Si to gen timoun piti, idé yé préparé roun répons, soulon yé laj. Annan sèrten artik nou ka étidyé, yé ka palé di bagaj séryé kou problèm roun mouché ké so madanm pouvé jwenn ouben di zafè péché sèksyèl-ya. Mé pitèt i ké gen roun ouben dé paragraf koté to timoun ké pouvé di roun bagaj. A pou to idé to timoun konprann osi poukisa yé pa ké fè yé réponn chak kou yé ké lévé yé lanmen. Sa ké évité yé gen lapenn lò yé ké wè ki a rounòt moun yé chwazi pou réponn (1 Tim. 6:18). Nou tout pouvé préparé répons ki ka ankourajé nou konpanyen krétyen é ki ka bay Jéova lònò (Prov. 25:11). Menmsi tanzantan nou pouvé palé di roun bagaj ki rivé nou, a pa pou nou fè sa tròp (Prov. 27:2 ; 2 Cor. 10:18). Annou pito rété asou Jéova, so paròl ké asou so pèp (Rév. 4:11). w23.04 24-25 § 17-18.

Nou blijé gen lanmou pou nou pa dronmi é pou nou kontinyé byen réfléchi (Mat. 22:37-39). Lanmou nou gen pou Bondjé ka pèrmèt nou kontinyé préché kèlkéswa problèm nou pouvé jwenn (2 Tim. 1:7, 8). É kou sa lanmou-a ka fè nou kontan sa-ya ki pa ka adoré Jéova osi, nou ka kontinyé préché, menmsi a ké téléfonn ouben lèt. Nou ka kontinyé èspéré ki roun jou, sa moun-yan ké chanjé é ké koumansé fè sa ki byen (Ézéch. 18:27, 28). Nou kontan nou frè ké sò-ya osi. Nou ka montré nou kontan nou konpanyen lò nou ka « ankourajé » nou konpanyen é lò nou ka bay nou konpanyen « plis fòrs » (1 Thess. 5:11). Kou sòlda ki ka briga roun òbò ròt, nou ka ankourajé nou konpanyen. Nou pa jen lé blésé nou frè ké sò-ya parèsprè, ni bay pou randé (1 Thess. 5:13, 15). Anplis di sa, nou ka montré ki nou kontan nou konpanyen si nou ka rèspèkté frè-ya ki ka dirijé asanblé-a (1 Thess. 5:12). w23.06 10 § 6 ; 11 § 10-11.

Roun prémyé bagaj nou pouvé fè pou nou fè nou lafwa vin pi fò, a réfléchi asou ranson-an. Ranson-an ka pèrmèt nou sir ki promès Bondjé-ya ké fèt. Lò nou ka pran tan byen réfléchi asou poukisa Bondjé bay nou ranson-an, épi tout sakrifis i fè pou sa, nou lafwa ka vin pi fò. É nou sir ki nou Bondjé ki ka di ki nou ké viv pou tout-tan annan roun monn ki miyò, ké tchenbé so promès. Poukisa nou pouvé di sa ? Annou réfléchi asou sa Jéova sakrifyé pou i bay nou ranson-an. Jéova voyé so prémyé Pitit i té kontan tèlman, so pi bon zanmi, pou i fèt asou latè-a, pou i sa roun wonm parfè. Lò i té asou latè-a, Jézi jwenn tout kalité problèm. Épi apré sa, i soufri é i mouri. Jéova péyé chè menm ! Nou Bondjé ki plen ké lanmou pa té ké janmen pèrmèt so Pitit soufri é mouri jis pou bay nou roun bèl lavi mé pou roun ti moman sèlman (Jean 3:16 ; 1 Pierre 1:18, 19). Kou Jéova péyé chè pou sové nou, i ké fè tousa ki fo pou nou pouvé viv pou tout-tan annan monn nouvo-a. w23.04 27 § 8-9.