ARTIK POU ÉTIDYÉ 26
KANTIK 123 Fidèlement soumis à l’ordre théocratique
A pou nou asèpté ki i gen bagaj nou pa savé
« Nou pa pouvé rivé konprann Tou-Pwisan-an » (JOB 37:23).
SA NOU KÉ ANPRANN
I gen bagaj nou pa savé. Nou divèt asèpté sa, mété nou lidé asou sa nou savé épi fè Jéova konfyans.
1. Kouman Jéova fè nou, é poukisa ?
JÉOVA fè nou roun fason ki bèl toubonnman. Nou pouvé réfléchi, anprann bokou bagaj épi konprann kouman nou pouvé apliké sa nou anprann. Poukisa i fè nou konsa ? Paské i lé nou anprann konnèt li é i lé nou sèrvi nou entélijans pou nou adoré l’ (Prov. 2:1-5 ; Rom. 12:1).
2. Kisa nou divèt asèpté, é poukisa sa enpòrtan ? (Job 37:23, 24 ; gadé zimaj-a osi).
2 Menmsi nou pouvé anprann roun patché bagaj, i toujou ka rété roun patché bagaj nou pa konnèt (li Job 37:23, 24). Annou wè sa ki rivé Jòb. Jéova pozé l’ roun patché késyon pou idé l’ wè ki i té gen roun patché bagaj i pa té konnèt. Sa kozé-a idé l’ konprann ki i té bézwen fè so kò toupiti, épi chanjé fason i té ka réfléchi (Job 42:3-6). Menm fason-an, si nou ka rékonnèt nou limit, si nou ka asèpté ki nou pa konnèt tout bagaj, nou ké sir ki Jéova ka fè nou savé sa nou bézwen savé pou nou pran bon désizyon (Prov. 2:6).
Si nou ka asèpté ki i gen bagaj nou pa savé, sa ké roun bon bagaj pou nou, kou sa té roun bon bagaj pou Jòb (gadé paragraf 2).
3. Kisa nou ké wè annan sa artik-a ?
3 Annan sa artik-a, nou ké palé di plizyèr bagaj nou pa konnèt. Nou ké wè poukisa lò nou pa konnèt sa bagaj-ya sa pouvé rèd. É nou ké wè osi poukisa i miyò konsa. Nou ké vin pi sir ki Jéova, « Sa-la ki konnèt tout bagaj », ka di nou tousa nou bézwen konnèt (Job 37:16).
NOU PA SAVÉ KITAN LAFEN SA MONN-AN KÉ RIVÉ
4. Dapré Matthieu 24:36, ki bagaj nou pa konnèt ?
4 (Li Matthieu 24:36.) Nou pa savé kitan lafen sa monn-an ké rivé. Menm Jézi pa té konnèt « sa jou-a ké sa lèr-a » lò i té asou latèa. Pita, i èspliké so apot ki a Jéova ki gen drwa désidé kitan sèrten bagaj ké rivé (Actes 1:6, 7). Jéova désidé ki jou sa monn-an ké fini. Mé nou pa pouvé savé kitan èkzaktéman sa ké rivé.
5. Kou nou pa savé kitan lafen ké rivé, kisa sa pouvé fè nou ?
5 Dapré sa Jézi di, nou pa savé konmyen tan nou ké gen pou antann anvan lafen sa monn-an rivé. Sa pouvé rèd pou nou pran pasyans ouben sa pouvé dékourajé nou, èspésyalman si nou ka antann lafen dipi lontan. É si nou fanmi ouben ròt moun ka ari di nou tèt akoz di sa, sa pouvé rèd osi (2 Pierre 3:3, 4). Pitèt nou ka pansé ki si nou té savé kitan lafen-an té ka rivé, sa té ké pi fasil pou tchenbé.
6. Nou pa savé kitan lafen-an ké rivé. Poukisa a roun bon bagaj ?
6 Kou Jéova pa di nou kitan lafen-an ké rivé, nou pouvé montré l’ ki nou ka adoré l’ pas nou kontan l’ é ki nou ka fè li konfyans. É nou lé adoré Jéova pou tout-tan, nou pa lé adoré l’ sèlman jiktan lafen-an rivé. Pasé nou mété nou lidé asou kitan « jou Jéova-a » ké rivé, nou ka réfléchi asou sa sa jou-a ké mennen. Sa ka idé nou vin pi pròch di Jéova épi fè tousa nou pouvé pou fè l’ plézi (2 Pierre 3:11, 12).
7. Kisa nou savé ?
7 Annou mété nou lidé asou sa nou savé. Parèkzanp, nou savé ki dèrnyé jou-ya koumansé an 1914. Dapré plizyèr profési Jéova fè moun ékri annan so Paròl, sa lannen-an té ké èspésyal. Sa profési-ya ka byen èspliké kouman monn-an té ké fika dipi sa lannen-an. Kou nou ka wè sa profési-ya fèt douvan nou wéy, nou sir ki « gran jou Jéova-a pròch » (Soph. 1:14). Nou savé sa Jéova lé nou fè osi : i lé nou palé pou tout moun di « bon nouvèl Rwayonm-an » (Mat. 24:14). Nou ka préché sa mésaj-a annan apéprè 240 péyi ké téritwar é annan pasé 1 000 lang. Nou pa bézwen konnèt « sa jou-a ké sa lèr-a » pou nou préché ké balan.
NOU PA SAVÉ SA JÉOVA KÉ FÈ POU NOU
8. Lò Labib ka di « sa vré Bondjé-a [...] ka fè », kisa sa lé di ? (Ecclésiaste 11:5).
8 A pa tout-tan nou ka konprann « sa vré Bondjé-a [...] ka fè » (li Ecclésiaste 11:5). Lò Labib ka di sa, a pou palé di sa Jéova ka fè pou so volonté fèt ouben sa i ka pèrmèt pou so volonté fèt. Nou pa pouvé savé èkzaktéman poukisa Jéova ka lésé roun bagaj rivé ni kouman i ké idé nou (Ps. 37:5). Nou pa pouvé konprann « sa vré Bondjé-a [...] ka fè », menm fason nou pa pouvé konprann kouman roun ti bébé ka grandi annan vant so manman. Jik jòdla, syantifik-ya pa ka rivé byen konprann kouman sa bagaj-a ka fèt.
9. Kou nou pa savé kisa Jéova pouvé fè pou idé nou, kisa sa pouvé fè nou ?
9 Kou nou pa savé kisa Jéova ké fè pou idé nou, sa pouvé fè nou réfléchi tròp anvan nou pran sèrten désizyon. Parèkzanp, sa pouvé fè nou pè fè sakrifis pou préché plis, tiré bagaj annan nou lavi ouben alé préché roun koté yé bézwen plis moun pou préché. Ouben, pitèt nou pouvé douté ki Jéova kontan nou. Parèkzanp, sa pouvé rivé si nou pa ka rivé fè sa nou té prévwè fè pou li. Ouben, nou ka travay rèd pou roun projè òrganizasyon-an bay nou, mé nou ka trapé roun patché problèm. Ouben pitèt nou ka préché ké balan, mé nou pa ka trapé moun ki lé étidyé Labib ké nou.
10. Kou Jéova pa ka di nou sa i ké fè pou idé nou, ki bèl kalité i ka idé nou gen ?
10 Kou nou pa savé kisa Jéova ké fè pou idé nou, sa ka idé nou fè nou kò toupiti. Sa bèl kalité-a enpòrtan toubonnman. Sa ka idé nou konprann osi ki Jéova toujou savé sa ki miyò (Is. 55:8, 9). É sa ka anprann nou fè li konfyans ankò plis. Lò nou ka rivé palé pou moun-yan an prédikasyon ouben lò nou ka rivé fini roun projé pou so òrganizasyon, annou toujou di ki a grasa li rounso nou rivé fè sa (Ps. 127:1 ; 1 Cor. 3:7). É si bagaj-ya pa ka fèt kou nou té ké lé, annou sonjé ki Jéova byen savé sa i ka fè (Is. 26:12). Annou fè noupa, é a pou nou toujou sir ki i ké fè sopa. Nou pouvé sir ki i ké gidé nou menmsi i pa ka fè mirak kou i fè l’ tan-lontan (Actes 16:6-10).
11. Ki bagaj enpòrtan nou savé ?
11 Annou réfléchi asou sa nou savé : nou savé ki tousa Jéova ka fè, i ka fè l’ ké lanmou, jistis ké sajés. Sa nou ka fè pou li ouben pou nou konpanyen, gen bokou valò pou li. É i ka rékonpansé sa-ya ki ka rété fidèl ké li (Héb. 11:6).
NOU PA SAVÉ SA DIMEN KÉ POTÉ
12. Dapré Jacques 4:13, 14, kisa nou pa savé ?
12 (Li Jacques 4:13, 14.) Nou pa savé kouman nou lavi ké fika dimen. Annan sa monn-an, ‘tan difisil ké bagaj nou pa prévwè’ pouvé sirprann nou (Eccl. 9:11). A pou sa nou pa pouvé savé si nou ké rivé fè sa nou prévwè ouben si nou ké la pou nou fè sa.
13. Kou nou pa savé sa ki pouvé rivé, kisa sa pouvé fè nou ?
13 Lò to pa savé sa ki ké rivé, sa pouvé rèd pou sipòrté. Nou pouvé pè épi pédi nou lajwa. Malò ouben bagaj nou pa té ka antann pouvé tonbé asou nou épi sa pouvé fè nou lapenn é chanboulé nou lèspri. É lò nou pa ka rivé trapé sa nou ka antann nou pouvé dékourajé (Prov. 13:12).
14. Kisa ka vréman fè nou tchò kontan ? (gadé zimaj-ya osi).
14 Lò nou ka tchenbé kèlkéswa problèm nou ka jwenn, nou ka montré ki nou ka adoré nou Papa ki annan syèl-a pas nou kontan l’. Nou pa ka fè l’ pou rousouvwè roun bagaj. Plizyèr istwè anan Labib ka fè nou konprann ki nou pa divèt krè ki Jéova ké protéjé nou di tout bagaj, é ki i pa ka désidé sa ki ké rivé nou. I savé ki sa ki ka fè nou tchò kontan, a pa lò nou savé sa ki ké rivé nou dimen. A pito lò nou ka kontinyé doumandé l’ gidé nou é lò nou ka obéyi l’ (Jér. 10:23). Lò nou ka chaché savé kouman i ka wè bagaj-ya anvan nou pran roun désizyon, a kousidiré nou té ka di : « Si Jéova lé, nou ké viv é nou ké fè tèl bagaj ouben tèl bagaj » (Jacq. 4:15).
Si nou ka kontinyé doumandé Jéova gidé nou é si nou ka obéyi l’, sa ké protéjé noub (gadé paragraf 14-15).
15. Kisa nou savé asou sa ki ké rivé nou dimen ?
15 Nou pa janmen savé sa dimen ké poté. Mé, nou savé ki Jéova promèt nou lavi pou tout-tan, ki annan syèl-a, ki asou latè-a. Nou savé osi ki i pa pouvé manti é ki anyen pa pouvé anpéché l’ fè sa i promèt (Tite 1:2). A li rounso ki pouvé « di sa ki ké rivé a lafen » é a li rounso ki pouvé « di bagaj-ya ki pòkò fèt » lontan anvan sa fèt. A sa ki fèt tan-lontan é a sa ki ké fèt titalò (Is. 46:10). Anplis di sa, nou byen savé ki anyen pa pouvé anpéché Jéova kontan nou (Rom. 8:35-39). I ké bay nou sajès, i ké konsolé nou, é i ké bay nou fòrs nou bézwen pou tchenbé kèlkéswa sa ka rivé nou. Nou pouvé sir ki i ké idé nou é i ké béni nou (Jér. 17:7, 8).
NOU PA POUVÉ KONPRANN KI KANTITÉ BAGAJ JÉOVA KONNÈT ASOU NOU
16. Dapré Psaume 139:1-6 ki kalité bagaj Jéova konnèt ki pi fò pasé sa nou pouvé konprann ?
16 (Li Psaume 139:1-6.) Sa-la ki fè nou konnèt tout ti détay asou nou. I savé sa nou ka pansé é poukisa nou ka pansé sa. I savé sa nou ka rousanti osi é poukisa nou ka rousanti sa. I savé sa ki ofon nou tchò lò nou ka di roun bagaj. É i savé sa nou ka fè é poukisa nou ka fè l’. Kou rwa David èspliké l’, i ka pran swen di nou é i pa gen anyen ki pouvé anpéché l’ kontan nou. Souvéren Sényèr inivèr-a, Sa-la ki tou-pwisan é ki fè tout bagaj ka gadé pou nou. Ès a pa roun bèl bagaj ? Asiré, nou ka rousanti menm bagaj ki David ki di : « To konnèt tèlman bagaj asou mo, sa tròp pou mo konprann. Sa tro fò pou mo pouvé konprann » (Ps. 139:6, nòt).
17. Poukisa sa pouvé rèd di krè ki Jéova konnèt nou byen ?
17 Akoz di fason nou lévé, nou kiltir ouben sa nou té ka krè anvan, pitèt sa rèd pou nou wè Jéova kou roun Papa ki kontan nou é ki ka gadé pou nou. Ouben, akoz di mové bagaj nou fè anvan, nou pouvé pansé ki tèlman nou mové, Jéova pa ké janmen chaché konnèt nou é ki i lwen di nou. Détan, menm David té ka krè sa (Ps. 38:18, 21). Ouben roun moun ki ka fè éfòr pou chanjé fason i ka viv é pou rèspèkté lalwa Jéova, pouvé di so kò : « Si Bondjé konnèt mo, poukisa i lé mo chanjé pasé i pran mo kou mo fika ? »
18. Poukisa sa enpòrtan di asèpté ki Jéova konnèt nou pi byen pasé nou menm ? (gadé zimaj-ya osi).
18 Nou pouvé rivé asèpté ki Jéova konnèt nou pi byen pasé nou menm é ki i pouvé wè bèl bagaj koté nou menmsi nou menm nou pa ka wè yé. I ka wè sa nou ka fè ki pa bon, mé i savé ki kalité moun nou lé sa, é i kontan nou (Rom. 7:15). Lò nou ka konprann ki i ka wè ki kalité moun nou pouvé divini, sa pouvé bay nou fòrs nou bézwen pou adoré l’ ké lajwa.
Jéova ka bay nou sa nou bézwen pou nou gen plis lafwa annan bèl lavi i promèt nou-a. Konsa, i ka idé nou tchenbé lò problèm ka tonbé asou nouc (gadé paragraf 18-19).
19. Kisa nou savé asou Jéova ?
19 Nou savé ki Jéova sa lanmou ; nou pa gen pyès dout asou sa (1 Jean 4:8). Nou savé ki so Lalwa ki jis ka montré kouman i kontan nou é ki i toujou lé sa ki pi bon pou nou. Nou savé ki i lé nou viv pou tout-tan, a pou sa i bay ranson-an pou nou pouvé viv pou tout-tan. É sa kado-a ka fè nou sir ki nou pouvé fè l’ plézi menmsi nou pa parfè (Rom. 7:24, 25). Pou fini, nou savé ki i « gran pasé nou tchò » é ki i « konnèt tout bagaj » (1 Jean 3:19, 20). I konnèt tout bagaj asou nou é i sir ki nou pouvé fè so volonté.
20. Kisa ki ké idé nou pa troumanté nou kò ?
20 Jéova ka di nou tousa nou bézwen savé. Si nou ka asèpté sa, nou pa ké troumanté nou kò pou sa nou pa savé, é nou ké mété nou lidé asou sa ki vréman enpòrtan. Konsa, nou ké montré ki nou ka fè Jéova konfyans. I sa :« Sa-la ki konnèt tout bagaj » (Job 36:4). A vré, jòdla, a pa tout bagaj nou ka konprann, mé kou nou ké viv pou tout-tan, nou ké gen tan pou lésé Bondjé anprann nou bokou bagaj, é nou ké pouvé anprann plis bagaj asou li (Eccl. 3:11).
KANTIK 104 Papa, bay mo to lèspri sen
a Kou a Jézi ki ké fè lagèr kont monn Satan-an ki mové, nou pouvé pansé ki aprézan i savé ki jou Armagédon ké fèt é kitan i ké divèt « fini ganyen asou so lèlmi » (Rév. 6:2 ; 19:11-16).
b MEN SA NOU KA WÈ ASOU ZIMAJ-YA : Roun papa ké so tibolonm ka préparé roun sac de survie pou fanmi-a paré pou pati si i gen roun problèm ki grav.
c MEN SA NOU KA WÈ ASOU ZIMAJ-YA : Roun frè ki annan traka ka réfléchi asou bèl lavi i ké gen annan monn-nouvo-a.