk-a, gouvèrnman Afrik di Sid té mété roun lalwa pou séparé ras-ya. Chak ras té divèt rété annan yépa koté yé té bay yé, donk yé pa té ka mélanjé konsa. Nou frè afriken nèg té ka palé yé lang, té ka préché annan yé lang é yé té ka alé annan réinyon-yan annan yé lang.

Kou mo té toujou préché annan téritwar koté yé té ka palé anglé, mo pa té konnèt bokou frè ké sò nèg. Mé aprézan, mo té pouvé anprann plis bagaj asou yé, yé kiltir, ké yé tradisyon. Mo vin anprann osi ki problèm yé té ka jwenn : yé té divèt briga pou yé pa swiv tradisyon ké rélijyon moun di yé vilaj té ka swiv. Yé té divèt gen bokou kouraj pou yé lésé tout tradisyon ki pa k’alé ké sa Labib-a ka di, é pou arété swiv tousa ki mélé ké tchenbwa, menm si yé fanmi ké yé vilaj té ka mété présyon anlè yé. Moun bitasyon té maléré menm ; bokou annan yé pa té fè bokou lékòl, mé yé té ka rèspèkté Labib-a.

Mo bay lanmen osi pou défann nou libèrté di adoré ké nou drwa di pa mélé annan lapolitik. Mo lafwa vin pi fò lò mo wè kouman plizyèr timoun ki té Témwen Jéova té fidèl é té gen kouraj. Moun-yan té ka mété yé dèrò di yé lékòl paské yé té ka réfizé priyè ké chanté sa sa moun-yan té ka chanté pou yé rélijyon.

Frè-ya jwenn rounòt problèm annan ti péyi afriken yé té ka aplé a sa lépòk-a Swaziland. Lò rwa Sobhuza II mouri, yé doumandé tout moun fè sèrten bagaj pou poté dèy. Mouché-ya té divèt razé yé chivé nèt, é madanm-yan té divèt koupé yé chivé kourt. Yé pèrsékité bokou frè ké sò paské yé réfizé fè sa bagaj-ya, paské a té kousidiré yé té ka adoré zansèt-ya. Yé fidélité pou Jéova fè nou tchò kontan. Nou frè ké sò afriken anprann nou bokou bagaj asou zafè rété fidèl, gen pasyans, é sa fè nou lafwa vin pi fò.

MO KA ROUTOUNEN TRAVAY ANNAN ENPRIMRI-A

An 1981, yé doumandé mo idé annan travay yé té ka fè pou enprimé gras a òrdinatèr-ya. A konsa mo routounen annan enprimri-a. Sa té bèl toubonnman ! Fason yé té ka enprimé té ka chanjé nèt. Roun mouché ki té ka vandé machin pou enprimé (yé ka aplé sa machin-an photocomposeuse), bay filyal-a roun machin pou éséyé. Apré sa, nou tiré nèf linotypes pou mété senk photocomposeuses. Nou enstalé roun nouvo machin pou enprimé osi (yé ka aplé sa machin-an presse rotative offset). Nou té ka enprimé san gadé douvan ké dèyè !

Gras a òrdinatèr-ya, nou envanté roun sistèm yé ka aplé MEPS. Tèknoloji-a té vin lontan pi bon pasé lépòk nou toulékat bétélit kanadyen té rivé an Afrik di Sid ! (Is. 60:17). Nou kat, nou té maryé ké sò pyonyé ki té kontan Jéova bokou. Mo ké Bill, nou té ka travay Bétèl toujou ; Ken ké Dennis té fè timoun, é yé pa té ka rété lwen.

I té gen plizanplis travay pou fè annan Bétèl-a. Nou té ka tradwi ké enprimé piblikasyon-yan annan plizanplis lang, é nou té ka voyé sa piblikasyon-yan annan ròt filyal. A pou sa nou té bézwen roun Bétèl ki té pi gran. Frè-ya konstrwi roun Bétèl annan roun bèl ti koté annan vil Johannesburg é yé koumansé sèrvi l’ an 1987. A té roun plézi pou mo di wè kouman lavérité-a té ka byen vansé an Afrik di Sid, é osi di sèrvi annan Komité filyal-a pannan roun patché lannen.

YÉ KA VOYÉ NOU ROUNÒT KOTÉ

An 2001, mo té étoné lò yé envité mo pou sèrvi annan Komité filyal Étazini yé té fin fòrmé-a ! Menm si nou té tris di lésé nou travay ké nou zanmi an Afrik di Sid, nou té présé koumansé roun nouvo lavi ké fanmi Bétèl Étazini-a.

Mé nou té enkyèt : manman Laura té ka pran laj é nou pa té ké pouvé fè gran kichoz pou li dipi Nouyòrk. Mé trwa sò Laura-ya di ki yé té ké okipé di tousa yé manman té ké bézwen. Yé di : « Nou menm, nou pa pouvé fè sèrvis a plen tan-an, mé si nou ka pran swen di manman, zòt ké pouvé kontinyé sèrvi Jéova annan Bétèl-a ». Nou gen bokou rékonésans pou tousa yé fè.

Mo frè ké so madanm fè menm bagaj-a. Yé té ka rété Toronto, é yé pran swen di mo manman ki té vèv. Sa té ka fè pasé 20 lannen mo manman té ka rété ké yé. Yé pran swen di li jistan i mouri, roun ti moman apré nou rivé Nouyòrk. A roun bénédiksyon lò moun annan to fanmi paré pou chanjé yé lavi pou pran swen di yé manman ké yé papa ki ka pran laj, menm si détan sa pouvé rèd menm !

Pannan plizyèr lannen, mo travay Ozétazini annan sèrvis pou fè piblikasyon, é sa sèrvis-a divini pi modèrn é pi senp. Sa lannen ki pasé-ya, mo travay annan sèrvis ki té ka okipé di achté bagaj pou Bétèl-a. A té roun plézi pou mo travay pannan sa 20 lannen-yan annan sa gran Bétèl-a ansanm ké 5000 bétélit épi ké apéprè 2000 volontèr.

I gen 60 lannen di sa, mo pa té ké janmen pansé ki mo té ké fè roun patché bèl bagaj konsa. Pannan tout sa lannen-yan, Laura toujou idé mo ké tout so tchò. Nou lavi té bèl toubonnman ! Nou kontan lò nou ka sonjé tout koté nou alé, tout frè ké sò nou travay ké yé-a ké tout sa-ya nou jwenn annan Bétèl-ya asou tout latè-a. Aprézan, kou mo gen pasé 80 lannen, mo gen mwens travay pou fè, paské yé fòrmé frè ki pi jenn pou kontinyé travay-a.

Psaume 33:12 ka di : « Nasyon-an so Bondjé a Jéova, so tchò kontan ». Sa vré toubonnman ! Mo ka di Jéova mèrsi paské i pèrmèt mo travay ansanm ké so sèrvitèr-ya ki gen tchò kontan.