Ès to gen lafwa ?

Pou to fè Jéova plézi, to divèt gen lafwa. Mé Labib ka di ki « a pa tout moun ki gen lafwa » (2 Thess. 3:2). Lò apot Pòl ékri sa, i té ka palé di ‘moun-yan ki té mové é ki té méchan’ ki té ka pèrsékité l’. Mé a pa sa kalité moun-yan rounso ki pa gen lafwa. Parèkzanp, roun ran moun pa lé asèpté prèv ki ka montré ki i gen roun Bondjé ki kréyé tout bagaj (Rom. 1:20). Rounòt ran ka di ki yé ka krè annan roun bagaj ouben roun moun ki pwisan. Mé sa kalité lafwa-a pa asé pou fè Jéova plézi.

A pou nou sir ki Jéova ka èkzisté é ki i sa « sa-la ki ka rékonpansé » moun ki gen roun lafwa ki fò (Héb. 11:6). Pou nou gen sa kalité lafwa-a, nou bézwen lèspri sen Bondjé. É pou nou gen sa lèspri sen-an, a pou nou priyè Jéova pou i bay nou l’ (Luc 11:9, 10, 13). A pou nou li so Paròl osi, pas a grasa lèspri sen yé ékri l’. Apré sa, a pou nou byen réfléchi asou sa nou ka li épi éséyé apliké sa nou anprann. Si nou ka fè sa, nou ké lésé lèspri Jéova idé nou annan nou lavi épi gen roun lafwa ki ka fè nou Bondjé plézi.