Idé sa-ya ki ka étidyé Labib ké to désidé adoré Jéova

1-2. a) Poukisa roun ran étidyan pè désidé divini Témwen Jéova ? b) Kisa nou ké wè annan sa artik-a ?

ÈS TO rété lontan ka réfléchi anvan to désidé divini Témwen Jéova ? Ès to té pè to kolèg, to zanmi ouben to fanmi faché ké to si to té ka divini Témwen Jéova ? Ouben, ès to té ka pansé ki to pa té ké rivé obéyi lalwa Bondjé ? Si a sa, to ka konprann ki pou roun ran étidyan sa pa fasil pou yé désidé adoré Jéova.

² Jézi té savé ki sa kalité bagaj-ya té pouvé anpéché roun moun désidé adoré Jéova (Mat. 13:20-22). Mé magré sa, i kontinyé idé sa-ya ki té pè swiv li. I idé yé 1) konprann sa ki té ka anpéché yé fè progrè, 2) fè yé lanmou pou Jéova vin pi fò, 3) mété Jéova an prémyé annan yé lavi é 4) wè sa yé té pouvé fè lò ròt moun té ka éséyé baré yé chimen. Annan sa artik-a, nou ké wè kouman nou pouvé swiv èkzanp Jézi lò nou ka sèrvi liv Viv ké tchò kontan pou tout-tan ! pou étidyé ké moun-yan é kouman nou pouvé idé yé désidé adoré Jéova.

IDÉ MOUN-AN KI KA ÉTIDYÉ LABIB KÉ TO KONPRANN SA KI KA ANPÉCHÉ L’ FÈ PROGRÈ

3. Kisa ki té ka anpéché Nikodèm divini disip Jézi ?

³ Nikodèm té sa roun grotchap jwif ki té lé divini disip Jézi, mé i té gen roun bagaj ki té ka anpéché l’ fè sa. Sa té ka fè apéprè sis mwa sèlman Jézi té ka préché é Nikodèm té ja konprann ki i té sa Mési-a (Jean 3:1, 2). Mé kou i té « pè Jwif-ya », i té k’alé wè Jézi lannwit sèlman (Jean 7:13 ; 12:42). Pitèt i té ka pansé ki i té ké pédi bokou bagaj si i té ka divini so disipa.

4. Kouman Jézi idé Nikodèm konprann sa Jéova té lé i fè ?

⁴ Nikodèm té konnèt Lalwa, mé i té bézwen roun moun idé li konprann sa Jéova té lé i fè. Kouman Jézi idé l’ ? I bay so tan san konté ; i jis palé ké Nikodèm lannwit. É i byen di li sa i té divèt fè pou i té divini so disip : i té divèt répanti, batizé annan dilo épi montré i té gen lafwa annan li (Jean 3:5, 14-21).

5. Kouman nou pouvé idé nou étidyan wè sa ki ka anpéché l’ fè progrè ?

⁵ Menmsi roun étidyan byen konnèt sa Labib ka di, i pouvé bézwen nou idé l’ wè sa ki ka anpéché l’ fè progrè. Pitèt a so travay ki ka pran tout so tan ouben so fanmi pa lé i divini Témwen Jéova. Alòr pran tan idé li. Parèkzanp, to pouvé envité l’ bwè roun sòrbé ké to ouben pronmennen. Konsa to ké pouvé palé ké li. Pitèt i ké di to plis bagaj asou so lavi é to ké pouvé savé ki problèm i gen. Ankourajé l’ chanjé sa i divèt chanjé. É fè li sonjé ki a pa pou to i ka fè l’, i ka fè l’ pou fè Jéova plézi.

6. Kouman to pouvé idé to étidyan pran kouraj épi adoré Bondjé ? (1 Corinthiens 16:13).

⁶ Si roun étidyan sir ki Jéova ké idé l’ obéyi so lalwa, i ké gen kouraj pou i fè sa i ka anprann (li 1 Corinthiens 16:13). A to ki gen pou idé l’. A kou roun mèt lékòl. Sonjé lò to té k’alé lékòl. Ki kalité métrès ouben mèt to té pi kontan ? Pitèt to ka sonjé roun métrès ouben roun mèt ki pran tan idé to konprann ki to té pouvé rivé. Roun moun ki ka byen ansényé Labib ka fè menm bagaj-a. I pa ka montré moun-an sa Jéova lé i fè rounso. I ka fè li konprann osi ki grasa Bondjé, i ké rivé chanjé tousa i bézwen chanjé. Kouman to pouvé fè sa ?

IDÉ TO ÉTIDYAN FÈ SO LANMOU POU JÉOVA VIN PI FÒ

7. Kouman Jézi idé sa-ya ki té ka kouté l’ gen plis lanmou pou Jéova ?

⁷ Jézi té savé ki lò roun moun kontan Bondjé, i lé fè sa i ka anprann. A pou sa, a pa dé fwa i anprann so disip bagaj pou fè yé lanmou pou yé Papa ki annan syèl-a vin pi fò. Parèkzanp, i di ki Jéova kou roun papa ki ka bay so pitit bon bagaj (Mat. 7:9-11). Sèrten moun ki té ka kouté li pa té konnèt a kisa ki roun papa ki kontan yé. Imajiné kouman sa divèt touché yé lò Jézi pran èkzanp roun papa ki té plen ké lanmou é ki byen rousouvwè so pitit ki té fè roun patché mové bagaj. Jézi idé moun-yan wè ki Jéova kontan yé bokou é ki i lé idé yé (Luc 15:20-24).

8. Kouman to pouvé idé to étidyan gen plis lanmou pou Jéova ?

⁸ To menm osi, to pouvé idé to étidyan gen plis lanmou pou Jéova si to ka fè li wè bèl kalité i gen. Chak fwa to ka étidyé ké li, idé li konprann kouman sa i ka anprann ka montré ki Jéova kontan nou. Parèkzanp, lò to ka palé ké étidyan-an di ranson-an, fè li konprann ki Jéova bay so Pitit pa sèlman pas i kontan tout moun, mé i fè l’ pas i kontan li (Rom. 5:8 ; 1 Jean 4:10). Lò roun étidyan ka konprann kouman Jéova kontan li sa pouvé idé l’ kontan l’ ankò plis (Gal. 2:20).

9. Kisa ki idé Michael chanjé fason i té ka viv ?

⁹ Annou palé di Michael, ki ka rété an Endonézi. I lévé annan lavérité, mé i pa batizé. Lò i té gen 18 lannen, i pati travay annan rounòt péyi. I té ka roulé kamyon. Pita, i routounen Endonézi pou i maryé. Mé i kontinyé travay lwen di so fanmi annan rounòt péyi. So madanm ké so tifi koumansé étidyé Labib é yé fè progrè. Lò so manman mouri, i désidé routounen viv Endonézi pou pran swen di so papa é i asèpté étidyé Labib li menm osi. Sa i wè annan léson 27 di liv Viv ké tchò kontan pou tout-tan ! annan parti « Annou fouyé annan Labib-a » touché l’ bokou. Dlo jis monté an so wéy lo i konprann kouman Jéova dèt soufri lò i wè so Pitit soufri. I té gen bokou rékonésans pou ranson-an é sa fè li chanjé fason i té ka viv épi batizé.

IDÉ TO ÉTIDYAN MÉTÉ JÉOVA AN PRÉMYÉ ANNAN SO LAVI

10. Kisa Jézi fè pou idé so disip chanjé sa yé té divèt chanjé pou yé té pouvé fè plis pou Jéova ? (Luc 5:5-11 ; gadé zimaj-a osi).

¹⁰ Prémyé disip Jézi wè lanmenm ki i té sa Mési Bondjé té promèt-a. Mé yé té bézwen konprann ki si yé té lé adoré Bondjé, yé té divèt préché bon nouvèl-a ké balan. Pyèr ké André té ja so disip dipi roun ti moman lò i doumandé yé swiv li toulong (Mat. 4:18, 19). Yé té ka travay annan roun antrépriz lapèch ki té ka maché byen é yé té asosyé ké Jak ké Jan (Marc 1:16-20). Lò yé « lésé yé filé » pou yé swiv Jézi, yé dèt fè sa ki té fo pou yé té pouvé kontinyé bay yé fanmi sa yé té bézwen pou viv toupannan yé té ka swiv Jézi. Kisa ki idé yé mété prédikasyon-an anvan zafè ganyen plis soumaké ? Nou ka li annan lévanjil Lik ékri ki Jézi fè roun mirak ki fè yé vin pi sir ki Jéova té pouvé bay yé sa yé té ké bézwen (li Luc 5:5-11).

11. Kouman sa nou viv pouvé fè lafwa nou étidyan vin pi fò ?

¹¹ Nou pa pouvé fè mirak kou Jézi fè l’, mé nou pouvé palé di sa ki rivé nou ouben ròt frè ké sò pou montré nou étidyan ki Jéova ka soutni sa-ya ki ka mété li an prémyé annan yé lavi. Parèkzanp, kouman Jéova idé to lò to koumansé alé annan réinyon-yan ? Ès to té gen pou alé wè to patron pou di li ki to pa té pouvé rété pi lontan ka travay pas to té gen pou pran to réinyon ? Lò to ka rakonté to étidyan sa to viv, èspliké li ki to lafwa vin pi fò lò to wè kouman Jéova béni to pas to mété li an prémyé annan to lavi.

12. a) Poukisa nou divèt envité plizyèr frè ké sò diféran vini annan léson biblik-a ? b) Kisa to pouvé sèrvi pou idé to étidyan mété Jéova an prémyé ? Bay roun èkzanp.

¹² A ké roun bon bagaj osi si ròt frè ké sò ka di to étidyan sa yé chanjé annan yé lavi pou mété Jéova an prémyé. Donk, doumandé plizyèr frè ké sò ki viv diféran bagaj vini annan léson biblik-a. Doumandé yé rakonté kouman yé vin konnèt lavérité-a é sa yé té divèt fè pou mété Jéova an prémyé annan yé lavi. Épi pran tan gadé ké to étidyan vidéyo annan parti « Annou fouyé annan Labib-a » ké parti « Sa ou pouvé trapé osi » annan liv Viv ké tchò kontan pou tout-tan ! Parèkzanp, lò zòt ka étidyé léson 37-a, gadé vidéyo Jéova ké toujou bay nou sa nou bézwen, épi palé ké li di sa ki pouvé idé l’ mété Jéova an prémyé annan so lavi.

MONTRÉ TO ÉTIDYAN SA I POUVÉ FÈ LÒ RÒT MOUN KA ÉSÉYÉ BARÉ SO CHIMEN

13. Kouman Jézi idé so disip préparé yé kò pou lò moun-yan té ké éséyé baré yé chimen ?

¹³ Jézi di so disip plizyèr fwa ki moun té ké éséyé baré yé chimen é ki menm yé fanmi té ké fè sa (Mat. 5:11 ; 10:22, 36). É roun tibi tan anvan Jézi mouri, i di so disip ki yé té ké pitèt tchwé yé pas yé té ka adoré Jéova (Mat. 24:9 ; Jean 15:20 ; 16:2). A pou sa i di yé ki yé té divèt panga lò yé té ka préché. I di yé osi pa briga ké sa-ya ki pa té ké dakò ké yé épi véyé sa yé té ka di ké sa yé té ka fè pou yé té pouvé kontinyé préché.

14. Kouman nou pouvé idé nou étidyan préparé so kò pou lò ròt moun ké éséyé baré so chimen ? (2 Timothée 3:12).

¹⁴ Nou pouvé èspliké nou étidyan sa so zanmi, so fanmi ouben so kolèg ké pitèt fè ouben ké pitèt di paské i ka étidyé Labib (li 2 Timothée 3:12). Pitèt déztrwa annan so kolèg ké ari di so tèt pas i chanjé fason i ka viv. É ròt moun, pitèt menm moun so fanmi, ké kritiké sa i ka krè. Pi nou ké préparé nou étidyan bònò pi sa ké fasil pou i tchenbé lò sa kalité bagaj-ya ké rivé li.

15. Kisa ki ké idé nou étidyan byen réyaji si so fanmi ka baré so chimen ?

¹⁵ Si moun annan fanmi to étidyan ka baré so chimen, idé l’ doumandé so kò poukisa yé pa kontan wè l’ étidyé Labib ké Témwen Jéova-ya. Ès yé ka pansé ki yé pran so tèt ? Ès yé ka pansé ki Témwen Jéova-ya ka manti ouben ki yé pa bon ? Menm moun annan fanmi Jézi di ki i té vin fou (Marc 3:21 ; Jean 7:5). Ankourajé to étidyan pran pasyans épi palé jantiman ké so fanmi é ké ròt-ya osi.

16. Kouman nou pouvé idé nou étidyan pou i janti ké rézonab lò i ka palé di sa i ka krè ?

¹⁶ Menmsi moun annan so fanmi lé konnèt plis bagaj asou lavérité-a, miyò étidyan-an pa éséyé montré yé tout bagaj rounsèl kou. Si i ka fè sa, i ka riské néyé yé anba enfòrmasyon é pitèt yé pa ké lé palé di lavérité ké li ankò. Donk, ankourajé to étidyan rété senp lò i ka palé di sa i ka krè, konsa moun-yan ké pitèt anvi kouté l’ rounòt jou (Col. 4:6). Parèkzanp, i pouvé ankourajé moun so fanmi alé asou nou sit jw.org. Konsa, lò yé ké paré, yé ké pouvé chwazi ki kantité bagaj yé lé anprann asou Témwen Jéova-ya.

17. Kouman to pouvé idé to étidyan réponn késyon moun ka pozé asou Témwen Jéova-ya ? (gadé zimaj-a osi).

¹⁷ Sèrvi parti « Késyon moun-yan ka pozé asou Témwen Jéova-ya » asou jw.org pou idé to étidyan savé sa i ké di lò moun so fanmi ouben so kolèg ké pozé li késyon (2 Tim. 2:24, 25). Chak fwa zòt fini roun léson annan liv Viv ké tchò kontan pou tout-tan !, gadé parti « I gen moun ka di » ouben « Si roun moun doumandé ou ». Ankourajé li antréné so kò pou i réponn sa késyon-yan di sopa fason. Pa pè bay li konsèy pou i èspliké bagaj-ya pi byen. Si to ka pran tan idé to étidyan antréné so kò, i ké pi alèz pou èspliké ròt-ya poukisa i ka krè ouben i pa ka krè roun bagaj.

18. Kouman to pouvé ankourajé to étidyan divini proklamatèr ? (Matthieu 10:27).

¹⁸ Jézi di so disip préché bon nouvèl-a pou tout moun (li Matthieu 10:27). Pi roun étidyan ké palé di so lafwa, pi i ké anprann fè Jéova konfyans. Kouman to pouvé idé to étidyan pou i anvi préché ké asanblé-a ? Lò yé ka di asanblé-a ki i ké gen roun kanpagn prédikasyon, ankourajé étidyan-an réfléchi asou sa i divèt fè pou i divini proklamatèr. Èspliké l’ poukisa sa pi fasil di koumansé préché pannan roun kanpagn prédikasyon. Rounòt bagaj ki ké idé l’, a fè sijé pannan réinyon-yan ki ka fèt pannan simenn-an. Donk, ankourajé l’ fè sa ki fo pou i pouvé partisipé annan sa parti-a pannan réinyon-an. Konsa, i ké anprann palé douvan tout moun épi èspliké pi byen sa i ka krè.

MONTRÉ TO ÉTIDYAN KI TO SIR KI I LÉ FÈ JÉOVA PLÉZI

19. Kouman Jézi montré so disip ki i té ka fè yé konfyans, é kouman nou pouvé fè kou li ?

¹⁹ Anvan Jézi mouri é anvan i monté laro syèl, i di so disip ki roun jou yé té ké tout ansanm ankò. Disip-ya pa konprann ki i té ka di yé ki yé té ké alé annan syèl-a. Menmsi disip-ya pa té ka konprann tout bagaj, Jézi té sir ki yé té lé fè Jéova plézi (Jean 14: 1-5, 8). I té savé ki yé té bézwen tan pou konprann sèrten bagaj kou èspwar viv annan syèl-a parèkzanp (Jean 16:12). Kou Jézi, nou pouvé montré nou étidyan ki nou sir ki i lé fè Jéova plézi.

20. Kouman roun sò ki ka rété Malawi montré ki i té sir ki so étidyan té lé fè Jéova plézi ?

²⁰ A pou nou toujou sir ki nou étidyan lé fè sa ki byen. Annou palé di Chifundo, roun sò ki ka rété Malawi. I koumansé étidyé ké roun madanm katolik yé ka aplé Alinafe asou liv Viv ké tchò kontan pou tout-tan ! Lò yé fini wè léson 14-a, i doumandé madanm-an sa i té ka pansé di zafè sèrvi zimaj pou adoré Bondjé. Alinafe té kontraryé. I réponn : « Pou sa zafè-a, a chak moun ka wè ! » Atò Chifundo pansé ki madanm-an té ké arété étidyé. Mé i pran pasyans, i kontinyé étidyé ké Alinafe, i té sir ki piti piti i té ké konprann kouman Jéova ka wè bagaj-ya. Plizyèr mwa pita, i pozé li késyon ki annan léson 34-a : « Dipi ou koumansé étidyé Labib-a é anprann konnèt vré Bondjé-a, Jéova, ki bénédiksyon ou trapé ? » Kisa Alinafe réponn ? Chifundo ka di : « I palé di plizyèr bèl bagaj. Parèkzanp, i di ki Témwen Jéova-ya pa ka fè sa Labib ka défann fè. » Roun tibi tan apré sa, Alinafe arété sèrvi zidòl é i batizé.

21. Kouman nou pouvé idé nou étidyan pou i byen désidé adoré Jéova ?

²¹ Menmsi a « Bondjé ki ka fè sa ki planté-a pousé », i gen bagaj nou divèt fè pou nou étidyan fè progrè (1 Cor. 3:7). Nou pa ka yenki di étidyan-an sa Jéova lé i fè. Nou ka idé li kontan so Bondjé ké tout so tchò. Nou ka idé l’ mété Jéova an prémyé annan so lavi pou montré ki i kontan li. É nou ka anprann li fè Jéova konfyans lò moun ka éséyé baré so chimen. Lò nou ka montré nou étidyan ki nou sir ki i lé fè Jéova plézi, nou ka idé li gen kouraj désidé adoré Jéova.