Kisa nou divèt fè pou nou gen plis kouraj ? Nou papa ké nou manman pouvé ankourajé nou pou nou gen kouraj, mé yé pa pouvé fè nou gen kouraj kousidiré a té roun éritaj yé té ka bay nou. To ka anprann gen kouraj menm fason to ka anprann fè roun bagaj to pa janmen fè anvan. Pou to anprann byen fè sa bagaj-a, a pou to byen gadé kouman moun-an ki ka montré to-a ka fè, épi a pou to fè kou li. Menm fason-an, nou ké gen plis kouraj si nou ka byen gadé kouman ròt moun ka montré yé gen kouraj, épi si nou ka swiv yé èkzanp. Kou Danyèl, nou divèt byen konnèt Paròl Bondjé-a. Nou divèt palé pou Jéova souvan épi di li tousa nou gen ofon nou tchò pou nou fè nou lanmityé ké li vin pi fò. Nou divèt fè li konfyans é nou divèt sir ki i ka idé nou. Konsa, lò i ké gen roun sitiasyon koté nou ké divèt gen kouraj, nou ké gen kouraj. Souvan, lò roun moun gen kouraj, moun-yan ka rèspèkté l’ é so konpòrtman pouvé fè moun ki sensèr vini òbò Jéova. Wi, nou gen patché bon rézon pou nou aji ké kouraj. w23.08 2 § 2 ; 4 § 8-9.

An Grèk, lò yé té ka di « vérifyé », a té pou palé di roun tès yé té ka fè asou métal ki té gen valò. Menm fason-an, a pou nou tèsté sa nou ka tandé ouben sa nou ka li pou nou savé si a roun bagaj ki vré. Sa ké pi enpòrtan pou nou ankò lò gran tribilasyon-an ké tou pròch. Annou pa valé tousa yé ka di nou. Annou pito sèrvi nou tèt. É annou konparé tousa nou ka tandé ouben sa nou ka li ké sa Labib ké òrganizasyon Jéova-a ka anprann nou. Konsa, nou pa ké lésé manti démon-yan bloublou nou kèlkéswa sa yé ka di (Prov. 14:15 ; 1 Tim. 4:1). Nou savé ki pèp Bondjé-a ké janbé gran tribilasyon-an. Mé é nou menm ? Nou pa savé sa ki pouvé rivé nou (Jacq. 4:14). Mé i gen roun bagaj nou pouvé sir : ki nou janbé gran tribilasyon-an, ki nou mouri anvan sa, Jéova ké bay nou lavi pou tout-tan si nou ka rété fidèl. Donk, annou toujou byen désidé kontinyé sonjé bèl èspwar nou gen-an é annou toujou paré pou jou Jéova-a ! w23.06 13 § 15-16.

Nou pa savé kouman roun ran profési ké réyalizé (Dan. 12:8, 9). Mé a pa paské nou pa savé èkzaktéman kouman roun profési ké fèt, ki i pa ké fèt. Nou pouvé sir ki Jéova ké di nou o bon moman sa nou divèt savé, kou i fè l’ tan-lontan. Lò yé ké di « Lapè ké sékirité ! », pwisans politik-ya annan sa monn-an ké ataké fo rélijyon-an é yé ké krazé l’ (1 Thess. 5:3 ; Rév. 17:16, 17). Apré sa, yé ké ataké sèrvitèr Jéova-ya (Ézéch. 38:18, 19). Sa ké mennen nou dirèktéman annan lagèr Armagédon-an (Rév. 16:14, 16). Nou pouvé sir ki sa ké fèt titalò. An atandan, annou kontinyé byen gadé profési-ya ki annan Labib é annou ankourajé ròt-ya fè menm bagaj-a pou nou montré nou Papa ki annan syèl-a é ki kontan nou, ki nou gen rékonésans. w23.08 13 § 19-20.